ចាប់តាំងពីដើមឆ្នាំនេះមក អាជ្ញាធរចិនបានធ្វើមាតុភូមិនិវត្តជនកម្ពុជានារីកម្ពុជាសរុបចំនួន៩៨នាក់ ក្រោយពេលដែលពួកគេត្រូវបានជួយសង្គ្រោះពីការជួញដូរមនុស្សប្រមាណជា៤២ករណី ។ ដូច្នេះ នេះគឺសារមួយពញ្ញាក់នារីកម្ពុជាឲ្យប្រុងប្រយ័ត្នរឿងនេះ ។ ជាការពិត ជោគវាសនាមនុស្ស វាមិនដូចគ្នាទាំងអស់នោះទេ…
ចាប់តាំងពីដើមឆ្នាំនេះមក អាជ្ញាធរចិនបានធ្វើមាតុភូមិនិវត្តជនកម្ពុជានារីកម្ពុជាសរុបចំនួន៩៨នាក់ ក្រោយពេលដែលពួកគេត្រូវបានជួយសង្គ្រោះពីការជួញដូរមនុស្សប្រមាណជា៤២ករណី ។ ដូច្នេះ នេះគឺសារមួយពញ្ញាក់នារីកម្ពុជាឲ្យប្រុងប្រយ័ត្នរឿងនេះ ។
ជាការពិត ជោគវាសនាមនុស្ស វាមិនដូចគ្នាទាំងអស់នោះទេ ។ នៅក្នុងចំណោមនារីជាច្រើន ដែលបានប្រឹងប្រែងកែប្រែជោគវាសនារបស់ខ្លួនតាមវិធីសាស្ត្ររកស្វាមីបរទេស គឺមានអ្នកដែលមានសុភមង្គល និងលើកកម្ពស់កិត្តិយស និងទ្រព្យសម្បត្តិគ្រួសារក៏មានច្រើន ។ ប៉ុន្តែអ្វីដែលបារម្ភ គឺករណីស៊យត្រូវប៉ះចំករណីដូចលើកឡើងខាងលើ ។
កន្លងមក ករណីដែលនារីកម្ពុជារងគ្រោះភាគច្រើន ដែលគេបានរាយការណ៍ គឺមានទាក់ទងនឹងចិន កូរ៉េខាងត្បូង និងប្រទេសមួយចំនួនទៀត ។ នារីទាំងនោះត្រូវបានគេជ្រើសរើសតាមរយៈក្រុមបុគ្គល ដែលមានបណ្តាញនៅក្នុងប្រទេសនិងបណ្តាញក្រៅប្រទេស ។ ពួកគេត្រូវបានអាជ្ញាធរចាត់វិធានការតឹងរឹង ប៉ុន្តែនៅតែមានករណីបែបនេះលេចធ្លាយ និងបន្តដំណើរការជាបន្តបន្ទាប់រហូតដល់បច្ចុប្បន្ន ។
ជាក់ស្តែង តាមសេចក្តីប្រកាសព័ត៌មានមួយពីការិយាល័យ អ្នកនាំពាក្យរបស់អគ្គនាយករដ្ឋានអន្តោប្រវេសន៍ថ្មីៗនេះបានឲ្យដឹងថា ចាប់តាំងពីខែមករា ដល់ខែមេសា សមត្ថកិច្ចចិនបានធ្វើការបញ្ជូនពលរដ្ឋខ្មែរដែលរងគ្រោះក្នុងករណីជួញដូរមនុស្សពីចិនឲ្យវិលត្រឡប់មកកម្ពុជាវិញ សរុប៤២ករណី ដែលមានស្ត្រី៩៨នាក់ ក្នុងនោះ៥៩នាក់ បានត្រឡប់ទៅគេហដ្ឋានពួកគេវិញហើយ ខណៈ ៣៩នាក់ កំពុងត្រូវបានមើលថែដោយនាយកដ្ឋានគាំពារជនរងគ្រោះ និងការពារអនីតិជន ក្រោមក្រសួងសង្គមកិច្ច អតីតយុទ្ធជន និងយុវនីតិសម្បទា ។
ក្រៅពីនោះ សមត្ថកិច្ចនគរបាលអន្តោប្រវេសន៍ នៅតាមច្រកទ្វាអន្តរជាតិនានា បានធ្វើការទប់ស្កាត់អ្នកដំណើរដែលមានការសង្ស័យពាក់ព័ន្ធនឹងអំពើជួញដូរមនុស្សទៅក្រៅប្រទេស សរុបចំនួន៥២ករណីផ្សេងទៀត ដោយមានមនុស្សពាក់ព័ន្ធសរុប១០៧នាក់ ។ នៅក្នុងនោះ ពលរដ្ឋខ្មែរមាន៩៣ នាក់ ។
