រាជធានីភ្នំពេញ ៖ ចាប់បានហើយចោរដែលចូលលួចម៉ាស៊ីនឆូតកាត និងលុយមួយចំនួន ក្នុងហាងលក់ផ្ទាំងវត្ថុអនុស្សាវរីយ៍នៅក្នុងសង្កាត់ចតុមុខ ។ ការចុះចាប់ខ្លួននេះដែរ បានធ្វើឡើង កាលពីវេលាម៉ោង០២រសៀលថ្ងៃទី២៣ ខែមេសា…
រាជធានីភ្នំពេញ ៖ ចាប់បានហើយចោរដែលចូលលួចម៉ាស៊ីនឆូតកាត និងលុយមួយចំនួន ក្នុងហាងលក់ផ្ទាំងវត្ថុអនុស្សាវរីយ៍នៅក្នុងសង្កាត់ចតុមុខ ។ ការចុះចាប់ខ្លួននេះដែរ បានធ្វើឡើង កាលពីវេលាម៉ោង០២រសៀលថ្ងៃទី២៣ ខែមេសា ឆ្នាំ២០២៥ នៅចំណុចបន្ទប់ជួលគ្មានលេខជាន់ទី០៤ ក្នុងសង្កាត់ផ្សារថ្មីទី០២ ខណ្ឌដូនពេញ រាជធានីភ្នំពេញ ។
លោកវរសេនីយ៍ឯក ទៀង ចាន់សា អធិការខណ្ឌដូនពេញបានអោយដឹងថា មានជនសង្ស័យម្នាក់បានចូលទៅគាស់ហាងលក់ផ្ទាំងគំនូរ និងវត្ថុអនុស្សាវរីយ៍ យីហោ «LyLy Shop Art Painting » លួចយកសម្ភារដូចជាម៉ាស៊ីនឆូតកាត និងលុយមួយចំនួន ។
លុះព្រឹកឡើងថ្ងៃដដែល ជនរងគ្រោះបានបាត់សម្ភារ រួចក៏ឆែកមើលកាមេរ៉ាសុវត្ថិភាព ក៏ឃើញជនសង្ស័យធ្វើសកម្មភាពលួច ។ ខណៈនោះ ជនរងគ្រោះបានរត់ទៅដាក់ពាក្យបណ្តឹងនៅប៉ុស្តិ៍នគរបាលរដ្ឋបាលសង្កាត់ចតុមុខ ដើម្បីអោយសមត្ថកិច្ចស្រាវជ្រាវតាមយកមុខសញ្ញាមកផ្តន្ទាទោស ។
លោកអធិការបន្តថា ក្រោយទទួលពាក្យបណ្តឹងពីជនរងគ្រោះ លោកបានអោយកម្លាំងជំនាញស្រាវជ្រាវរហូតស្វែងរកឃើញជនសង្ស័យកំពុងពួនសំងំលាក់ខ្លួននៅចំណុចបន្ទប់ជួលគ្មានលេខជាន់ទី០៤ នៅក្រោយអតីតរោងកុនលុច្ស ។
ភ្លាមៗ កម្លាំងជំនាញបានចុះទៅបង្ក្រាបចាប់ខ្លួនបាននៅនឹងកន្លែងតែម្តង ។ ក្រោយកើតហេតុ សមត្ថកិច្ចបាននាំខ្លួនជនសង្ស័យខាងលើទៅកាន់អធិការដ្ឋាននគរបាលខណ្ឌដូនពេញ ដើម្បីចាត់តាមនីតិវិធីច្បាប់ ៕
ចែករំលែកព័តមាននេះ