ខេត្តឧត្តរមានជ័យ ៖ មីនតោន១គ្រាប់ដែលកប់ក្នុងដី និងត្រូវបានគេដឹងថា គ្រាប់មីនសល់កាលពីសម័យសង្គ្រាមក្នុងទសវត្សទី៨០បានផ្ទុះលាន់ឮកក្រើកដី ខណៈត្រាក់ទ័រ១គ្រឿងកំពុងតែភ្ជួរដីចម្ការ បណ្តាលឲ្យបុរសម្នាក់រងរបួសយ៉ាងធ្ងន់ធ្ងរ ត្រូវបានបញ្ជូនទៅសង្គ្រោះនៅមន្ទីរពេទ្យបង្អែកស្រុកអន្លង់វែង រួចបន្តបញ្ជូនទៅសង្គ្រោះនៅមន្ទីរពេទ្យបង្អែកខេត្តសៀមរាប ដោយសារតែស្ថានភាពរបួសធ្ងន់ធ្ងរ…
ខេត្តឧត្តរមានជ័យ ៖ មីនតោន១គ្រាប់ដែលកប់ក្នុងដី និងត្រូវបានគេដឹងថា គ្រាប់មីនសល់កាលពីសម័យសង្គ្រាមក្នុងទសវត្សទី៨០បានផ្ទុះលាន់ឮកក្រើកដី ខណៈត្រាក់ទ័រ១គ្រឿងកំពុងតែភ្ជួរដីចម្ការ បណ្តាលឲ្យបុរសម្នាក់រងរបួសយ៉ាងធ្ងន់ធ្ងរ ត្រូវបានបញ្ជូនទៅសង្គ្រោះនៅមន្ទីរពេទ្យបង្អែកស្រុកអន្លង់វែង រួចបន្តបញ្ជូនទៅសង្គ្រោះនៅមន្ទីរពេទ្យបង្អែកខេត្តសៀមរាប ដោយសារតែស្ថានភាពរបួសធ្ងន់ធ្ងរ ។
ហេតុការណ៍នេះ កើតឡើងនៅក្នុងដីចម្ការមួយកន្លែង ចំណុចចង្អូរថ្មក្នុងភូមិអូរជីក ឃុំផ្អាវ ស្រុកត្រពាំងប្រាសាទ ខេត្តឧត្តរមានជ័យ ។ តាមប្រភពព័ត៌មានឱ្យដឹងថា ការកិនមីនផ្ទុះនេះ បានកើតឡើងនៅវេលាម៉ោង៩ព្រឹក ថ្ងៃទី២៣ ខែមេសា ឆ្នាំ២០២៥ ។
ជនរងគ្រោះឈ្មោះ ហែម សុកៅ ភេទប្រុស អាយុ២៥ឆ្នាំ រងរបួសធ្ងន់ រស់នៅភូមិស្វាយចេក ឃុំថ្លាត ស្រុកអន្លង់វែង ខេត្តឧត្តរមានជ័យ ។
យោងតាមប្រភពពីអាជ្ញាធរមូលដ្ឋាន ដែលជាអតីតខ្មែរក្រហមម្នាក់បានឲ្យដឹងថា តំបន់ជាយដែនកម្ពុជា-ថៃនេះ ក្នុងអំឡុងឆ្នាំ១៩៩៦ និង១៩៩៧ ក្រុមទាហានខ្មែរក្រហម បានដាក់បង្កៃគ្រាប់មីនជាច្រើនប្រភេទ ដើម្បីការពារក្រុមទាហានខាងរដ្ឋកម្ពុជា មិនឱ្យចូលមកកាន់ទីតាំងឈរជើងរបស់ពួកខ្លួន ។
លុះដល់ឆ្នាំ១៩៩៨ ទើបមានសមាហរណកម្មបញ្ចប់សង្គ្រាមស៊ីវិល ខណៈនោះ ទើបគេបានសង្កេតឃើញមានក្រុមអង្កការស៊ីម៉ាក់ចុះដោះគ្រាប់មីនបណ្តើរៗ តែទោះជាបែបណា គ្រាប់មីននៅតែបន្តលាក់ខ្លួន និងផ្ទុះឆក់យកអាយុជីវិតមនុស្សក្មេងចាស់ប្រុសស្រីរហូតមកដល់បច្ចុប្បន្ន ព្រោះមិនដឹងថា ការកប់មីនតោនប្រឆាំងរថក្រោះ និងរថយន្តនេះ កប់នៅទីណាខ្លះទេ ។
គួររម្លឹកថា ករណីផ្ទុះមីនតោននេះ មិនមែនជាលើកទីមួយនោះទេ ដែលករណីនេះ វាបានកើតឡើងជាញឹកញាប់មកហើយសម្រាប់នៅក្នុងខេត្តឧត្តរមានជ័យ ។ នៅតំបន់នេះ មានក្រុមការងារហេឡូត្រាសបានកំពុងរុករក មីនបង្កគ្រោះថ្នាក់ជាបន្តបន្ទាប់ដែរ ៕
ចែករំលែកព័តមាននេះ