ទីក្រុងម៉ូស្គូ៖ ថ្មីៗនេះមានរឿងដ៏គួរឱ្យភ្ញាក់ផ្អើល១ដែលកូនប្រុសបង្កើតរបស់មន្ត្រីជាន់ខ្ពស់ផ្នែកស៊ើបការណ៍សម្ងាត់ស៊ីអាយអេរបស់អាមេរិក (CIA) ទៅធ្វើសង្គ្រាមនៅអ៊ុយក្រែន។ ប៉ុន្តែគាត់មិនមែនទៅជួយអ៊ុយក្រែនទេ គាត់ជួយខាងរុស្ស៊ីវិញ។ តាមពិត ករណីជនជាតិបរទេសទៅជួយខាងរុស្ស៊ី ឬខាងអ៊ុយក្រែនមិនទាស់ខុសអ្វីទេ។ សំខាន់ឱ្យតែពួកគេជាយុទ្ធជនស្ម័គ្រដែលទៅធ្វើសង្គ្រាមជាលក្ខណៈឯកជនដោយសារការស្រឡាញ់ចូលចិត្ត, ការជឿលើមនោគមន៍វិជ្ជា ឬការអូសទាញរបស់មិត្តភក្ដិ។
ករណីកូនប្រុសរបស់ភ្នាក់ងារសម្ងាត់ស៊ីអាយអេដែលជួយខាងរុស្ស៊ីនោះគេទទួលដំណឹងថាគាត់បានស្លាប់ហើយ។ នេះបើយោងតាមការបង្ហើបឱ្យដឹងពីអ្នកនាំពាក្យស៊ីអាយអេផ្ទាល់តែម្ដង។ ម៉ៃឃើល ក្លូស (Michael Gloss) ជាកូនប្រុសរបស់លោកស្រីជូលាន កាលីណា (Juliane Gallina) ជាមន្ត្រីជាន់ខ្ពស់របស់ស៊ីអាយអេមានមុខតំណែងជាអនុប្រធាននាយកដ្ឋានផ្នែកឌីជីថល។ ទីភ្នាក់ងារព័ត៌មានរុស្ស៊ីរាយការណ៍ថាកូនប្រុសវ័យ២១ឆ្នាំរូបនេះបានស្ម័គ្រចិត្តចូលបម្រើនៅក្នុងជួរកងទ័ពរុស្ស៊ី។
ស៊ីអាយអេថ្លែងថាលោកស្រីកាលីណា និងក្រុមគ្រួសារមានទុក្ខជាទម្ងន់នឹងសោកនាដកម្មនេះ។ ស៊ីអាយអេចាត់ទុកថាការស្លាប់នេះជារឿងឯកជន។ មានន័យថាមិនមែនជាការបំពេញបេសកកម្មក្នុងនាមប្រទេសជាតិទេ។ ប៉ុន្តែអង្គភាពស៊ើបការណ៍សម្ងាត់នេះទាំងមូលក៏សូមចូលរួមសោកស្ដាយផងដែរ។ នៅលើបណ្ដាញសង្គមរបស់ខ្លួន ម៉ៃឃើលក្លូសបានបង្ហោះរូបថតរបស់គាត់ញញឹមពព្រាយនៅលើទីលានក្រហមនៃទីក្រុងម៉ូស្គូ និងសម្ដែងការគាំទ្រចំពោះបេសកកម្មយោធារបស់រុស្ស៊ីនៅអ៊ុយក្រែនដែលគាត់ចាត់ទុកថានេះជាសង្គ្រាមប្រយោល។
គាត់បានសរសេររៀបរាប់ថាបណ្ដាញផ្សព្វផ្សាយរបស់លោកខាងលិចគ្មាននិយាយការពិតពាក់ព័ន្ធនឹងសង្គ្រាមនេះទេ។ គាត់ថាពួកគេបានលាក់បាំងការពិតជាច្រើន។ គាត់ថាទាហានអ៊ុយក្រែនមិនអាចប្រៀបផ្ទឹមជាមួយទាហានរុស្ស៊ីបានឡើយ។
សារព័ត៌មានរុស្ស៊ីឈ្មោះអ៊ីមផតថឹន ស្តរី (Important Stories)ជាអ្នកផ្សព្វផ្សាយដំណឹងស្លាប់របស់ម៉ៃឃើលក្លូសមុនគេបង្អស់។ សារព័ត៌មាននេះបានដកស្រង់ប្រភពពីរដ្ឋាភិបាលរុស្ស៊ី និងការបង្ហោះសារនៅលើបណ្ដាញសង្គមរបស់ម៉ៃឃើលក្លូសផ្ទាល់ដើម្បីចុះផ្សាយនូវអត្ថបទដ៏វែងអន្លាយអំពីដំណើរផ្សងព្រេងរបស់គាត់នៅបរទេស។
នៅទីបញ្ចប់ គាត់ក៏ងាកទៅចូលរួមជីវភាពនយោបាយជាមួយរុស្ស៊ី។ ក្រុមគ្រួសាររបស់ម៉ៃឃើលក្លូសបានរៀបរាប់នៅក្នុងវិយោគកថានៃបច្ឆាមរណៈរបស់គាត់ថាក្លូសបានទទួលអនិច្ចកម្មនៅពេលគាត់ធ្វើដំណើរទៅអឺរ៉ុបខាងកើត។ ប៉ុន្តែក្រុមគ្រួសារមិនបានលាតត្រដាងអាថ៌កំបាំងថាកូនប្រុសរូបនេះបានចូលរួមជាមួយទាហានរុស្ស៊ីដើម្បីធ្វើសង្គ្រាមនៅអ៊ុយក្រែនទេ។ នេះបើយោងតាមប្រភពពីទូរទស្សន៍អឹនប៊ីស៊ី (NBC) និងប្រភពដទៃទៀត៕
ចែករំលែកព័តមាននេះ