កូនស្រី២នាក់ ក្លាយជាក្មេងកំព្រា ក្រោយឪពុកជួបគ្រោះថ្នាក់ចរាចរណ៍លើដងផ្លូវជាតិលេខ៥៧
ខេត្តប៉ៃលិន ៖ រហូតមកដល់ថ្ងៃទី២៤ ខែមេសា ឆ្នាំ២០២៥នេះ ក្មេងស្រីជំទង់២នាក់បងប្អូន បានក្លាយទៅជាកូនកំព្រា ទាំងឪពុក និងម្តាយ ខណៈពេល…
ខេត្តប៉ៃលិន ៖ រហូតមកដល់ថ្ងៃទី២៤ ខែមេសា ឆ្នាំ២០២៥នេះ ក្មេងស្រីជំទង់២នាក់បងប្អូន បានក្លាយទៅជាកូនកំព្រា ទាំងឪពុក និងម្តាយ ខណៈពេល ដែលម្តាយរស់នៅមិនចុះសម្រុង បានលែងលះជាមួយនឹងបុរសរងគ្រោះ ក៏ចាកចេញទៅរកស៊ីនៅប្រទេសថៃ ហើយមានគ្រួសារថ្មីទៀត ទុកឱ្យកូនទាំង២នាក់ រស់នៅជាមួយឪពុក និងយាយជាអ្នកចិញ្ចឹម ក្នុងភូមិអូរបេង ឃុំស្ទឹងកាច់ ស្រុកសាលាក្រៅ ខេត្តប៉ៃលិន លុះកាលពីវេលាម៉ោង១០និង៣០នាទីព្រឹកថ្ងៃទី២២ ខែមេសា ឆ្នាំ២០២៥នេះ ជនរងគ្រោះ(ឪពុក)កំពុងតែជិះម៉ូតូសុខៗ នៅលើដងផ្លូវជាតិលេខ៥៧ ឆ្ពោះទៅកន្លែងធ្វើការនៅព្រំដែនកម្ពុជាថៃ ស្រាប់តែមានរ៉ឺម៉កម៉ូតូ១គ្រឿង បើកបុកជាមួយនឹងរថយន្តជនជាតិចិន ត្រង់ចំណុចផ្លូវកោង បណ្តាលឱ្យជ្រុលទៅបុកម៉ូតូជនរងគ្រោះ កំពុងធ្វើដំណើរក្បែរនោះ បណ្តាលឱ្យដួលបោកក្បាលទៅនឹងចិញ្ចើមផ្លូវបាក់ក.ស្លាប់ភ្លាមៗ ។
បើតាមប្រភពព័ត៌មានពីស្ត្រីម្នាក់ ឈ្មោះ ញឹម សារ៉ន អាយុ៥៦ឆ្នាំ រស់នៅក្នុងភូមិខាងលើ បានរៀបរាប់ទាំងទឹកភ្នែកហូរសស្រាក់ ឱ្យដឹងថា ៖ គាត់មានកូនប្រុស ចំនួន២នាក់ ជនរងគ្រោះជាកូនទី១. ឈ្មោះ ឱក សុភា អាយុ៣៧ឆ្នាំ ជាបុគ្គលិកកាស៊ីណូ អនឡាញ (ស្លាប់កន្លែងកើតហេតុ)។ កាលពីជាង២០ឆ្នាំមុន រូបគេបានរៀបការជាមួយនឹងនារីម្នាក់ ហើយក៏បានរួមរស់នៅជាមួយគ្នា រហូតទទួលបានមរតកកូនស្រី ចំនួន២នាក់ ទី១. ឈ្មោះ ស៊ុយ សៀកម៉ី អាយុ១៨ឆ្នាំ ជានិស្សិតឆ្នាំទី២ និងទី២. ឈ្មោះ ស៊ុយ សៀកមួយ អាយុ១៧ឆ្នាំ រៀនថ្នាក់ទី១០ ទាំង២នាក់ ស្នាក់នៅរៀន រាជធានីភ្នំពេញ ដោយទទួលបានការឧបត្ថម្ភពីឪពុកប្រចាំខែ ខណៈដែលម្តាយរស់នៅមិនចុះសម្រុងជាមួយនឹងឪពុក ក៏លែងលះគ្នា តាំងពីកូនស្រីទាំង២នៅតូចៗម្លេះ ។
