ការសម្រេចដែលប្រកាសដោយក្រសួងពាណិជ្ជកម្មសហរដ្ឋអាមេរិកមកដល់ឧស្សាហកម្មបន្ទះសូឡាកម្ពុជាអាចនឹងរង្គោះរង្គើដល់ផលិតកម្មបន្ទះសូឡាកម្ពុជាដែលមានតម្លៃប្រមាណជាជាង៨០០លានដុល្លារ ។ ក្រសួងពាណិជ្ជកម្មសហរដ្ឋអាមេរិក កាលពីថ្ងៃទី២១ ខែមេសា ឆ្នាំ២០២៥ បានចេញសេចក្តីសម្រេចចុងក្រោយដោយកំណត់ពន្ធមកលើបន្ទះសូឡានាំចូលពីកម្ពុជា រហូតដល់ទៅជាង៣.៤០០ភាគរយដែលជាការកំណត់ពន្ធខ្ពស់បំផុត ។ ទាក់ទងនឹងការសម្រេចបែបនេះ…
ការសម្រេចដែលប្រកាសដោយក្រសួងពាណិជ្ជកម្មសហរដ្ឋអាមេរិកមកដល់ឧស្សាហកម្មបន្ទះសូឡាកម្ពុជាអាចនឹងរង្គោះរង្គើដល់ផលិតកម្មបន្ទះសូឡាកម្ពុជាដែលមានតម្លៃប្រមាណជាជាង៨០០លានដុល្លារ ។
ក្រសួងពាណិជ្ជកម្មសហរដ្ឋអាមេរិក កាលពីថ្ងៃទី២១ ខែមេសា ឆ្នាំ២០២៥ បានចេញសេចក្តីសម្រេចចុងក្រោយដោយកំណត់ពន្ធមកលើបន្ទះសូឡានាំចូលពីកម្ពុជា រហូតដល់ទៅជាង៣.៤០០ភាគរយដែលជាការកំណត់ពន្ធខ្ពស់បំផុត ។ ទាក់ទងនឹងការសម្រេចបែបនេះ ក្រសួងពាណិជ្ជកម្មកម្ពុជានៅរសៀល ថ្ងៃទី ២២ ខែមេសា ឆ្នាំ២០២៥ បានចេញសេចក្តីប្រកាសព័ត៌មានមួយថា ការចេញសេចក្តីសម្រេចនេះ គឺមិនពាក់ព័ន្ធនឹងការអនុវត្តន៍ពន្ធបដិការរបស់រដ្ឋាភិបាលអាមេរិក ដែលបានប្រកាសកាលពីដើមខែមេសានោះទេ ។
ប្រភពដដែលបានអះអាងថា នេះ គឺជាចំណាត់ការរបស់សហរដ្ឋអាមេរិក នៅក្នុងករណីផ្សេង គឺនៅក្រោមករណីសើបអង្កេតឧបាស្រ័យពាណិជ្ជកម្មលើការលក់បង្ខូចថ្លៃ និងការឧបត្ថម្ភធនលើផលិតផលបន្ទះសូឡា ។ ប្រភពដដែលបានអះអាងថា ការសម្រេចបែបនេះ គឺផ្អែកនៅលើបណ្តឹងរបស់ក្រុមហ៊ុនផលិតបន្ទះសូឡា នៅក្នុងស្រុករបស់អាមេរិកដែលបានព្រួយបារម្ភចំពោះការប្រកួតប្រជែងតម្លៃនៃបន្ទះសូឡានាំចូលទៅលក់នៅក្នុងទីផ្សារសហរដ្ឋអាមេរិក ។
ប្រភពដដែលបានបន្តទៀតថា ករណីនេះ មិនមែនទើបតែចាប់ផ្តើមទេ គឺសហរដ្ឋអាមេរិកបានដំណើរការនិតិវិធីសើបអង្កេត តាំងតែពីថ្ងៃទី២៦ ខែមេសា ឆ្នាំ២០២៤មកម្ល៉េះ ខណៈដែលក្រសួងពាណិជ្ជកម្មកម្ពុជាបានធ្វើការសម្របសម្រួលជាមួយនឹងវិស័យឯកជនពាក់ព័ន្ធ និងស្ថាប័នរដ្ឋនានា ដើម្បីចូលរួមបំភ្លឺលើចំណុចនៃការចោទប្រកាន់ខាងលើនេះដែរ ។
តាមសេចក្តីប្រកាសព័ត៌មានរបស់ក្រសួង បញ្ហាកំណត់ពន្ធថ្មីលើផលិតផលបន្ទះសូឡាកម្ពុជាអាចប៉ះពាល់លើក្រុមហ៊ុនមួយចំនួនដែលរួមមានដូចជាក្រុមហ៊ុន Solarspace, Jintek, Hounen Solar, Solar Long PV-Tech, ISC Cambodia ជាដើម ។
ក្រសួងពាណិជ្ជកម្ម មិនបានលម្អិតថា ការសម្រេចបែបនេះនឹងប៉ះពាល់យ៉ាងណាដល់ឧស្សាហកម្មបន្ទះសូឡាកម្ពុជានោះទេ ប៉ុន្តែកាលពីឆ្នាំ២០២៤កន្លងទៅនេះ កម្ពុជាបាននាំចេញផលិតផលប្រភេទនេះទៅកាន់ទីផ្សារនៅសហរដ្ឋអាមេរិក និងប្រទេសផ្សេងៗប្រមាណជាជាង៨០០លានដុល្លារ ។
អ្នកវិភាគបានឲ្យដឹងថា កម្ពុជាទំនងជាដឹងគម្រោងនេះមុន ដូច្នេះហើយទើបបានខិតខំបញ្ជៀសផលប៉ះពាល់ធ្ងន់ធ្ងរដល់ឧស្សាហកម្មនេះ ។ តាមស្ថិតិទំហំនៃការនាំចេញបន្ទះសូឡាសរុបរបស់កម្ពុជា កាលពីឆ្នាំ២០២៣ គឺមានទំហំធំជាងការនាំចេញនៅក្នុងឆ្នាំ២០២៤នេះខ្លាំងដោយកាលនោះបាននាំចេញសរុបដល់ទៅជាង២ពាន់លានដុល្លារឯណោះ ។
ពាក់ព័ន្ធនឹងការកំណត់ពន្ធលើបន្ទះសូឡានេះដែរ តាមសេចក្តីរាយការណ៍របស់សារព័ត៌មាន Nikkei Asia បានរាយការណ៍ថា ចំណាត់ការដែលសហរដ្ឋអាមេរិកបានប្រកាស កាលពីថ្ងៃទី២១ ខែមេសា ឆ្នាំ២០២៥នេះ គឺមិនបានសំដៅមកតែកម្ពុជានោះទេ គឺសំដៅមកផលិកម្មបន្ទះសូឡាក្រុមហ៊ុនចិន នៅតំបន់អាស៊ីអាគ្នេយ៍តែម្តង ។
សារព័ត៌មានជប៉ុនមួយនេះបានអះអាងថា ប្រទេសដែលរងផលប៉ះពាល់លើការកំណត់ពន្ធថ្មីលើផលិតផលបន្ទះសូឡានេះ គឺមានកម្ពុជាខ្ពស់ជាងគេ ក្រៅពីនោះថៃប្រមាណជា៩៧២ភាគរយ វៀតណាមជិត៨១៤ភាគរយ និងម៉ាឡេស៊ីប្រមាណជា២៥០ភាគរយ ៕
ចែករំលែកព័តមាននេះ