ខេត្តកំពង់ចាម ៖ ក្នុងរយៈពេលប៉ុន្មានថ្ងៃនេះ ទឹកទន្លេមេគង្គបានហក់ឡើង ជាហេតុធ្វើឲ្យប្រដឹស ឬស្ពានឬស្សី សម្រាប់ឆ្លងពីត្រើយក្រុងកំពង់ចាម ទៅឆ្នេរខ្សាច់កោះប៉ែន នៅឃុំកោះមិត្ត ស្រុកកំពង់សៀម…
ខេត្តកំពង់ចាម ៖ ក្នុងរយៈពេលប៉ុន្មានថ្ងៃនេះ ទឹកទន្លេមេគង្គបានហក់ឡើង ជាហេតុធ្វើឲ្យប្រដឹស ឬស្ពានឬស្សី សម្រាប់ឆ្លងពីត្រើយក្រុងកំពង់ចាម ទៅឆ្នេរខ្សាច់កោះប៉ែន នៅឃុំកោះមិត្ត ស្រុកកំពង់សៀម មានប្រវែងជាង៧០០ម៉ែត្រ ត្រូវបានទឹកហូរបុកប៉ើងដាច់ត្រង់ផ្នែកកណ្ដាលមិនអាចឱ្យមនុស្សដើរឆ្លងកាត់បានឡើយ ។
លោក ប៊ុន ដារា ម្ចាស់រមណីយដ្ឋានឆ្នេរខ្សាច់កាប៉ែនមានប្រសាសន៍ឲ្យដឹង កាលពីល្ងាចថ្ងៃទី២៨ ឧសភា ឆ្នាំ២០២៥ថា ដោយឃើញទឹកទន្លេបានហក់ឡើងជាបន្តបន្ទាប់ ធ្វើឲ្យសសរទម្រង់សង់ពីប្ញស្សីបានទ្រេតត្រង់ផ្នែកកណ្ដាល ដោយឃើញបែបនេះរូបលោកបានឱ្យកម្លាំងកម្មករដែលយាមនៅចំណុចក្បាលស្ពានត្រើយក្រុងកំពង់ចាមបិទបារ៉ាស់មិនឲ្យមនុស្សដែលឆ្លងកាត់ទៅលេងឆ្នេរខ្សាច់កោះប៉ែននោះទេ ព្រោះខ្លាចគ្រោះថ្នាក់កើតឡើងជាយថាហេតុណាមួយ ។
ម្ចាស់រមណីយដ្ឋានឆ្នេរខ្សាច់កោះប៉ែនបានបន្តឲ្យដឹងទៀតថា ដោយសារតែទឹកទន្លេចេះតែឡើងបន្ថែមទៀតនោះរហូតដល់ព្រឹកថ្ងៃទី២៨ ឧសភា ធ្វើឲ្យស្ពានប្ញស្សីត្រង់ផ្នែកកណ្ដាលត្រូវបានទឹកហូរបុកបំប៉ើងដាច់ពីគ្នា ។
សូមបញ្ជាក់ថា ស្ពានឬស្សីនេះ ត្រូវបានប្រើកម្លាំងកម្មករជាច្រើននាក់ ដើម្បីស្ថាបនាហើយអាចឱ្យភ្ញៀវជាតិនិងអន្តរជាតិដើរឆ្លងកាត់បាននៅដើមខែមករាឆ្នាំ២០២៥ រហូតមកដល់ពាក់កណ្ដាលខែឧសភាទឹកទន្លេបានចាប់ផ្ដើមហក់ឡើងជាហេតុធ្វើឲ្យស្ពានប្ញស្សី ត្រូវបានប៉ើងអណ្ដែតតាមខ្សែទឹកហូរ នៅព្រឹកថ្ងៃទី២៨ ឧសភា ជាមួយនោះ ក៏បានឲ្យកម្លាំងកម្មករចេញទូកម៉ាស៊ីនទៅ ដើម្បីអូសយកឬស្សីមកដាក់នៅមាត់ច្រាំងត្រើយក្រុងកំពង់ចាម សម្រាប់ទុកប្រើប្រាស់នាពេលខាងមុខ ។
លោកថា ក្នុងអំឡុងកូវីដដែលបានផ្ទុះឡើងនាពេលកន្លងទៅស្ពានប្ញស្សីដែលមានប្រវែងក្រោម១០០០ម៉ែត្រ ត្រូវបានភ្ញៀវជាតិនិងអន្តរជាតិ អាចដើរឆ្លងកាត់បានរហូតដល់ខែកក្កដានោះ តែពេលនេះមិនដូចពីមុនធម្មជាតិមានការប្រែប្រួល ។
ដោយឡែក ភ្ញៀវបរទេសវ័យចំណាស់មកពីទីក្រុងប៉ារីស ប្រទេសបារាំងចំនួនពីរនាក់ ដែលដើរមកដល់មាត់ទន្លេក្បាលស្ពានប្ញស្សីត្រើយក្រុងកំពង់ចាម ពួកគាត់បាននិយាយថា នេះជាលើកទីមួយដែលបានឈានជើងមកស្គាល់ស្ពានឬស្សីសម្រាប់ឆ្លងទៅរមណីយដ្ឋានឆ្នេរខ្សាច់កោះប៉ែន ។ ដោយឃើញទេសភាពស្រស់ស្អាតក៏បានថតរូបតាមទូរសព្ទនិងម៉ាស៊ីនថត ទុកសម្រាប់យកទៅមើលជាមួយនោះ ពួកគាត់ចង់ទៅលេងដោយជិះម៉ូតូឆ្លងកាត់ស្ពានបេតុងកោះប៉ែន ដើម្បីឲ្យស្គាល់ច្បាស់រមណីយដ្ឋានឆ្នេរខ្សាច់កោះប៉ែនម្ដង ។
ពួកគាត់សង្ឃឹមថា នៅពេលវេលាណាមួយ អំណោយផលនិងធ្វើដំណើរមកលេងនៅខេត្តកំពង់ចាមម្ដងទៀតព្រោះមានតំបន់រមណីយដ្ឋានជាច្រើនកន្លែង ។
ចែករំលែកព័តមាននេះ