ស្ត្រីជាម្តាយជនរងគ្រោះ បានឱ្យដឹងទៀតថា កាលពីព្រឹកថ្ងៃកើតហេតុ កូនប្រុសរបស់គាត់ បានជិះម៉ូតូក្នុងទិសដៅពីកើតទៅលិច ដោយចេញទៅធ្វើការកាស៊ីណូ ដូចសព្វមួយដង ប៉ុន្តែលុះដល់ត្រង់ចំណុចផ្លូវកោង១កន្លែង ស្ថិតនៅក្នុងភូមិអូររអិល ឃុំស្ទឹងកាច់ ស្រុកសាលាក្រៅ ខេត្តប៉ៃលិន ស្រាប់តែមានម៉ូតូរ៉ឺម៉ក១គ្រឿង បើកបរក្នុងទិសដៅពីកើតទៅលិច ក្នុងល្បឿនលឿន វ៉ាម៉ូតូកូនប្រុសរបស់គាត់ ត្រង់ចំណុចផ្លូវកោង ហើយស្របពេល ដែលរថយន្តជនជាតិចិន បើកបរក្នុងទិសដៅពីលិចទៅកើត ក៏បុកជាមួយនឹងម៉ូតូរ៉ឺម៉កខាងលើពេញទំហឹង បណ្តាលឱ្យម៉ូតូរ៉ឺម៉កខ្ទាតជ្រុលទៅបុកម៉ូតូកូនប្រុសរបស់គាត់ដួលបោកទៅនឹងចិញ្ចើមផ្លូវជាតិ បាក់ក.ស្លាប់ភ្លាមៗ តែម្តង។ រីឯអ្នកបើកបរម៉ូតូរ៉ឺម៉ក រងរបួសធ្ងន់២នាក់ ត្រូវគេបញ្ជូនទៅសង្គ្រោះនៅមន្ទីរពេទ្យខេត្តបាត់ដំបង ។
គាត់បញ្ជាក់ទៀតថា នៅពេលនេះ ចៅស្រីរបស់គាត់ទាំង២នាក់ កំព្រាគ្មានឪពុកម្តាយ រកស៊ីចិញ្ចឹម និងគ្មានថវិកាសម្រាប់បន្តការសិក្សារៀនសូត្របន្តទៅទៀតនោះឡើយ ព្រោះអស់អ្នកជំហរផ្គត់ផ្គង់ប្រចាំថ្ងៃខែ។ គាត់ជាយាយ ពិតជារន្ធត់ក្នុងចិត្តយ៉ាងខ្លាំង ព្រមទាំងសោកស្តាយពន់ពេក ចំពោះការបាត់បង់កូនប្រុសជាទីស្រឡាញ់ ពេលនេះ មានតែដើរដេកអង្គុយយំនឹកកូនរបស់ខ្លួន ដែលបានជួបគ្រោះថ្នាក់ចរាចរណ៍ ស្លាប់យ៉ាងអាណោចអាធ័មប៉ុណ្ណោះ ។
រហូតមកដល់ថ្ងៃទី២៣ ខែមេសា ឆ្នាំ២០២៥នេះ គាត់បានចូលទៅដោះស្រាយជាមួយភាគីម៉ូតូរ៉ឺម៉ក និងខាងភាគីរថយន្តជនជាតិចិនដែរ ដោយគេបានជូនថ្លៃធ្វើបុណ្យ ចំនួន៨លានរៀលប៉ុណ្ណោះ រីឯម្ចាស់រ៉ឺម៉ក កំពុងរងរបួសធ្ងន់ សម្រាកព្យាបាលនៅមន្ទីរពេទ្យ មិនទាន់ដោះស្រាយសំណងអ្វីជូនគាត់នោះទេ។ តែអ្វីដែលគាត់ព្រួយបារម្ភខ្លាំង គឺចៅស្រីទាំងពីរនាក់ ដែលកំពុងតែរៀនសូត្រ នៅភ្នំពេញ មិនដឹងជាបានអ្នកណាជួយឧបត្ថម្ភបន្តទៀតនោះឡើយ ៕
ចែករំលែកព័តមាននេះ