វៀតណាម ៖ ទីក្រុងហូជីមិញ បានជួបនឹងរលកកំដៅខ្លាំង ក្នុងរយៈពេលប៉ុន្មានថ្ងៃចុងក្រោយនេះ ដោយសីតុណ្ហភាពខ្យល់ មានចន្លោះពី ៣៥-៣៦អង្សាសេ (53°C)។ តែទោះយ៉ាងណា…
វៀតណាម ៖ ទីក្រុងហូជីមិញ បានជួបនឹងរលកកំដៅខ្លាំង ក្នុងរយៈពេលប៉ុន្មានថ្ងៃចុងក្រោយនេះ ដោយសីតុណ្ហភាពខ្យល់ មានចន្លោះពី ៣៥-៣៦អង្សាសេ (53°C)។ តែទោះយ៉ាងណា កាលពីថ្ងៃពុធ ទី២៣ មេសា ២០២៥ លើបណ្តាញសង្គមមានព័ត៌មានខ្លះផ្សព្វផ្សាយថា ទីក្រុងហូជីមិញមានសីតុណ្ហភាពឡើងដល់ ៥៣អង្សាសេ បង្កឲ្យមានការភាន់ច្រឡំ និងមានការព្រួយបារម្ភ ក្នុងចំណោមអ្នករស់នៅទីក្រុងនេះ ។
ដើម្បីជម្រះការភាន់ច្រឡំនេះ លោក Le Dinh Quyet ប្រធានមជ្ឈមណ្ឌលឧតុនិយម បានពន្យល់បកស្រាយថា តួលេខ ៥៣°C ដែលគេចែករំលែកយ៉ាងច្រើនលើបណ្ដាញសង្គមនោះ មិនមែនជាសីតុណ្ហភាពខ្យល់ពិតប្រាកដ ទេ! វាគឺជាសីតុណ្ហភាពលើផ្ទៃដី ដែលគេវាស់បាននៅលើផ្ទៃឥដ្ឋ បេតុង ឬផ្លូវ ដែលទទួលពន្លឺព្រះអាទិត្យដោយផ្ទាល់។ សម្ភារៈទាំងនេះ វាអាចស្រូប និងរក្សាកំដៅបានខ្លាំង ធ្វើឱ្យសីតុណ្ហភាពលើផ្ទៃដី ខ្ពស់ជាងសីតុណ្ហភាពខ្យល់ នៅជុំវិញ ។
លោក Le Dinh Quyet បានពន្យល់បន្តថា ចំណែកឯ សីតុណ្ហភាព ដែលមនុស្សមានអារម្មណ៍ថា ក្តៅនោះ ត្រូវបានគណនាដោយផ្អែកលើ សីតុណ្ហភាពខ្យល់ សំណើម និងល្បឿនខ្យល់។ កត្តាទាំងនេះ មានសារៈសំខាន់ ក្នុងការវាយតម្លៃពីហានិភ័យសុខភាពមនុស្ស ជាពិសេសសម្រាប់កុមារ ចាស់ជរា និងកម្មករធ្វើការខាងក្រៅ ។
លោក Le Dinh Quyet បានបញ្ជាក់ថា “សីតុណ្ហភាព ដែលយើងមានអារម្មណ៍ពិត គឺវាទាបជាង ៥៣°C ដែលគេវាស់នៅលើផ្ទៃដី” ។ “វាមានចន្លោះពី ៣៥-៣៦ អង្សាសេ ប៉ុណ្ណោះ” ។
លោកបន្ថែមថា ការយល់ច្រឡំ ច្រើនតែកើតឡើង នៅពេលដែលពាក្យបច្ចេកទេស មិនត្រូវបានពន្យល់ច្បាស់លាស់ក្នុងប្រព័ន្ធផ្សព្វផ្សាយព័ត៌មាន។ ក្នុងករណីនេះ ការផ្សាយនៅលើបណ្តាញសង្គម និងសារព័ត៌មានខ្លះ បានបកស្រាយទិន្នន័យមិនត្រឹមត្រូវ បណ្តាលឱ្យប្រជាជនវៀតណាម មានការយល់ច្រឡំ និងមានការព្រួយបារម្ភខ្លាំងពីសុខភាព ៕
ចែករំលែកព័តមាននេះ