នាយករដ្ឋមន្ត្រីថៃមកដល់កម្ពុជា
- ភ្នំពេញ
នាយករដ្ឋមន្ត្រីថៃ លោកស្រី ផៃថងថាន ស៊ីណាវ៉ាត្រា បានមកដល់កម្ពុជា ដើម្បីបំពេញទស្សនកិច្ចនៅកម្ពុជា ពីរថ្ងៃ ចាប់ពីថ្ងៃទី២៣ ដល់២៤ ខែមេសា…
នាយករដ្ឋមន្ត្រីថៃ លោកស្រី ផៃថងថាន ស៊ីណាវ៉ាត្រា បានមកដល់កម្ពុជា ដើម្បីបំពេញទស្សនកិច្ចនៅកម្ពុជា ពីរថ្ងៃ ចាប់ពីថ្ងៃទី២៣ ដល់២៤ ខែមេសា ។
ទាំងកម្ពុជា និងថៃ បានប្រកាសថា លោកស្រី ផៃថងថាន នឹងមកបំពេញទស្សនកិច្ចជាថ្មីនៅកម្ពុជា នៅថ្ងៃពុធ និងថ្ងៃព្រហស្បតិ៍ តាមការអញ្ជើញរបស់នាយករដ្ឋមន្ត្រីកម្ពុជា សម្តេចធិបតី ហ៊ុន ម៉ាណែត ។
អ្នកនាំពាក្យរដ្ឋាភិបាលថៃ លោក ជីរ៉ាយុ ហោងសាប់ (Jirayu Houngsub) បានឲ្យដឹងថា លោកស្រីនឹងចូលជួបសម្តេចធិបតី នៅវិមានសន្តិភាពការិយាល័យនាយករដ្ឋមន្ត្រីកម្ពុជា ហើយនឹងរៀបចំកិច្ចប្រជុំពេញអង្គជាមួយសមភាគីកម្ពុជារបស់លោកស្រី ។
លោកបានបន្តថា ក្នុងអំឡុងកិច្ចប្រជុំនៅទីស្តីការនាយករដ្ឋមន្ត្រី នាយករដ្ឋមន្ត្រីទាំងពីរនឹងរួមគ្នាធ្វើជាអធិបតី ក្នុងពិធីសម្ពោធនិមិត្តសញ្ញាផ្លូវការ រំលឹកខួបលើកទី៧៥ នៃទំនាក់ទំនងការទូតកម្ពុជា-ថៃ ។
លោកបានបន្តថា នាយករដ្ឋមន្ត្រីទាំងពីរក៏នឹងធ្វើជាសាក្សីក្នុងការចុះហត្ថលេខាលើឯកសារសំខាន់ៗមួយចំនួនរវាងរដ្ឋាភិបាលទាំងពីរ ក្រៅពីនោះលោកស្រីក៏នឹងចូលជួបសម្តែងការគួរសមជាមួយប្រធានព្រឹទ្ធសភា សម្តេចតេជោ ហ៊ុន សែន ប្រធានរដ្ឋសភាសម្តេច ឃួន សុដារី និងព្រះករុណា ព្រះបាទសម្តេចព្រះបរមនាថ នរោត្តម សីហមុនី ៕
ចែករំលែកព័តមាននេះ