ខេត្តកំពង់ចាម ៖ ដោយមានការយកចិត្តទុកដាក់ពីតំណាងអយ្យការអមសាលាដំបូងខេត្តក៏ដូចជាលោកឧត្តមសេនីយ៍ទោ ហេង វុទ្ធី ស្នងការនគរបាលខេត្ត បានឱ្យកម្លាំងសមត្ថកិច្ចនៅក្នុងមូលដ្ឋានឃុំស្ដើងជ័យ ស្រុកជើងព្រៃ បន្តយកចិត្តទុកដាក់ស្រាវជ្រាវវែកមុខក្រុមចោរសកម្មល្បីខាងលួចគ្រាប់ស្វាយចន្ទី ។…
ខេត្តកំពង់ចាម ៖ ដោយមានការយកចិត្តទុកដាក់ពីតំណាងអយ្យការអមសាលាដំបូងខេត្តក៏ដូចជាលោកឧត្តមសេនីយ៍ទោ ហេង វុទ្ធី ស្នងការនគរបាលខេត្ត បានឱ្យកម្លាំងសមត្ថកិច្ចនៅក្នុងមូលដ្ឋានឃុំស្ដើងជ័យ ស្រុកជើងព្រៃ បន្តយកចិត្តទុកដាក់ស្រាវជ្រាវវែកមុខក្រុមចោរសកម្មល្បីខាងលួចគ្រាប់ស្វាយចន្ទី ។ លួចនេះ គឺលួចធ្វើមានបាន រហូតសង់ផ្ទះនៅទៀតផង ។ ទីបំផុតនារសៀលថ្ងៃទី២២ មេសា ឆ្នាំ២០២៥ ក្រោមការតាមប្រមាញ់របស់កម្លាំងជំនាញបានឃាត់ខ្លួនជនសង្ស័យជាចោរទី២ដែលមកភូមិរបស់ខ្លួនវិញត្រូវចាប់តាមដីកាមកកាន់អធិការដ្ឋាននគរបាលស្រុកជើងព្រៃដើម្បីសួរនាំ និងចាត់ការតាមច្បាប់ ដើម្បីថ្ងៃក្រោយឱ្យក្លាយជាមនុស្សល្អ កុំឱ្យខូចឈ្មោះស្រុកជើងព្រៃពេក ។
ប្រភពពីសមត្ថកិច្ចមូលដ្ឋានបានឲ្យដឹងថា កាលពីថ្ងៃទី១៧ ខែមេសា ឆ្នាំ២០២៤ នៅ ជំនាញអធិការដ្ឋាននគរបាលស្រុកជើងព្រៃ បានបង្ក្រាបឃាត់ខ្លួនជនសង្ស័យ១នាក់ ពាក់ព័ន្ធករណីលួច(គ្រាប់ស្វាយចន្ទី) ចំណុចចម្ការស្វាយចន្ទី ស្ថិតក្នុងភូមិស្តើងជ័យ ឃុំស្តើងជ័យ ស្រុកជើងព្រៃ ខេត្តកំពង់ចាមហើយជំនាញបានកសាងសំណុំរឿងបញ្ជូនទៅតុលាការ និងសម្រេចឃុំខ្លួនជនសង្ស័យខាងលើរួចហើយ ។ ក្នុងករណីនេះដែរ នៅថ្ងៃទី២២ ខែមេសា ឆ្នាំ២០២៥ មុខសញ្ញសេសសល់ក្នុងសំណុំរឿង១នាក់ទៀតឈ្មោះ ទឹង រតនា ហៅពាង ភេទប្រុស អាយុ២១ឆ្នាំ មានទីលំនៅភូមិស្តើងជ័យ ឃុំស្តើងជ័យ ស្រុកជើងព្រៃ ដែលបានចូលមកក្នុងមូលដ្ឋានវិញ ជំនាញបានធ្វើការទំនាក់ទំនងជាមួយសាលាដំបូងខេត្តកំពង់ចាម ចេញដីកាបង្គាប់ឱ្យចាប់ខ្លួន និងបានឃាត់ខ្លួនឈ្មោះ ទឹង រតនា ហៅ ពាង ស្របតាមច្បាប់ ។
