ទីក្រុងវ៉ាស៊ីនតោន៖ ត្រាំកំពុងមានសុទិដ្ឋិនិយមយ៉ាងខ្លាំងថាបញ្ហាអ៊ុយក្រែនអាចនឹងមានច្រកចេញឆាប់ៗនេះបន្ទាប់ពីលោកពូទីនទើបតែជួបជាមួយប្រេសិតពិសេសរបស់អាមេរិក លោកស្ទីវវីតខូស នៅទីក្រុងម៉ូស្គូ។ ការជួបគ្នាលើកនេះដើម្បីពិនិត្យមើលលទ្ធភាពនៃការចរចាគ្នាដោយផ្ទាល់តែម្ដងរវាងរុស្ស៊ី និងអ៊ុយក្រែន។ ប៉ុន្តែជាថ្មីម្ដងទៀត ហ្សេឡិនស្គីនៅតែនិយាយយ៉ាងទទូចថាលោកមិនអាចបោះបង់ចោលតំបន់គ្រីម៉េបានឡើយ។
លោកនៅតែចិញ្ចឹមចិត្តចង់បានតំបន់នេះមកវិញ។ ថ្មីៗនេះ នៅពេលចុះទៅពិនិត្យមើលកន្លែងរងការវាយប្រហារដោយមីស៊ីល និងដ្រូនរបស់រុស្ស៊ីស្លាប់១២នាក់នៅទីក្រុងកៀវ ហ្សេឡិនស្គីនទទួលស្គាល់ថាអ៊ុយក្រែនគ្មានសមត្ថភាពវាយយកគ្រីម៉េត្រឡប់មកវិញមែនព្រោះអ៊ុយក្រែនគ្មានគ្រឿងសព្វាវុធគ្រប់គ្រាន់។ លោកសង្កត់ធ្ងន់ថាអ៊ុយក្រែនគ្មានអាវុធ មិនមែនគ្មានទ័ពទេ។
ពេលទៅដល់ទីក្រុងរ៉ូមដើម្បីគោរពវិញ្ញាណក្ខន្ធសម្ដេចសង្ឃជាលើកចុងក្រោយ ត្រាំថ្លែងថាការជួបគ្នារវាងប្រេសិតពិសេសរបស់លោកជាមួយលោកពូទីនបានប្រព្រឹត្តិទៅល្អណាស់ដើម្បីនិយាយអំពីរៀបចំគម្រោងជួបគ្នារវាងរុស្ស៊ី និងអ៊ុយក្រែន។ លោកបង្ហោះសារនៅលើបណ្ដាញសង្គមថាពួកគេជិតសម្រេចបានកិច្ចព្រមព្រៀងហើយ។ ភាគីទាំង២អាចចាប់ផ្ដើមជួបគ្នាឆាប់ៗនេះនៅក្នុងកម្រិតខ្ពស់ដើម្បីបង្ហើយកិច្ចការដែលនៅសេសសល់។
លោកអះអាងថាចំណុចសំខាន់ៗមួយភាគធំបានឯកភាពគ្នារួចហើយ។ លោកត្រាំនិយាយត្រឹមតែប៉ុណ្ណេះ និងមិនបានបរិយាយលម្អិតពេកទេ។ កាលពីពេលថ្មីៗនេះ លោកធ្លាប់គំរាមដកខ្លួនថយពីការចរចាគ្នាបើគ្មានការរីកចម្រើនទៅមុខ។
ជំនួយការវិមានក្រឹមឡាំង លោកយូរី អ៊ូសាកូស (Yuri Ushakov) ថ្លែងថាលោកវីតខូស និងលោកពូទីនបានសន្ទនាគ្នាប្រកបដោយការស្ថាបនា។ ក្នុងនោះក៏មាននិយាយអំពីគម្រោងជួបគ្នាដោយផ្ទាល់រវាងរុស្ស៊ី និងអ៊ុយក្រែនផងដែរ។ ជំនួយការរូបនេះអះអាងថាកិច្ចជំនួបលើកចុងក្រោយនេះបានធ្វើឱ្យជំហររបស់អាមេរិក និងរុស្ស៊ីចាប់ផ្ដើមស្របគ្នា និងខិតជិតគ្នាខ្លាំងឡើង។ នេះបើយោងតាមប្រភពពី Chnnale News Asia៕
ចែករំលែកព័តមាននេះ