រាជធានីភ្នំពេញ ៖ ស្ថាបនិកក្រុមហ៊ុនឌីបេសហ្គ្រីនឡងឡាយហ៍(ខេមបូឌា)ឯ.កដែលត្រូវបានសមត្ថកិច្ចឃាត់ខ្លួនពាក់ព័ន្ធនឹងឆបោកប្រជាពលរដ្ឋយកប្រាក់ជិត១៦លានដុល្លារក្រោមរូបភាពដាក់លុយវិនិយោគលើអចលនទ្រព្យបានការប្រាក់ត្រូវបានកម្លាំងនគរបាលព្រហ្មទណ្ឌកំរិតស្រាលនៃស្នងការនគរបាលរាជធានីភ្នំពេញកសាងសំនុំរឿងបញ្ជូនទៅកាន់សាលាដំបូងរាជធានីភ្នំពេញចាត់ការតាមច្បាប់នៅរសៀលថ្ងៃទី ២៤ខែមេសាឆ្នាំ២០២៥នេះ។
ជនសង្ស័យដែលសមត្ថកិច្ចឃាត់ខ្លួនបញ្ជូនទៅកាន់តុលាការរូបនោះឈ្មោះ ទូច សុភាព ភេទប្រុស អាយុ៤២ឆ្នាំ, កាន់អត្តសញ្ញាណប័ណ្ណលេខ ១០១ ៣៧១ ៧៧៦ មានទីលំនៅ បច្ចុប្បន្នភូមិយាយឡ ឃុំត្រាំកក់ ស្រុកត្រាំកក់ ខេត្ត តាកែវ ដែលគេអះអាងថា ជាស្ថាបនិកក្រុមហ៊ុនឌីបេសហ្គ្រីនឡងឡាយហ៍(ខេមបូឌា)ឯ.ក។
គួរបញ្ជាក់ថា បុគ្គលជាស្ថាស្ថាបនិកក្រុមហ៊ុនឌីបេសហ្គ្រីនឡងឡាយហ៍(ខេមបូឌា)ឯ.ករូបនោះត្រូវបានប្រជាពលរដ្ឋប្រមាណ ៤០នាក់បានតាមរកឃើញនិងធ្វើការឡោមព័ទ្ធឃាត់ខ្លួនកាលពីវេលាល្ងាចថ្ងៃទី ២០ខែមេសាឆ្មាំ២០២៥នៅមុខទីស្នាក់ការក្រុមហ៊ុនដែលស្ថិតនៅបុរីភ្នំពេញថ្មី ក្នុងភូមិព្រៃមូល សង្កាត់ក្រាំងធ្នង់ ក្នុងខណ្ឌសែនសុខ រាជធានីភ្នំពេញបន្ទាប់ពីស្ថាបនិកក្រុមហ៊ុនម្នាក់នោះបានឃុបឃិតគ្នាឆរបោកប្រាក់របស់ពួកគាត់អស់រយៈពេលប្រមាណជាង ២ឆ្នាំមកហើយ។
បន្ទាប់ពីឃាត់ខ្លួនក៍បានប្តឹងសមត្ថកិច្ចនគរបាលមូលដ្ឋានដើម្បីឲ្យជួយអន្តរាគមន៍នាំជនសង្ស័យទៅចាត់ការតាមច្បាប់តែសមត្ថកិច្ចមិនអើពើព្រោះគ្មានបទបញ្ជា។
ជននោះត្រូវបានឃាត់ទុកនៅមុខស្នាក់ការ១យប់ដោយមានកម្លាំងសណ្តាប់ធ្នាប់និងនគរបាលយាមដោយក្លាចរត់បាត់ឬមានការប្រើហឹង្សាទៅលើជននោះពីសំណាក់ពលរដ្ឋរងគ្រោះដែលពោរពេញដោយកំហឹង។លុះនៅព្រឹកថ្ងៃទី២១ខែមេសានៅតែពុំត្រូវសមត្ថកិច្ចនាំខ្លួនទៅចាត់ការតាមច្បាប់ឡើយរង់ចាំបញ្ជាពីតុលាការ។
ដោយសារតែពុំមានដំណោះស្រាយនៅវេលាម៉ោង ១រសៀលប្រជាពលរដ្ឋរងគ្រោះក៏បាននាំគ្នាកាន់រូបថតសម្ដេចតេជោ,សម្តេចបវរធិបតី និងរូបថតជនដែលឆបោកព្រមទាំងឯកសារនាំគ្នាបិតផ្លូវដើម្បីទាមទារឲ្យសមត្ថកិច្ចនិងតុលាការជួយអន្តរាគមន៍ដើម្បីនាំខ្លួនជននោះទៅចាត់ការតាមច្បាប់។
