ខេត្តកណ្តាល ៖ នគរបាលស្រុកកណ្តាលស្ទឹង ចាប់ឃាត់ខ្លួនកូនប្រុសម្នាក់ គ្រាន់តែឪពុកប្រាប់ថាហូបបាយទុកឱ្យកូនខ្លួនផង ស្រាប់តែស្ទុះទៅវាយលោកឪពុកឱ្យរងរបួស រួចហើយទាញកាំបិតផ្គាក់ គំរាមកាប់សម្លាប់ចោលទៀត ។ ហេតុការណ៍ខាងលើនេះបង្កការភ្ញាក់ផ្អើលខាងលើនេះបានកើតឡើងកាលពីវេលាម៉ោង០៦…
ខេត្តកណ្តាល ៖ នគរបាលស្រុកកណ្តាលស្ទឹង ចាប់ឃាត់ខ្លួនកូនប្រុសម្នាក់ គ្រាន់តែឪពុកប្រាប់ថាហូបបាយទុកឱ្យកូនខ្លួនផង ស្រាប់តែស្ទុះទៅវាយលោកឪពុកឱ្យរងរបួស រួចហើយទាញកាំបិតផ្គាក់ គំរាមកាប់សម្លាប់ចោលទៀត ។
ហេតុការណ៍ខាងលើនេះបង្កការភ្ញាក់ផ្អើលខាងលើនេះបានកើតឡើងកាលពីវេលាម៉ោង០៦ និង ០០នាទីព្រឹក ថ្ងៃទី ២២ ខែមេសា ឆ្នាំ ២០២៥ ស្ថិតនៅក្នុងភូមិ ចំបក់ត្រប់ ឃុំ ព្រែករកា ស្រុក កណ្ដាល ស្ទឹង ខេត្ត កណ្ដាល ។
សមត្ថកិច្ចបានឱ្យដឹងថា ជនរងគ្រោះមានឈ្មោះ ឃ្លី ផល្លា ភេទ ប្រុស អាយុ ៦០ឆ្នាំ(ត្រូវ ជាឪពុក បង្កើត) មុខរបរកសិករ រស់នៅភូមិចំបក់ត្រប់ ឃុំ ព្រែករកា ស្រុក កណ្តាលស្ទឹង ខេត្ត កណ្តាល ។ ចំណែកជនសង្ស័យមានឈ្មោះ ឃ្លី ចាន់រ៉ា ភេទ ប្រុស អាយុ២៦ឆ្នាំ(ត្រូវជាកូនបង្កើត) មុខរបរ កសិករ រស់នៅភូមិ ចំបក់ត្រប់ ឃុំ ព្រែករកា ស្រុក កណ្ដាលស្ទឹង ខេត្ត កណ្ដាល និងប្រើប្រាស់គ្រឿងញៀនជាប្រចាំ ។ ក្នុងនោះសមត្ថកិច្ចដកហូតបានវត្ថុតាងរួមមាន ៖ កាំបិតផ្គាក់ដងឬស្សីចំនួន០១ និង កាំបិតបុ័ងតោចំនួន០១ ។
បើយោងតាមប្រភពព័ត៌មានពីជនរងគ្រោះដែលត្រូវជា(ឪពុកបង្កើត)បានបញ្ជាក់ប្រាប់ការងារកោះសន្តិភាពឱ្យដឹងថា នៅថ្ងៃទី២២ ខែ មេសា ឆ្នាំ ២០២៥ វេលាម៉ោង ០៥ និង ៣០ នាទីព្រឹក ជនរងគ្រោះបានភ្ញាក់ពីសម្រាក់នៅក្នុងផ្ទះរបស់ខ្លួន រួចក៏បានដឹកគោដើម្បីយកទៅចងនៅកន្លែងដីវាមួយកន្លែង រួចហេីយត្រឡប់មកផ្ទះវិញ ។
ជនរងគ្រោះជាឪពុកបានបន្តថា បន្ទាប់មកនៅវេលាម៉ោង៦ព្រឹកថ្ងៃដដែល ពេលនោះជនរងគ្រោះក៏ដើរមកដល់ផ្ទះ ស្រាប់តែបានឃើញ ជនសង្ស័យត្រូវជា(កូនបង្កើត) កំពុងតែដួសបាយហូប ហើយពេលនោះជនរងគ្រោះបាននិយាយទៅកាន់ជនសង្ស័យថា « ហ្អែងស៊ីបាយមានទុកសម្លឱ្យកូនហ្អែងអត់ » ។ ពេលនោះជនសង្ស័យក៏ធ្វើដូចជាមិនដឹងមិនឮ រួចក៏ដួសសម្លបាយហូបបន្ត ហើយជនរងគ្រោះបាននិយាយថែមទៀតថា « បើហ្អែងដួសអស់កូនហ្អែងបានអីហូប » ។ ភ្លាមនោះក៏ជនសង្ស័យបានខឹង និង ជនរងគ្រោះស្រាប់តែបោកចានចោល រួចក៏ស្ទុះទៅទាញយកកាំបិតបុ័ងតោ មករកជនរងគ្រោះឃើញដូចនោះ ជនរងគ្រោះមានការភិតភ័យយ៉ាងខ្លាំងក៏រត់គេចខ្លួន តែជំពប់ជើងបណ្តាលឱ្យដួល ស្រាប់តែជនសង្ស័យបានស្ទុះទៅច្របាច់កជនរងគ្រោះ ក៏មានការប្រតាយប្រតប់គ្នាទៅវិញទៅមក ។
ជនរងគ្រោះជាឪពុកបានបន្តទៀតថា ពេលឃើញហេតុការណ៍បែបនោះ ប្រពន្ធ និង កូនប្រុសម្នាក់ទៀតរបស់ជនរងគ្រោះ ទៅជួយជនរងគ្រោះ និងបាននាំគ្នាទៅទាញកាំបិតចេញពីដៃជនសង្ស័យ ។ ក្រោយមកក៏ជនសង្ស័យបានដើរទៅកាន់កាំបិតផ្គាក់ រួចស្រែកគំរាមទៅកាន់ជនរងគ្រោះទៀតថា«អញនិងកាប់ហ្អែងចោល» ។
ដោយទ្រាំនិងទង្វើកូនប្រុសមិនបាន ជនរងគ្រោះក៏សម្រេចចិត្តមកដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលព្រែករកា ក្រោយពីបានពាក្យបណ្តឹងភ្លាមៗកម្លាំងនគរបាលស្រុក កណ្តាលស្ទឹង សហការជាមួយកម្លាំងនគរបាលប៉ុស្តិ៍រដ្ឋបាលព្រែករកា ចុះទៅធ្វើការឃាត់ខ្លួនជនសង្ស័យខាងលើ ដើម្បីមកសួរនាំ ។
បច្ចុប្បន្នជនសង្ស័យខាងលើរួមទាំងវត្ថុតាង ត្រូវបាននគរបាលស្រុកកណ្តាលស្ទឹង កំពុងកសាងសំណុំរឿងបញ្ជូនទៅតុលាការដើម្បីចាត់ការតាមនីតិវិធីច្បាប់ ៕
ចែករំលែកព័តមាននេះ