សហរដ្ឋអាមេរិក ៖ ប្រធានាធិបតីសហរដ្ឋអាមេរិក លោក ដូណាល់ ត្រាំ បានបន្ទន់ជំហរលើសង្គ្រាមពាណិជ្ជកម្មជាមួយប្រទេសចិន បន្ទាប់ពីលោកបានថ្លែងនៅក្នុងសន្និសីទសារព័ត៌មាននៅសេតវិមាននៅថ្ងៃទី២២ ខែមេសា ឆ្នាំ២០២៥…
សហរដ្ឋអាមេរិក ៖ ប្រធានាធិបតីសហរដ្ឋអាមេរិក លោក ដូណាល់ ត្រាំ បានបន្ទន់ជំហរលើសង្គ្រាមពាណិជ្ជកម្មជាមួយប្រទេសចិន បន្ទាប់ពីលោកបានថ្លែងនៅក្នុងសន្និសីទសារព័ត៌មាននៅសេតវិមាននៅថ្ងៃទី២២ ខែមេសា ឆ្នាំ២០២៥ ថា ពន្ធគយខ្ពស់លើទំនិញពីប្រទេសចិននឹងត្រូវកាត់បន្ថយច្រើន ប៉ុន្តែនឹងមិនអាចដល់អត្រាសូន្យនោះទេ។ នេះបើតាមប្រភពពី Reuters, CNN, Bloomberg និង The Guardian បានចេញផ្សាយ។
ការកត់សម្គាល់ថ្មីៗរបស់លោក ត្រាំ ហាក់ដូចជាបង្ហាញពីការបន្ទន់ឥរិយាបថដ៏តឹងតែង និងការសងសឹកទៅវិញទៅមកជាច្រើនសប្តាហ៍លើសង្គ្រាមពន្ធគយរបស់លោក ពិសេសលើប្រទេសចិនដែលរងពន្ធលើសពី ១៤៥%។ លោក ត្រាំ ថ្លែងយ៉ាងដូច្នេះថា «១៤៥% គឺខ្ពស់ណាស់ ហើយវានឹងមិនអាចខ្ពស់បែបនោះទេ។ វានឹងត្រូវកាត់បន្ថយច្រើន ប៉ុន្តែនឹងមិនអាចដល់អត្រាសូន្យនោះទេ»។ លោកបានបន្តថា ប្រទេសចិនចាំបាច់ត្រូវតែធ្វើកិច្ចព្រមព្រៀង ប្រសិនបើពួកគេបន្តចង់ធ្វើជំនួញនៅអាមេរិកទៀត។
លោក ត្រាំ បានដាក់ពន្ធនាំចូលចំនួន ១៤៥% លើទំនិញពីប្រទេសចិន ខណៈទំនិញចិនខ្លះជាប់ពន្ធរហូតដល់ ២៤៥% ឯណោះ។ ជាការឆ្លើយតបប្រទេសចិនបានដាក់ពន្ធសងសឹកចំនួន ១២៥% លើទំនិញរបស់សហរដ្ឋអាមេរិក។ ក្រៅពីចិន លោក ត្រាំ ក៏បានដាក់ពន្ធគយលើប្រទេសជាច្រើនផ្សេងទៀត ដែលបណ្តាលឱ្យទីផ្សារភាគហ៊ុនដាំក្បាលចុះ ហើយអត្រាការប្រាក់កើនឡើងលើបំណុលរបស់អាមេរិក ខណៈដែលអ្នកវិនិយោគព្រួយបារម្ភអំពីកំណើនសេដ្ឋកិច្ចយឺត និងសម្ពាធអតិផរណាខ្ពស់។
ប្រទេសចិននៅមិនបានឆ្លើយតបជាផ្លូវការចំពោះការសន្យារបស់លោក ត្រាំ នៅឡើយនោះទេ ប៉ុន្តែប្រព័ន្ធផ្សព្វផ្សាយមួយចំនួនបានហៅការផ្លាស់ប្តូរថ្មីនេះថា លោក ត្រាំ កំពុង បន្ទន់ជំហរលើគោលនយោបាយពន្ធរបស់លោករួចហើយ។ ទីក្រុងប៉េកាំងធ្លាប់ចង្អុលបង្ហាញនៅដើមខែនេះរួចហើយថា ខ្លួនចង់ឃើញជំហានជាច្រើនពីរដ្ឋបាលលោក ត្រាំ មុនពេលយល់ព្រមលើការពិភាក្សាណាមួយ៕
ចែករំលែកព័តមាននេះ