បន្ទាប់ពីមានការតវ៉ាទទូចស្នើរសុំឲ្យមានអន្តរាគមន៍នៅវេលាម៉ោង៣ រសៀលថ្ងៃទី ២១ខែមេសាឆ្នាំ ២០២៥ជននោះត្រូវបានលោកវីរៈសេនីយ៍ឯក ហួរ ម៉េងវ៉ាងអធិការនគរបាលខណ្ឌសែនសុខទទួលបញ្ជា ដឹកនាំកម្លាំងចុះទៅនាំខ្លួនបញ្ជូនទៅកាន់ស្នងការដ្ឋាននគរបាលរាជធានីភ្នំពេញដើម្បីចាត់ការតាមច្បាប់។
តាមប្រជាពលរដ្ឋដែលរងគ្រោះបានឲ្យដឹងថា កាលពីកំឡុងឆ្នាំ ២០២២ក្រុមហ៊ុនឌីបេសហ្គ្រីនឡងឡាយហ៍(ខេមបូឌា)ឯ.កមានស្នាក់ការមុនដំបូងនៅសង្កាត់ស្នោ ខណ្ឌ កំបូល រាជធានីភ្នំពេញ ដែលមានលោកដេង ប៊ុនលីនជាអគ្គនាយកក្រុមហ៊ុន,លោកទូច សុភាពជាស្ថាបនិកក្រុមហ៊ុននិងលោកម៉ៅ ជាតិតា ជាប្រធានទីផ្សារនិងបានអូសទាញឆរបោកដោយឲ្យពួកគាត់ទិញដីនិងដាក់លុយដើម្បីវិនិយោគអចលនទ្រព្យដោយបានការប្រាក់ ៥%។ដោយមានការជឿទុកចិត្ត ពលរដ្ឋក៏បាននាំគ្នាប្រមូលលុយខ្លះខ្ចីលុយធនាគារ យកលុយខ្លះ៥ពាន់ដុល្លា ខ្លះ១ម៉ឺន ២ម៉ឺន រហូតទៅដល់ខ្លះជាង ១០ម៉ឺនដុល្លារក៍មានបានយកលុយមកវិនិយោគជាមួយក្រុមហ៊ុនដើម្បីយកការប្រាក់។នៅក្នុងការវិនិយោគនោះដោយមានកិច្ចសន្យាត្រឹមត្រូវ។
ប្រជាពលរដ្ឋរងគ្រោះបានឱ្យដឹងទៀតថា នៅពេលដាក់លុយបានការប្រាក់ ខ្លះបានពីរ បីខែ ខ្លះរហូតដល់ ១០ខែស្រាប់តែក្រុមហ៊ុនបានរើទីស្នាក់ការវិចបង្វិចរត់បាត់។ក្រោយមកទើបដឹងថា ក្រុមហ៊ុនគេចមកនៅខណ្ឌសែនសុខក៏បាននាំគ្នាមកព័ទ្ធចាប់ស្ថាបនិកក្រុមហ៊ុនឆបោករូបនោះតែម្តង។
តាមប្រជាពលរដ្ឋរងគ្រោះបានឱ្យដឹងទៀតថា ប្រជាពលរដ្ឋដែលរងគ្រោះប្រមាណ ២០០០នាក់ដែលមានទឹកប្រាក់ចំនួន១៥ ៨៧០ ០០០ដុល្លារដែលបានចាញ់បោកក្រុមហ៊ុនឌីបេសហ្គ្រីនឡងឡាយហ៍(ខេមបូឌា)ឯ.កនេះ។
ទោះបីជាយ៉ាងណាបន្ទាប់ពីឃាត់ខ្លួនបញ្ជូនទៅកាន់ស្នងការនគរបាលរាជធានីភ្នំពេញមានប្រជាពលរដ្ឋរងគ្រោះចំនួន៥៣នាក់ក្នុងនោះមានចំនួន៧៦ឯកសារមានទឹកប្រាក់ប្រមាណជាង៧០ម៉ឺនដុល្លារបានទៅដាក់ពាក្យបណ្តឹងជាថ្មីដោយមានតំណាងចំនួន៥នាក់។
តាមតំណាងប្រជាពលដ្ឋរងគ្រោះក៍បានអោយដឹងទៀតថា នៅមានជនរងគ្រោះជាច្រើនទៀតបានមកដាក់ពាក្យបណ្តឹងជាបន្តបន្ទាប់ទៀត៕
ខាងក្រោមនេះជាអត្ថបទពាក់ព័ន្ធ ៖
ក្រុមហ៊ុនប្រមូលបានប្រាក់ជិត១៦លានដុល្លារ ពលរដ្ឋនាំគ្នាចា.ប់ខ្លួនស្ថាបនិកក្រុមហ៊ុនបោ.ក
បុគ្គលម្នាក់ជាស្ថាបនិកក្រុមហ៊ុនឆបោ.កប្រាក់ជិត១៦លានដុល្លារ ត្រូវចា.ប់ខ្លួនហើយ
ចែករំលែកព័តមាននេះ