ទីក្រុងរ៉ូម៖ នៅល្ងាចនេះ ត្រាំ និងហ្សេឡិនស្គីបានជួបគ្នានៅទីក្រុងរ៉ូម ប្រទេសអ៊ីតាលី នៅពេលលោកទាំង២អញ្ជើញទៅចូលរួមពិធីបញ្ចុះព្រះបរមសពសម្ដេចព្រះសង្ឃរាជប៉ាបហ្វ្រង់ស៊ីស។ ហ្សេឡិនស្គីប្រកាសតាំងពីមុននេះថាលោកចង់ជួបមុខត្រាំជាខ្លាំងដើម្បីនិយាយអំពីការបញ្ចប់សង្គ្រាមអ៊ុយក្រែន។ នេះបើតាមសេចក្ដីប្រកាសរបស់ខុទ្ទកាល័យលោកហ្សេឡិនស្គី។
គ្មានការធ្វើអត្ថាធិប្បាយលម្អិតថាថ្នាក់ដឹកនាំទាំង២ជួបគ្នានៅពេលនោះបាននិយាយអ្វីខ្លះទេ។ ប៉ុន្តែការយល់ព្រមជួបគ្នាលើកនេះកើតឡើងនៅក្នុងកាលៈទេសៈដ៏សំខាន់នៅពេលដំណើរការចរចាគ្នាហាក់ដូចជាវិវត្ត១៨០ដឺក្រេទៅរកសញ្ញាវិជ្ជមាន។ ត្រាំប្រកាសដោយមោទកភាពថាការចរចាគ្នារីកចម្រើនទៅមុខបន្ទាប់ពីប្រេសិតពិសេសរបស់គាត់ជួបលោកពូទីននៅទីក្រុងម៉ូស្គូ។
ត្រាំថាមិនយូរទេ ភាគីទាំង២នឹងឈានដល់ការចុះកិច្ចព្រមព្រៀងជាមួយគ្នា។ លោកចង់ឃើញភាគីទាំង២ជួបចរចាគ្នាកម្រិតខ្ពស់នាពេលឆាប់ៗនេះដើម្បីពន្លឿនការចរចា។ ឥឡូវនេះ អ៊ុយក្រែនហាក់ដូចជាលែងត្រូវការទាមទារអ្វីតទៅទៀតហើយ។ គ្រីម៉េក៏មិនសង្ឃឹមបានមកវិញ រីឯទឹកដីអ៊ុយក្រែនដែលកងទ័ពរុស្ស៊ីកំពុងកាន់កាប់នៅភាគខាងកើត និងខាងត្បូងនោះក៏មិនសង្ឃឹមយកបានមកវិញបន្ទាប់ពីត្រាំស្នើសុំឱ្យភាគីទាំង២បញ្ចប់ការផ្ទុះអាវុធគ្រប់សមរភូមិ និងរក្សាកងទ័ពនៅលើទីតាំងជាក់ស្ដែង។
ម៉្យាងទៀត គោលបំណងរបស់អ៊ុយក្រែនដែលចង់ចូលអង្គការណាតូក៏មិនអាចទៅរួចទៀត។ អ្នកខ្លះថាចរចាលើកនេះប្រៀបដូចជាការលើកពានជ័យជម្នះឱ្យរុស្ស៊ីតែម្ដងព្រោះធ្វើទៅតាមការចង់បានរបស់រុស្ស៊ីគ្រប់ជំហាន។ ប៉ុន្តែត្រាំចង់ផ្ដោតសំខាន់ទៅលើភាពប្រាកដនិយមច្រើនជាង។ ដោយសាររុស្ស៊ីមានប្រៀបនៅលើសមរភូមិ ដូច្នេះលោកយល់ថាពិបាកនឹងដាក់លក្ខខណ្ឌជាមួយរុស្ស៊ី។
ត្រាំប្រហែលជាញញឹមបិទមាត់មិនជិតទេព្រោះគាត់ហាក់ដូចជាមានសុទិដ្ឋិនិយមខ្ពស់ចំពោះសភាពការណ៍វិវត្តថ្មីៗនេះ។ ហេតុដូច្នេះហើយ គាត់ទទួលជួបហ្សេឡិនស្គីដោយសេចក្ដីសោមនស្សរីករាយ។ គាត់ធ្លាប់ព្រមានថានឹងដកខ្លួនថយឱ្យឆ្ងាយពីការចរចាគ្នាបើគ្មានការរីកចម្រើនទៅមុខ។ ការជួបគ្នានៅទីក្រុងរ៉ូមលើកនេះជាករណីជួបគ្នាដោយផ្ទាល់ជាលើកដំបូងចាប់តាំងពីលោកទាំង២មានទំនាស់ពាក្យសម្ដីគ្នាយ៉ាងល្វីងជូរចត់នៅសេតវិមានកាលពីដើមខែមីនា។ ខាងលើនេះជាការដកស្រង់ប្រភពពីទីភ្នាក់ងារព័ត៌មានរ៉យទ័រ និងប្រភពដទៃទៀត៕
ចែករំលែកព័តមាននេះ