សមត្ថកិច្ចមូលដ្ឋានបន្តឲ្យដឹងទៀតថា ចំពោះជនទី២ឈ្មោះ ពាងនេះ ក្រោយពីបានផ្លោះរបងបេតុងចូលលួចគ្រាប់ស្វាយចន្ទីរបស់អ្នកដទៃនៅក្នុងភូមិកាលពីថ្ងៃទី១៧ មេសា ២០២៥ ត្រូវបានក្រុមសន្តិសុខដែលយាមនៅទីនោះនាំគ្នាដេញចាប់ភ្លាមៗបានម្នាក់ ។ ចំណែកបក្ខពួក២នាក់បានរត់គេចខ្លួនចេញពីមូលដ្ឋានមិនដឹងសម្ងំនៅទីណានោះទេ ។ ពាក្យចាស់ថា ជង់មិនដែលភ្លេចកុកទេ មកដល់ថ្ងៃទី២២ មេសា ២០២៥ ជនសង្ស័យចោរលួចគ្រប់រដូវស្វាយចន្ទី ឈ្មោះ ពាង បានលបចូលមកភូមិវិញត្រូវបានកម្លាំងជំនាញដឹងក៏ចាប់ខ្លួនតាមដីកាតែម្ដង ។ សូមបញ្ជាក់ថា ជនទីពីរគឺមានផ្ទះនៅចម្ងាយពីបក្ខពួកជនទី១ប្រមាណ១០០០ម៉ែត្រប៉ុណ្ណោះ ។
គួររំលឹកថា តាមប្រភពអ្នកមើលការខុសត្រូវក្នុងចម្ការស្វាយចន្ទីបានរៀបរាប់ឲ្យដឹងនាព្រឹកថ្ងៃទី១៨ មេសា ២០២៥ថា មានមុខសញ្ញាក្រុមចោរល្បីខាងលួចស្វាយចន្ទីបាននាំគ្នាមកចូលលួចក្នុងចម្ការ ដោយមិនខ្លាចរអែងអ្នកណានោះទេ ។ សកម្មភាពនេះបានកើតឡើងនារសៀលថ្ងៃទី១៧ មេសា ឆ្នាំ២០២៥ ហើយត្រូវបានក្រុមអ្នកមើលការខុសត្រូវជាច្រើននាក់ បាននាំគ្នារត់ដេញតាមចាប់ក្រុមចោរទាំងបីនាក់ ។ ដោយសារតែរាងឆ្ងាយផងនោះធ្វើឲ្យមុខសញ្ញាពីរនាក់ផ្លោះរបងថ្មរត់គេចខ្លួនបាត់ ចំណែកម្នាក់ទៀតគ្រាន់តែផ្លោះរបងបានបន្តិចក៏ត្រូវជាប់អន្ទាក់ គឺឈ្មោះ ជិន រី អាយុ១៨ឆ្នាំ នៅឃុំស្ដើងជ័យ ស្រុកជើងព្រៃ ដករហូតបានគ្រាប់ស្វាយចន្ទី១បាវមានទម្ងន់ជិត២០គីឡូក្រាម បន្ទាប់មកក៏បានទូរស័ព្ទហៅប៉ុស្តិ៍រដ្ឋបាលមូលដ្ឋាន ឲ្យមកទទួលយកមុខសញ្ញានេះបញ្ជូនទៅកាន់អធិការដ្ឋាននគរបាលស្រុកជើងព្រៃដើម្បីអនុវត្តន៍ច្បាប់ ។
ប្រភពដដែលបានបន្តថា កាលពីបីបួនឆ្នាំមុនគ្រាដែលមិនទាន់មានរបងព័ទ្ធជុំវិញនោះមិនថាថ្ងៃឬយប់នោះទេ ដោយក្រុមចោរតែងតែនាំគ្នាចូលមកធ្វើសកម្មភាពលួចស្វាយចន្ទីជាញឹកញាប់ ដែលធ្វើឲ្យការប្រមូលផល គឺមានការធ្លាក់ចុះស្ទើរទាំងស្រុង ។ កត្តានេះហើយត្រូវបានម្ចាស់ចម្ការរៀបចំធ្វើរបងបេតុងបានប្រមាណពីរឆ្នាំមកហើយ ជាមួយនោះបានកាត់បន្ថយបទល្មើសសកម្មភាពលួចស្វាយចន្ទីបានមួយផ្នែក ។ តែក្រុមអ្នកមើលការខុសត្រូវបានបន្តតាមដានមិនថាយប់ឬថ្ងៃនោះទេ នាំគ្នាឃ្លាំមើលក្រុមចោរទាំងនោះ ទោះបីដឹងថាពួកចោរមានកាំភ្លើងខ្យល់បាញ់គ្រាប់កង់ក៏ដោយ ។
សូមបញ្ជាក់ថា កន្លងទៅមុខសញ្ញាចោរលួចខ្លះដែលគេប្រើមនុស្សក្រោមអាយុ១៥ឆ្នាំ ឲ្យមកចូលលួចលុះពេលដែលចាប់បានក៏ធ្វើការអប់រំ តែមិនបានរាងចាលនោះទេ ខ្លះបានយកមុខរបរនេះធ្វើអាជីពរហូតដល់មានលុយធ្វើផ្ទះ ។ គិតរហូតមកដល់ព្រឹកថ្ងៃទី១៨ មេសា ២០២៥មុខសញ្ញាជនសង្ស័យដែលជាចោរលួចស្វាយចន្ទីត្រូវបានកម្លាំងសមត្ថកិច្ចកំពុងតែសួរនាំហើយជននេះបានឆ្លើយសារភាពថា កន្លងមករកគេធ្លាប់ធ្វើសកម្មភាពលួចស្វាយចន្ទីបានចំនួន៣លើកមកហើយ ចំពោះចន្ទីដែលលួចបាននោះត្រូវយកទៅលក់ឲ្យឈ្មួញម្នាក់ដែលគេពុំស្គាល់ឈ្មោះ…។ តើឈ្មួញមួយណាជាអ្នកចាំទិញ ? សមត្ថកិច្ចកំពុងតាមប្រមាញ់បន្តទៀតមិនឱ្យរួចខ្លួនទេ ។
សូមបញ្ជាក់ថា កាលពីមិនទាន់ធ្វើរបងបេតុងក្រុមចោរលួចស្វាយចន្ទី គឺមានគ្នាច្រើននាក់ លុះពេលដែលក្រុមសន្តិសុខចាប់បានគឺជាអនីតិជន ដោយបានធ្វើការអប់រំជាញឹកញាប់ លុះពេលលើកក្រោយមកធ្វើសកម្មភាពលួចបន្តទៀតឥតល្ហែគឺមុខដដែលៗ មិនរាងចោលទាល់តែសោះ ។ មានពេលខ្លះក្រុមសន្តិសុខបានឃើញចោរលួចស្វាយចន្ទីពេលដែលរត់ដេញចាប់ពីក្រោយ គឺក្រុមចោរទាំងនោះមានប្រើកាំភ្លើងខ្យល់បាញ់គ្រាប់កង់ បើគេចមិនទាន់ទេ ត្រូវលើរាងកាយអាចបង្ករបួសធ្ងន់ធ្ងរឬស្លាប់ក៏ថាបាន ។ ហេតុដូច្នេះហើយដោយសារតែបាត់ទិន្នផលចន្ទីច្រើនពេក ទើបធ្វើរបងបេតុងបិទដើម្បីការពារក្រុមចោរ ទោះជាយ៉ាងណាក៏បានកាត់បន្ថយមួយផ្នែកធំផងដែរ ។
កោះសន្តិភាពនៅចាំមើលស្នាដៃសមត្ថកិច្ចស្រុកជើងព្រៃ ត្រូវតែចាប់ខ្លួនឈ្មួញប្រមូលទិញពីចោរឱ្យបាន ទើបអាចលុបបំបាត់បាននូវបទល្មើសលួចក្នុងភូមិស្រុក មិនឱ្យស្រុកជើងព្រៃល្បីឈ្មោះចោរកើតច្រើនពេក ៕
ចែករំលែកព័តមាននេះ