ជុំវិញព័ត៌មាននគបាលខេត្តព្រៃវែង ដាក់កម្លាំង៣គោលដៅមិនធ្លាប់មានលើផ្លូវជាតិលេខ១
- ព្រៃវែង
ខេត្តព្រៃវែង ៖ ប្រភពព័ត៌មានច្បាស់ការណ៍មួយបានឲ្យដឹងថា ការដាក់កម្លាំងចំនួន 3 ទីតាំង នៅលើបណ្ដោយផ្លូវជាតិលេខ 1 កាលពីល្ងាចថ្ងៃទី 24…
ខេត្តព្រៃវែង ៖ ប្រភពព័ត៌មានច្បាស់ការណ៍មួយបានឲ្យដឹងថា ការដាក់កម្លាំងចំនួន 3 ទីតាំង នៅលើបណ្ដោយផ្លូវជាតិលេខ 1 កាលពីល្ងាចថ្ងៃទី 24 មេសា របស់ស្នងការនគរបាលខេត្តព្រៃវែង គឺ ដើម្បីស្ទាក់ចាប់ក្រុមជនល្មើសជាជនជាតិចិនដែលបានផ្ទុះអាវុធនៅក្នុងបរិវេណកាស៊ីណូសៀងហៃ ដែលមានទីតាំងនៅមាត់ច្រកព្រំដែនសំរោង ក្នុងទឹកដីស្រុកចន្ទ្រា ខេត្តស្វាយរៀង ហើយបានរត់គេចខ្លួនបំណងទៅរាជធានីភ្នំពេញ។
នៅក្នុងសកម្មភាពស្ទាក់ចាប់ក្រុមជនល្មើសនេះគេបានបង្ហើបឲ្យដឹងថា កម្លាំងនគរបាលខេត្តព្រៃវែង បានដាក់គោលដៅស្ទាក់ចាប់ចំនួន 3 ទីតាំង ចាប់ធ្វើពីម៉ោង 4 រសៀលថ្ងៃទី 24 បន្តរហូតដល់ ម៉ោង 4 ទៀបភ្លឺ ព្រឹកថ្ងៃទី 25 មេសា ទើបដកកម្លាំងចេញវិញ។
ប្រជាពលរដ្ឋនៅក្នុងស្រុកកំពង់ត្របែកបានឱ្យដឹងថា នៅក្នុងប្រតិបត្តិការនេះ កម្លាំងនគរបាលខេត្តព្រៃវែង បានចាប់ឃាត់ជនជាតិចិនជាច្រើននាក់ ហើយបានបញ្ជូនទៅកាន់ស្នងការដ្ឋានខេត្តព្រៃវែងនៅព្រឹកថ្ងៃទី 25 មេសា។
ជុំវិញករណីនេះ កោះសន្តិភាពបានព្យាយាមទំនាក់ទំនងតាមទូរសព្ទទៅលោក ឈឿន ប៊ុនឆន ស្នងការនគរបាលខេត្តព្រៃវែង ដើម្បីសុំការបំភ្លឺផងដែរ នៅព្រឹកថ្ងៃទី 25 មេសានេះ ប៉ុន្តែទូរសព្ទរបស់លោកខលចូលហើយគ្មានអ្នកទទួល ទំនងស្គាល់លេខអ្នកកាសែតទេដឹង? ដូច្នេះហើយទើបគេមិនអាចដឹងបានថា តើជនជាតិចិនទាំងអស់ដែលត្រូវបានចាប់ខ្លួន មានចំនួនប៉ុន្មាននាក់? ហើយជោគវាសនារបស់ពួកគេ នឹងទៅជាយ៉ាងណានោះទេ ព្រោះជាព័ត៌មានដែលអ្នកចាប់លាក់ឈឹងតែម្តង ម៉្លោះហើយ អ្នកកាសែតរាយការណ៍ត្រឹមតែ«ម៉ាដឹង» ប៉ុណ្ណោះ ។
ព័ត៌មានពិស្តារបន្ថែមជាមួយប្រភពមកពីខេត្តស្វាយរៀង យើងនឹងចុះផ្សាយនៅលើកាសែតកោះសន្តិភាពបន្តទៀត ៕
ចែករំលែកព័តមាននេះ