៣ថ្ងៃ នគរបាលរាជធានីភ្នំពេញ បង្ក្រាបបានជនសង្ស័យ៣២នាក់ យកមកបង្ហាញមុខនៅព្រឹកនេះ
រាជធានីភ្នំពេញ ៖ ជនសង្ស័យប្រព្រឹត្តបទល្មើស លួច ឆក់ បង្កហិង្សា គំរាមកំហែង បន្លំឯកសារ រំលោភលើទំនុកចិត្ត ជួញដូរមនុស្ស…
រាជធានីភ្នំពេញ ៖ ជនសង្ស័យប្រព្រឹត្តបទល្មើស លួច ឆក់ បង្កហិង្សា គំរាមកំហែង បន្លំឯកសារ រំលោភលើទំនុកចិត្ត ជួញដូរមនុស្ស និងបង្ខាំងមនុស្សដោយខុសច្បាប់ ចំនួន៣២នាក់ ត្រូវបានកម្លាំងនគរបាលជំនាញ នៃស្នងការនគរបាលរាជធានីភ្នំពេញ និងនៅតាមបណ្ដាខណ្ឌនានា ស្រាវជ្រាវបង្ក្រាបបានជាបន្តបន្ទាប់ ក្នុងរយៈពេល៣ថ្ងៃ ហើយយកទៅបង្ហាញមុខជាសាធារណៈ រួមគ្នា នៅស្នងការដ្ឋាននគរបាលរាជធានីភ្នំពេញ កាលពីព្រឹកថ្ងៃទី២៨ ខែមេសា ឆ្នាំ២០២៥នេះ ។
តាមនគរបាលបានឲ្យដឹងថា ដោយអនុវត្តតាមបទបញ្ជរបស់លោកឧត្ដមសេនីយ៍ឯក ជួន ណារិន្ទ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ និងដឹកនាំបញ្ជាផ្ទាល់ដោយលោកឧត្ដមសេនីយ៍ត្រី ប៊ុន សត្យា ស្នងការរង ផែនការងារព្រហ្មទណ្ឌកម្លាំងការិយាល័យនគរបាលព្រហ្មទណ្ឌកំរិតស្រាល បានសហការជាមួយនគរបាលនៅតាមបណ្ដាលខណ្ឌនានា ធ្វើការស្រាវជ្រាវបង្ក្រាបបទល្មើសជាក់ស្តែងជាបន្តបន្ទាប់ ។
តាមរបាយការណ៍ នៃការបង្ហាញមុខជនសង្ស័យ នៅថ្ងៃទី២៨ ខែមេសា របស់ស្នងការដ្ឋាននគរបាលរាជធានីភ្នំពេញ ទទួលផែនការងារនគរបាលព្រហ្មទណ្ឌបានឱ្យដឹងថា ដោយមានការស្រាវជ្រាវបង្ក្រាបជាក់ស្តែងក្នុង រយៈពេល៣ថ្ងៃ គឺចាប់ពីថ្ងៃទី២៦ រហូតដល់ថ្ងៃទី២៨ ខែមេសា ឆ្នាំ២០២៥ ជាលទ្ធផលបង្ក្រាបបានសរុប១៣ករណី ដោយឃាត់ខ្លួនជនសង្ស័យបានចំនួន២៧នាក់ ក្នុងនោះស្រី៣នាក់ និងជនជាតិបរទេស ចំនួន២នាក់ (ជនជាតិចិន១នាក់ ជនជាតិស៊ុយអ៊ែត១នាក់)។ នៅក្នុងនោះ មានករណី លួច ឆក់ បង្កហិង្សា គំរាមកំហែង បន្លំឯកសារ រំលោភលើទំនុកចិត្ត ជួញដូរមនុស្ស និងបង្ខាំងមនុស្សដោយខុសច្បាប់ ។
តាមនគរបាលបានឱ្យដឹងទៀតថា នៅក្នុងចំណោមជនសង្ស័យ ចំនួនទាំង២៧នាក់ នៅក្នុងនោះ នគរបាលការិយាល័យព្រហ្មទណ្ឌកំរិតស្រាល នៃស្នងការនគរបាលរាជធានីភ្នំពេញ បង្ក្រាបបាន៣ករណី ដោយឃាត់ខ្លួនបានជនសង្ស័យចំនួន ១០នាក់។ ក្នុងនោះ ករណីហិង្សាដោយចេតនា មានស្ថានទម្ងន់ទោសចំនួន២ករណី ឃាតខ្លួនបានចំនួន៦នាក់ និងករណីលក់ដូរមនុស្ស ចាប់ឃុំឃាំង និងបង្ខាំងខុសច្បាប់១ករណី អត់ខ្លួនបានចំនួន ៤នាក់។ នគរបាលខណ្ឌឫស្សីកែវ បង្ក្រាបបាន១ករណី ឃាត់ខ្លួនជនសង្ស័យចំនួន៧នាក់ស្រី ៣នាក់ក្លែងបន្លំឯកសារសាធារណៈ និងរំលោភលើទំនុកចិត្ត ដោយយកប្រាក់ធ្វើសញ្ញាបត្រមធ្យមសិក្សាទុតិយភូមិក្លែងក្លាយ។ នគរបាលខណ្ឌទួលគោក បង្ក្រាបបាន៣ករណី ឃាត់ខ្លួនបានជនសង្ស័យចំនួន ៤នាក់ ករណីលួច និងករណីឆក់។ នគរបាលខណ្ឌ៧មករា បង្ក្រាបបាន២ករណី ឃាត់ខ្លួនជនសង្ស័យ២នាក់ គំរាមកំហែង និងសម្លាប់ ដោយកកូនកាំបិតចង់ស្រួចដេញចាក់មកលើជនរងគ្រោះ។ នគរបាលខណ្ឌពោធិ៍សែនជ័យ បង្ក្រាបបាន២ករណី ឃាត់ខ្លួនជនសង្ស័យ២នាក់ លួចម៉ូតូ និងលួចកុំព្យូទ័រ និងនគរបាលខណ្ឌចំការមន បង្ក្រាបបាន២ករណី ឃាត់ខ្លួនបាន២នាក់ គីជនជាតិបរទេស (ជនជាតិចិនលួចយកម៉ូតូកង់៣ និងជនជាតិស៊ុយអ៊ែតលួចម៉ូតូ) ។
ដោយឡែកជនសង្ស័យចំនួន ៥នាក់ទៀត សមត្ថកិច្ចពុំបានបញ្ជាក់ថា ជាករណីអ្វីពិតប្រាកដនោះឡើយ ដោយដាក់បញ្ចូលបង្ហាញមុខរួមគ្នានៅនៅព្រឹកនេះដែរសរុបទាំងអស់៣២នាក់ ។
ជនសង្ស័យទាំង៣២នាក់ ត្រូវបានកម្លាំងនគរបាលជំនាញ និងនគរបាលនៅតាមបណ្ដាខណ្ឌ កសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញដើម្បីចាត់ការតាមច្បាប់ ៕
ចែករំលែកព័តមាននេះ