ទីក្រុងវ៉ាស៊ីនតោន៖ អាមេរិកចាប់ផ្ដើមពង្រឹងកម្លាំងនុយក្លេអ៊ែររបស់ខ្លួនស្របពេលដែលសភាពការណ៍ប្រែប្រួលនៅលើពិភពលោក។ ថ្មីៗនេះ អាមេរិកបានវាយតម្លៃឡើងវិញទៅលើសមត្ថភាពនុយក្លេអ៊ែររបស់ខ្លួនដើម្បីត្រៀមខ្លួនដាក់ឱ្យប្រើប្រាស់នៅលើជើងទម្របាញ់គ្រាប់មីស៊ីលអន្តរទ្វីប និងយន្តហោះទម្លាក់គ្រាប់បែកខ្នាតធំ។ អាមេរិកទើបតែធ្វើតេស្តសាកល្បងសមត្ថភាព និងធ្វើសមយុទ្ធយោធាកាលពីដើមខែមេសា។
របាយការណ៍ជាផ្លូវការបង្ហាញថាគិតត្រឹមខែកញ្ញា ឆ្នាំ២០២៣ អាមេរិកមានក្បាលគ្រាប់នុយក្លេអ៊ែរសរុប៣៧៤៨គ្រាប់នៅក្នុងឃ្លាំងរបស់ខ្លួនដែលអាចបំពាក់នៅលើមីស៊ីលអន្តរទ្វីប, មីស៊ីលបាញ់ចេញពីនាវាមុជទឹក, យន្តហោះទម្លាក់គ្រាប់បែកខ្នាតធំ និងយន្តហោះចម្បាំងខ្នាតតូច។ អាមេរិកឧស្សាហ៍ធ្វើតេស្តអាវុធនុយក្លេអ៊ែររបស់ខ្លួនដើម្បីធានាថាខ្លួនបានត្រៀមលក្ខណៈសម្បត្តិរួចរាល់ដើម្បីចេញបេសកកម្ម។
កាលពីខែកុម្ភៈ មីស៊ីលអន្តរទ្វីបឈ្មោះម៉ាយញូតមេនបី (Minuteman III) ដែលអាចបំពាក់ក្បាលគ្រាប់នុយក្លេអ៊ែរត្រូវបានបាញ់សាកល្បងចេញពីរដ្ឋកាលីហ្វ័រញ៉ាហោះរំលងមហាសមុទ្រប៉ាស៊ីហ្វិច។ ប៉ុន្តែកាលណោះ មីស៊ីលនេះមិនបានបំពាក់ក្បាលគ្រាប់នុយក្លេអ៊ែរទេ។ ការបាញ់សាកល្បងនេះចំពេលអាមេរិក និងអ៊ីរ៉ង់កំពុងចរចាគ្នាដើម្បីដោះស្រាយបញ្ហានុយក្លេអ៊ែរ និងចំពេលដែលសភាពការណ៍នៅមជ្ឈិមបូព៌ាកំពុងឡើងកម្ដៅ។
ទន្ទឹមនឹងនោះ ប្រទេសមហាអំណាចដទៃទៀតដូចជារុស្ស៊ី និងចិនក៏មិននៅស្ងៀមដែរ។ ពួកគេកំពុងធ្វើទំនើបកម្មឃ្លាំងអាវុធនុយក្លេអ៊ែររបស់ខ្លួន។ ប្រភពខ្លះថាប្រទេសចិនកំពុងបង្កើនចំនួនក្បាលគ្រាប់នុយក្លេអ៊ែររបស់ខ្លួន។ ម៉្យាងទៀត គ្មានសញ្ញាណាមួយថាកូរ៉េខាងជើងនឹងបោះបង់កម្មវិធីនុយក្លេអ៊ែររបស់ខ្លួនទេ។ ដូច្នេះអាមេរិកមានតែបណ្ដោយទៅតាមដំណើរ និងខិតខំពង្រឹងនុយក្លេអ៊ែររបស់ខ្លួន។
កងទ័ពអាកាសអាមេរិកនៅក្នុងអង្គភាពទី២ និងទី៥បានចូលរួមនៅក្នុងការធ្វើសមយុទ្ធយោធាថ្មីៗនេះដែលប្រើប្រាស់យន្តហោះបេហាសិបពីរ (B-52H)។ សមយុទ្ធយោធាឈ្មោះព្រែរី វីហ្គីលេន (Exercise Prairie Vigilance 25-1) ធ្វើឡើងនៅរដ្ឋដាកូតាខាងជើង (North Dakota)។ កងទ័ពអាកាសអាមេរិកក៏ធ្វើសមយុទ្ធយោធានៅរដ្ឋនេប្រាស់ស្កាផងដែរ (Nebraska)។
សព្វថ្ងៃនេះ អាមេរិកមានយន្តហោះបេហាសិបពីរស៊េរីថ្មីសរុប៧៦គ្រឿងម៉ាកបេហាសិបពីរអេច (B-52H)។ ក្នុងនោះ ៤៦គ្រឿងអាចបំពាក់គ្រាប់មីស៊ីលនុយក្លេអ៊ែរដើម្បីវាយប្រហារនៅលើសមរភូមិ។ អាមេរិកបានបំពាក់រួចជាស្រេចនូវគ្រាប់មីស៊ីលម៉ាយញូតមេនបី (Minuteman III) សរុប៤០០គ្រាប់ដាក់ពង្រាយនៅកូឡូរ៉ាដូ (Colorado), នេប្រាស់ស្កា (Nebraska), វ៉ាយអូមីង (Wyoming), ដាកូតាខាងជើង (North Dakota) និងម៉ុងតាណា (Montana)។ មីស៊ីលអន្តរទ្វីបរបស់អាមេរិកនេះមានវង់ប្រតិបត្តិការ១៣០០០គីឡូម៉ែត្រ។ នេះបើយោងតាមការដកស្រង់ប្រភពពីទស្សនាវដ្ដីញូស្វីក (Newsweek) និងប្រភពដទៃទៀត៕
ចែករំលែកព័តមាននេះ