ទីក្រុងប៉េកាំង៖ ថ្ងៃនេះ ប្រទេសចិនមានសារនយោបាយសំខាន់មួយសម្រាប់រដ្ឋាភិបាលរបស់លោកត្រាំនៅពេលសង្គ្រាមពាណិជ្ជកម្មបន្តកើតឡើង។ ឆ្លើយតបទៅនឹងការទន្ទឹងរង់ចាំយ៉ាងអន្ទះសាឱ្យរដ្ឋាភិបាលប្រទេសចិនបោះដៃទៅវ៉ាស៊ីនតោនដើម្បីចរចាគ្នា ប្រទេសចិនយល់ថាអាមេរិកគួរណាស់បញ្ឈប់ការប្រើប្រាស់យុទ្ធវិធីគំរាមកំហែង និងបង្ខិតបង្ខំឱ្យប្រទេសដទៃធ្វើអ្វីទៅតាមការចង់បានរបស់ខ្លួន ប្រសិនបើអាមេរិកពិតជាចង់បានកិច្ចព្រមព្រៀងពាណិជ្ជកម្មមែន។
ការថ្លែងដូចខាងលើនេះធ្វើឡើងតាមរយៈក្រសួងការបរទេសចិនខណៈដែលលោកត្រាំនៅតែមានសុទិដ្ឋិនិយមថាអាមេរិក និងចិនគង់តែសម្រេចបានកិច្ចព្រមព្រៀងនៅថ្ងៃណាមួយជាមិនខានឡើយ។ កាលពីយប់មិញ ត្រាំក៏បានបង្ហើបឱ្យដឹងផងដែរថាពន្ធគយដែលដាក់ទៅលើទំនិញរបស់ចិន១៤៥%នោះមិនប្រាកដជាមានកម្រិតខ្ពស់បែបនេះជារៀងរហូតនោះទេ។ សំខាន់ឱ្យតែមានកិច្ចព្រមព្រៀងជាមួយគ្នា លោកនឹងបញ្ចុះអត្រាពន្ធមកកម្រិតទាបជាងនេះឆ្ងាយណាស់។
អ្នកនាំពាក្យក្រសួងការបរទេសចិន លោកគួជាឃុន (Guo Jiakun) ចោទប្រកាន់ថាអាមេរិកនិយាយតែមាត់ថាខ្លួនចង់បានកិច្ចព្រមព្រៀង ប៉ុន្តែទន្ទឹមនឹងនោះ ខ្លួននៅតែបន្តដាក់សម្ពាធដល់កម្រិតខ្ពស់បំផុត។ អ្នកនាំពាក្យចិនរូបនេះថ្លែងថានេះមិនមែនជាវិធានការត្រឹមត្រូវដើម្បីដោះស្រាយបញ្ហាជាមួយប្រទេសចិនទេ។ ធ្វើរបៀបហ្នឹងមិនងាយនឹងមានកិច្ចព្រមព្រៀងជាមួយគ្នាឡើយ។
អ្នកនាំពាក្យចិនបានរំលេចឱ្យឃើញថាបើចង់កែលម្អទំនាក់ទំនងប្រកបដោយអត្ថន័យពិតប្រាកដជាមួយប្រទេសចិនលុះត្រាតែអាមេរិកប្រកាន់យកគោលការណ៍គោរពគ្នាទៅវិញទៅមក។ អាមេរិកគួរសន្ទនាគ្នាជាមួយចិនដោយផ្អែកទៅលើគោលការណ៍សមភាព និងគិតទៅដល់ផលប្រយោជន៍គ្នាទៅវិញទៅមក។ លោកស្នើសុំឱ្យទីក្រុងវ៉ាស៊ីនតោនប្រកាន់យកទំនាក់ទំនងស្មើភាព និងបែបស្ថាបនា៕
ចែករំលែកព័តមាននេះ