ទីក្រុង​ហ្សា​ការ​តា ៖ រដ្ឋមន្ត្រី​សម្របសម្រួល​កិច្ចការ​សេដ្ឋកិច្ច​ប្រទេស​ឥណ្ឌូ​ណេ​ស៊ី លោក Airlangga Hartarto បាន​ថ្លែងប្រាប់​ទីភ្នាក់ងារសារព័ត៌មាន AFP នៅ​ថ្ងៃ​ទី​៩ ខែកក្កដា ឆ្នាំ​២០២៥ ថា ក្រុមហ៊ុន​ប្រេង​រដ្ឋ និង​បណ្តា​ក្រុមហ៊ុន​កសិកម្ម​របស់​ឥណ្ឌូ​ណេ​ស៊ី បាន​ចុះហត្ថលេខា​លើ​កិច្ចព្រមព្រៀង​បង្កើន​ការ​ទិញ​ផលិតផល​របស់​សហរដ្ឋអាមេរិក ដែល​ជា​កិច្ច​ខិតខំ​ប្រឹងប្រែង​របស់​ទីក្រុង​ហ្សា​ការ​តា ដើម្បី​ចៀសវាង​ការ​យកពន្ធ​កម្រិត​ខ្ពស់​បំផុត​របស់​ប្រធានាធិបតី​អា​មេ​រិ​ក លោក ដូ​ណា​ល់ ត្រាំ (Donald Trump)​។

ឥណ្ឌូ​ណេ​ស៊ី ដែល​ជា​ប្រទេស​សេដ្ឋកិច្ច​ដ៏​ធំ​បំផុត​របស់​អាស៊ី​អាគ្នេយ៍​បាន​សន្យា​ថា នឹង​បង្កើន​ការ​នាំ​ចូល​ផលិតផល​កសិកម្ម ថាមពល និង​ទំនិញ​ផ្សេង​ទៀត ដើម្បី​បិទ​គម្លាត​ពាណិជ្ជកម្ម​ជាមួយ​អា​មេ​រិ​ក ហើយ​កាលពីដើម​ស​ប្តា​ហ៍​នេះ ភាគី​ទាំង​ពីរ​បាន​ឈាន​ដល់​កិច្ចព្រមព្រៀង​តម្លៃ ១,២៥​ពាន់​លាន​ដុល្លារ​អា​មេ​រិ​ក ដើម្បី​ទិញ​ស្រូវ​សាលី​បន្ថែម​ទៀត​ពី​អា​មេ​រិ​ក​។

លោក ត្រាំ បាន​គំរាមកំហែង​ឥណ្ឌូ​ណេ​ស៊ី​ជាមួយ​ពន្ធ​កម្រិត​ខ្ពស់​ចំនួន ៣២% ពីលើ​ពន្ធ​មូលដ្ឋាន ១០% ប្រសិនបើ​ឥណ្ឌូ​ណេ​ស៊ី​មិន​អាច​សម្រេច​បាន​កិច្ចព្រមព្រៀង​ពាណិជ្ជកម្ម​ថ្មី ត្រឹម​ថ្ងៃ​ទី​១ ខែសីហា ឆ្នាំ​២០២៥​។ លោក Airlangga Hartarto ដែល​បាន​ធ្វើ​ដំណើរ​ទៅ​កាន់​ទីក្រុង​វ៉ា​ស៊ី​ន​តោន សម្រាប់​កិច្ច​ពិភាក្សា​ពាណិជ្ជកម្ម​បាន​ថ្លែង​ថា ក្រុមហ៊ុន​ប្រេង​រដ្ឋ Pertamina បាន​ចុះហត្ថលេខា​លើ​អនុស្សរណៈ​នៃ​ការ​យោគយល់​គ្នា (MoU) ដោយ​សន្យា​ទិញ​ថាមពល​រួម​មាន ឧស្ម័ន​ឥន្ធនៈ​រាវ (LPG) ប្រេងសាំង និង​ប្រេង​ឆៅ​ពី​អា​មេ​រិ​ក​បន្ថែម​ទៀត ដោយ​មិន​បាន​ផ្តល់​ព័ត៌មាន​លម្អិត​បន្ថែម​ទៀត​នោះ​ទេ​។ នេះ​បើ​តាម​ការ​ចេញផ្សាយ​ពី AFP និង Reuters​។

ក្រុមហ៊ុន​កសិកម្ម Sorini Agro Asia Corporindo ដែល​ជា​សមាជិក​នៃ​សមាគម​រោង​ម៉ាស៊ីន​ពោត​របស់​ឥណ្ឌូ​ណេ​ស៊ី និង​ក្រុមហ៊ុន FKS Group ក៏​បាន​ចុះហត្ថលេខា MoU ដើម្បី​បង្កើន​ការ​ទិញ​ផលិតផល​តម្រូវការ​របស់​ពួក​គេ​ផង​ដែរ​។ ទោះ​យ៉ាងណា​ក៏​ដោយ លោក Airlangga Hartarto មិន​បាន​បង្ហាញ​ពី​តម្លៃ​នៃ​កិច្ចព្រមព្រៀង​ដែល​បាន​ចុះហត្ថលេខា​នៅ​ឯ​ទីក្រុង​វ៉ា​ស៊ី​ន​តោន​នោះ​ទេ ប៉ុន្តែ​កាលពី​ស​ប្តា​ហ៍​មុន​លោក​បាន​ប្រាប់​អ្នក​សារព័ត៌មាន​ថា អាជីវកម្ម​ឥណ្ឌូ​ណេ​ស៊ី​នឹង​ធ្វើការ​ប្តេជ្ញា​ចិត្ត​លើ​ការ​ចំណាយ​សរុប​ដែល​មាន​តម្លៃ​៣៤​ពាន់​លាន​ដុល្លារ​អា​មេ​រិ​ក​។

បើ​តាម​ទិន្នន័យ​ចេញពី​ការិយាល័យ​តំណាង​ពាណិជ្ជកម្ម​អា​មេ​រិ​កបាន​បង្ហាញ​ថា ឱនភាព​ពាណិជ្ជកម្ម​ទំនិញ​របស់​សហរដ្ឋអាមេរិក​ជាមួយ​ឥណ្ឌូ​ណេ​ស៊ី​មាន​ចំនួន ១៧,៩​ពាន់​លាន​ដុល្លារ​ក្នុង​ឆ្នាំ​2024 Bol​កើនឡើង ៥,៤% បើ​ធៀប​នឹង​ឆ្នាំ​មុន​៕