នាយករដ្ឋមន្ត្រីថៃ ផ្តើមធ្វើដំណើរទស្សនកិច្ចផ្លូវការនៅកម្ពុជា
- ភ្នំពេញ
រាជធានីភ្នំពេញ ៖ ដូចជាការគ្រោងទុក នៅព្រឹកថ្ងៃពុធ ទី២៣ មេសាឆ្នាំ២០២៥ លោកជំទាវ ផែថងថាន ស៊ីណាវ៉ាត្រ នាយករដ្ឋមន្ត្រីថៃ…
រាជធានីភ្នំពេញ ៖ ដូចជាការគ្រោងទុក នៅព្រឹកថ្ងៃពុធ ទី២៣ មេសាឆ្នាំ២០២៥ លោកជំទាវ ផែថងថាន ស៊ីណាវ៉ាត្រ នាយករដ្ឋមន្ត្រីថៃ និងស្វាមី បានផ្តើមធ្វើដំណើរទស្សនកិច្ចផ្លូវការនៅកម្ពុជា ។
សម្រាប់ដំណើរទស្សនកិច្ចរបស់លោកជំទាវ នាយករដ្ឋមន្ត្រីថៃ និងស្វាមី ត្រូវសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និងភរិយាព្រមទាំងថ្នាក់ដឹកនាំជាន់ខ្ពស់ របស់រាជរដ្ឋាភិបាលជាច្រើនរូបបានទទួលបដិសណ្ឋារកិច្ចនៅវិមានសន្តិភាពយ៉ាងរីករាយរាក់ទាក់ ។
សូមបញ្ជាក់ថា លោកជំទាវ នាយករដ្ឋមន្ត្រីថៃ និងស្វាមី បានអញ្ជើញបំពេញទស្សនកិច្ចផ្លូវការនៅកម្ពុជាចំនួន២ថ្ងៃ ចាប់ពីថ្ងៃទី២៣ ដល់ថ្ងៃទី២៤ ខែមេសា ឆ្នាំ២០២៥ តបតាមការអញ្ជើញរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ។ ទស្សនកិច្ចរបស់ លោកស្រី នាយករដ្ឋមន្ត្រីថៃកើតមានឡើងស្របពេលដែលព្រះរាជាណាចក្រទាំងពីរប្រារព្ធខួបទី៧៥ នៃទំនាក់ទំនងការទូតដែលនឹងពង្រឹងបន្ថែមទៀតនូវចំណង មិត្តភាពជាប្រពៃណី រវាងប្រជាជនទាំងពីរ ។
លោកជំទាវ ផែថងថាន ស៊ីណាវ៉ាត្រ និងស្វាមី នឹងមានព្រះរាជសវនាការជាមួយព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា នៅព្រះបរមរាជវាំង ។ លោកជំទាវ នាយករដ្ឋមន្ត្រី នឹងមានជំនួបសម្តែងការគួរសមដាច់ដោយឡែកជាមួយសម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងសម្តេចមហារដ្ឋសភា ធិការធិបតី ឃួន សុដារី ប្រធានរដ្ឋសភា ។
លើសពីនេះ លោកជំទាវ នាយករដ្ឋមន្ត្រីថៃ និងសម្តេចធិបតី នាយករដ្ឋមន្ត្រីនៃព្រះរាជាណាចក្រកម្ពុជា នឹងមានជំនួបទ្វេភាគី ដើម្បីពិភាក្សាពីការកំណត់ទិសដៅសកម្មភាព ក្នុងការធ្វើឱ្យកាន់តែស៊ីជម្រៅ និងពង្រីកបន្ថែមទៀតនូវកិច្ចសហប្រតិបត្តិការដែលមានផលប្រយោជន៍ទៅវិញទៅមក ។
នៅចុងបញ្ចប់ នៃជំនួបថ្នាក់ដឹកនាំទាំងពីរក៏នឹងធ្វើជាសាក្សីនៅក្នុងពិធីចុះហត្ថលេខាលើឯកសារស្តីពីកិច្ចសហប្រតិបត្តិការទ្វេភាគីលើវិស័យផ្សេងៗមួយចំនួនផងដែរ ។
សូមបញ្ជាក់ថា ទស្សនកិច្ចរបស់លោកស្រី នាយករដ្ឋមន្ត្រីថៃ កើតមានឡើងស្របពេលដែលព្រះរាជាណាចក្រទាំងពីរប្រារព្ធខួបទី៧៥ នៃទំនាក់ទំនងការទូតដែលនឹងពង្រឹងបន្ថែម ទៀតនូវចំណងមិត្តភាពជា ប្រពៃណីរវាងប្រជាជនទាំងពីរ ៕
ចែករំលែកព័តមាននេះ