ដោយឡែក តាមច្រកទ្វានៅអាកាសយានដ្ឋានអន្តរជាតិភ្នំពេញបានធ្វើការទប់ស្កាត់អ្នកដំណើរដែលសង្ស័យពាក់ព័ន្ធនឹងករណីអំពើជួញដូរមនុស្សទៅក្រៅប្រទេស សរុបចំនួន៣៦ ករណី ដោយមានមនុស្ស៧៥នាក់ នៅក្នុងនោះស្ត្រីមាន ៥៥នាក់ ។
ប្រភពដដែលបានបន្តទៀតថា ក្រោយពេលដែលសមត្ថកិច្ចបានធ្វើសម្ភាសន៍សាកសួរព័ត៌មាន៣នាក់ ត្រូវបានអនុញ្ញាតឲ្យវិលត្រឡប់ទៅលំនៅស្ថានវិញ ។ ក្រៅពីនោះ គឺបានបញ្ជូនទៅអោយនាយកដ្ឋានប្រឆាំងការជួញដូរមនុស្ស និងការពារអនីតិជន និងស្នងការដ្ឋាននគរបាលខេត្តនានា ដើម្បីបន្តស្រាវជ្រាវ និងអនុវត្តនីតិវិធីក្រោមបទសង្ស័យថា ពាក់ព័ន្ធនឹងអំពើជួញដូរមនុស្សទៅក្រៅប្រទេស ។
ពាក់ព័ន្ធនឹងករណីទាំងអស់នេះ អគ្គនាយកដ្ឋានអន្តោប្រវេសន៍ បានជំរុញឱ្យប្រជាពលរដ្ឋកម្ពុជាទាំងអស់ ប្រុងប្រយ័ត្នខ្ពស់ចំពោះឧបាយកលបោកបញ្ឆោត និងឧបាយកលដែលប្រើដោយមេខ្យល់ និងឧក្រិ.ដ្ឋជនជួញដូរមនុស្សគ្រប់រូបភាព និងគ្រប់មធ្យោបាយ ។
កន្លងមកនារីកម្ពុជាមួយចំនួនបានត្រូវក្រុមឧក្រិ.ដ្ឋជនជួញដូរបោកប្រាស់ថា ទៅការប្តីនៅបរទេស ប៉ុន្តែពួកគេត្រូវបាននាំចូលទៅក្នុងឧស្សាហកម្មផ្លូវភេទ ។ នារីខ្លះទៀត គឺពិតជាបានរៀបការនឹងស្វាមីបរទេសមែន ប៉ុន្តែជីវិតពួកគេមិនមានសេចក្តីសុខ ដោយត្រូវបិទសិទ្ធិសេរីភាព ហើយក្លាយជាជនរងគ្រោះនៃអំពើហិ.ង្សានៅក្នុងគ្រួសារ និងការរំលោ.ភបំពានផ្សេងៗ ។
សូមប្រុងប្រយ័ត្ម ហើយកុំយកខ្លួនទៅប្រថុយនឹងឆាកជីវិតដែលនៅក្រៅប្រទេសជាកន្លែងដែលខុសគ្នា ទាំងភាសា ទាំងជីវភាពរស់នៅ ហើយគ្មានសាច់ញាតិពឹងពុំនាក់ឡើយ ។
កាលពីឆ្នាំ២០២៤កន្លងទៅ ក្នុងពេលប្រតិបត្តិការបង្ក្រាបករណីជួញដូរមនុស្ស និងកេងប្រវ័ញ្ចផ្លូវភេទ សមត្ថកិច្ចកម្ពុជា បានទប់ស្កាត់បានប្រមាណជា១០៤ករណី ។ អាជ្ញាធរមានសមត្ថកិច្ច បានឃាត់ខ្លួនជនសង្ស័យចំនួន១៣៤ នាក់ ក្នុងនោះមានជនបរទេស៤ នាក់ ។ ក្រៅពីការចាប់ខ្លួន អាជ្ញាធរជួយសង្គ្រោះជនរងគ្រោះបានចំនួន២៩០នាក់ ក្នុងនោះមានស្រី្តចំនួន២៤១ នាក់ ។
ជាមួយគ្នានេះ និងបើតាមរបាយការណ៍ដដែលជនរងគ្រោះពីករណីជួញដូរមនុស្ស និងកេងប្រវ័ញ្ចផ្លូវភេទចំនួន១៣៤ នាក់ គឺជាអនីតិជនអាយុក្រោម១៨ ឆ្នាំទៅទៀត ៕
ចែករំលែកព័តមាននេះ