ទីក្រុងកៀវ៖ នៅទីបំផុត ហ្សេឡិនស្គីទទួលស្គាល់ថាប្រទេសរបស់លោកគ្មានកម្លាំងយោធាគ្រប់គ្រាន់ដើម្បីវាយដណ្ដើមយកតំបន់គ្រីម៉េពីកណ្ដាប់ដៃរុស្ស៊ីត្រឡប់មកវិញពិតមែន។ តំបន់នេះត្រូវរុស្ស៊ីដាក់បញ្ចូលជាទឹកដីរបស់ខ្លួនកាលពីឆ្នាំ២០១៤។ ម៉្យាងទៀត លោកហ្សេឡិនស្គីក៏លែងត្រូវការទាមទារឱ្យអាមេរិកចេញមុខការពារសន្តិសុខជាតិអ៊ុយក្រែនតទៅទៀតដែរ។
លោកថាអាមេរិកមិនចាំបាច់បញ្ជូនកងទ័ពទៅអ៊ុយក្រែនដើម្បីការពារសន្តិសុខជាតិទេ។ ការថ្លែងដូច្នេះហាក់ដូចជាស្របទៅនឹងបំណងប្រាថ្នារបស់ត្រាំ។ ត្រាំកំពុងស្វះស្វែងរកការគាំទ្រសំណើសន្តិភាពរបស់គាត់។ គាត់ធ្លាប់សន្យាថានឹងបិទបញ្ចប់សង្គ្រាមឱ្យបានក្នុងរយៈពេល២៤ម៉ោង។ ឥឡូវនេះនៅសល់តែប៉ុន្មានថ្ងៃទៀត គាត់នឹងកាន់អំណាចគម្រប់១០០ថ្ងៃហើយ។
ត្រាំបានបង្ខំឱ្យហ្សេឡិនស្គីទទួលយកកិច្ចព្រមព្រៀងសន្តិភាពដែលគាត់ជាអ្នករៀបចំ និងដែលបានកាត់ទឹកដីអ៊ុយក្រែនខ្លះទៅឱ្យរុស្ស៊ី។ កាលពីយប់មិញ ត្រាំនិយាយថាអ៊ុយក្រែនគួរតែចុះកិច្ចព្រមព្រៀងរ៉ែកម្រជាមួយអាមេរិកឱ្យបានឆាប់។ ប្រេសិតពិសេសរបស់ត្រាំ លោកស្ទីវវីតខូស កំពុងស្ថិតនៅទីក្រុងម៉ូស្គូដើម្បីជួបពិភាក្សាការងារជាមួយលោកពូទីនជាលើកទី៤។
នៅក្នុងសំណើរបស់ត្រាំលើកចុងក្រោយនេះក៏មាននិយាយពីការទទួលស្គាល់តំបន់គ្រីម៉េជាទឹកដីរុស្ស៊ី និងការស្នើសុំឱ្យភាគីទាំង២ផ្អាកផ្ទុះអាវុធនៅគ្រប់សមរភូមិទាំងអស់។ មានន័យថាទឹកដីអ៊ុយក្រែនដែលរុស្ស៊ីកំពុងកាន់កាប់នៅភាគខាងកើត និងភាគខាងត្បូងអាចនឹងបានទៅលើរុស្ស៊ីទៀត សរុបស្មើនឹង២០%។ នៅក្នុងសំណើនោះ អ៊ុយក្រែនមិនត្រូវចូលជាសមាជិកអង្គការណាតូទេ។
ហ្សេឡិនស្គីទទួលស្គាល់ថាជាការពិតដូចត្រាំនិយាយមែន យើងគ្មានអាវុធគ្រប់គ្រាន់ដើម្បីវាយយកគ្រីម៉េមកវិញទេ។ ហ្សេឡិនស្គីសង្កត់ធ្ងន់ថាយើងគ្មានអាវុធ, មិនមែនគ្មានទ័ពទេ។ លោកថ្លែងដូច្នេះនៅពេលចុះពិនិត្យមើលទិដ្ឋភាពវាយប្រហារពីសំណាក់រុស្ស៊ីបណ្ដាលឱ្យស្លាប់មនុស្ស១២នាក់នៅទីក្រុងកៀវ។ ហ្សេឡិនស្គីយល់ថាសហគមន៍អន្តរអាចគាបសង្កត់រុស្ស៊ីតាមមធ្យោបាយជាច្រើនដូចជាទណ្ឌកម្មសេដ្ឋកិច្ច, សម្ពាធសេដ្ឋកិច្ច និងសម្ពាធការទូត។ ខាងលើនេះជាការដកស្រង់ប្រភពពីគេហទំព័រប៊្លូមបឺក (Bloomberg)៕
ចែករំលែកព័តមាននេះ