ខេត្តកោះកុង ៖ សារ៉ាវចំនួន២ ស្ថិតនៅស្រុកស្រែអំបិល ខេត្តកោះកុង និងស្រុកព្រៃនប់ ខេត្តព្រះសីហនុ ដែលទើបសាងសង់រួចរាល់ថ្មីៗ ជាអំណោយរបស់សមាគមសប្បុរសធម៌ឌូបៃ នៃប្រទេសអារ៉ាប់រួម អេមីរ៉ាត់ ត្រូវបានធ្វើពិធីប្រគល់ជូនទៅដល់សាសនិកអ៊ិស្លាម ដើម្បីគោរព ប្រតិបត្តិតាមប្រពៃណី ។
ពិធីនេះរៀបចំឡើងកាលពីវេលាព្រឹក ថ្ងៃទី១ កក្កដា ក្រោមអធិបតីភាពលោកសុះ មុះ សិន រដ្ឋលេខាធិការក្រសួងធម្មការ និងសាសនា ប្រធានសមាគមគ្រូពេទ្យមូស្ល៊ីមកម្ពុជា និងជាអនុប្រធានអង្គការមូស្ល៊ីមកម្ពុជា ។ នៅក្នុងឱកាសនោះ ក៏មានការអញ្ជើញចូលរួមពីលោកវេជ្ជបណ្ឌិតសាន់ សាប់អ៊ី អនុរដ្ឋលេខាធិការក្រសួងសុខាភិបាល និងសហការីមួយចំនួនទៀត ។
លោកវេជ្ជបណ្ឌិតសុះ មុះសិន ឱ្យដឹងថា សារ៉ាវដែលប្រគល់ជូនដល់សាសនិកអ៊ិស្លាមនៅពេលនេះមួយស្ថិតនៅក្នុងភូមិបាក់អង្រុត ឃុំដងពែង ស្រុកស្រែអំបិល ខេត្តកោះកុង មានទំហំ៦ម៉ែត្រ គុណ៩,៣០ម៉ែត្រ មានបន្ទប់ទឹកចំនួន២ អណ្តូងទឹក១ និងបន្ទប់ទឹក១ អស់ទឹកប្រាក់ចំនួន១១.៥០០ដុល្លារ ដែលជាអំណោយរបស់សមាគមសប្បុរសធម៌ឌូបៃ នៃប្រទេសអារ៉ាប់រួម អេមីរ៉ាត និងសារ៉ាវមួយទៀត មានទំហំដូចគ្នាដែរ ស្ថិតនៅភូមិដូនល័យ ឃុំបឹងតាព្រហ្ម ស្រុកព្រៃនប់ ខេត្តព្រះសីហនុ ។
លោកវេជ្ជបណ្ឌិតសុះ មុះសិន បន្តថា នេះជាសមិទ្ធផលថ្មីទៀតសម្រាប់សហគមន៍ អ៊ិស្លាម ក៏ដូចជាទុកជូនប្រជាពលរដ្ឋនៅក្នុងភូមិដាច់ស្រយាល ដើម្បីសាសនិកអ៊ិស្លាមគោរពប្រតិបត្តិតាមជំនឿសាសនា ។ ក្រោមការដឹកនាំដ៏ឈ្លាសវៃរបស់សម្តេច អគ្គមហាសេនាបតីតេជោ ហ៊ុន សែន បានធ្វើឱ្យប្រទេសជាតិមានការរីកចម្រើនលើគ្រប់វិស័យ ទាំងវិស័យសាសនា និងសង្គមជាតិ ។ ទោះបីរដ្ឋធម្មនុញ្ញបានចែងថា «ព្រះពុទ្ធសាសនាជាសនារបស់រដ្ឋ»ក៏ដោយ ក៏ប៉ុន្តែរដ្ឋបានផ្តល់សិទ្ធិ សេរីភាពពេញទីសម្រាប់សាសនានានានៅកម្ពុជា ក្នុងនោះមានសាសនាអ៊ិស្លាម ក៏ត្រូវបានយកចិត្តទុកដាក់ផងដែរ ។
លោកសុះ មុះសិន បានសំណូមពរដល់សាសនិកអ៊ិស្លាមពេលបានទទួលវិហារនេះហើយនាំគ្នាជួយថែរក្សាឱ្យបានយូរអង្វែង ។ ត្រូវចេះសាមគ្គី អធ្យាស្រ័យគ្នាទៅវិញទៅមក កុំប្រកាន់បក្សពួក ជាហេតុធ្វើឱ្យមានការបែកបាក់ ទំនាស់ផ្ទៃក្នុង ។
លោកវេជ្ជបណ្ឌិតសុះ មុះសិន បានបញ្ជាក់ថា ទោះបីនៅតំបន់ដាច់ស្រយាលក៏ដោយ ក៏ពលរដ្ឋអ៊ិស្លាមទទួលបានសារ៉ាវសម្រាប់គោរពប្រតិបត្តិតាមផ្លូវសាសនាដែរ ៕
ចែករំលែកព័តមាននេះ