រាជធានីភ្នំពេញ ៖ ក្រសួងពាណិជ្ជកម្មកម្ពុជា បានបញ្ជាក់ថា ករណីសហរដ្ឋអាមេរិកដាក់ពន្ធលើផ្ទាំងសូឡានាំចូលពីកម្ពុជា រហូតដល់ ៣,៥២១% ពុំមានពាក់ព័ន្ធនឹងការអនុវត្តពន្ធគយបដិការរបស់រដ្ឋបាលលោក ដូណាល់ ត្រាំ…
រាជធានីភ្នំពេញ ៖ ក្រសួងពាណិជ្ជកម្មកម្ពុជា បានបញ្ជាក់ថា ករណីសហរដ្ឋអាមេរិកដាក់ពន្ធលើផ្ទាំងសូឡានាំចូលពីកម្ពុជា រហូតដល់ ៣,៥២១% ពុំមានពាក់ព័ន្ធនឹងការអនុវត្តពន្ធគយបដិការរបស់រដ្ឋបាលលោក ដូណាល់ ត្រាំ ដែលបានប្រកាសកាលពីដើមខែមេសា ឆ្នាំ២០២៥នេះឡើយ ។
យោងតាមសេចក្តីប្រកាសព័ត៌មានរបស់ក្រសួងពាណិជ្ជកម្ម បានលើកឡើងថា នៅថ្ងៃទី២១ ខែមេសា ឆ្នាំ២០២៥ ក្រសួងពាណិជ្ជកម្មសហរដ្ឋអាមេរិក បានចេញផ្សាយសេចក្តីសម្រេចចុងក្រោយ ក្នុងករណីស៊ើបអង្កេតឧបាស្រ័យពាណិជ្ជកម្ម លើការលក់បង្អួចថ្លៃ និងការឧបត្ថម្ភធនលើផលិតផលបន្ទះសូឡានាំចូលពីកម្ពុជា។ ករណីស៊ើបអង្កេតប្រឆាំងនឹងការលក់បង្អួចថ្លៃ និងការឧបត្ថម្ភធននេះ ជានីតិវិធី ដោយផ្អែកលើបណ្តឹងរបស់ក្រុមហ៊ុនផលិតបន្ទះសូឡា ក្នុងស្រុករបស់សហរដ្ឋអាមេរិក ដែលព្រួយបារម្ភចំពោះការប្រកួតប្រជែងតម្លៃ នៃបន្ទះសូឡានាំចូលទៅលក់លើទីផ្សារសហរដ្ឋអាមេរិក ។
ករណីស៊ើបអង្កេតនេះ បានចាប់ផ្តើមឡើងតាំងពីថ្ងៃទី២៦ ខែមេសា ឆ្នាំ២០២៤ មកម្ល៉េះ ហើយក្រសួងពាណិជ្ជកម្ម បានធ្វើការសម្របសម្រួលជាមួយវិស័យឯកជនពាក់ព័ន្ធ និងស្ថាប័នរដ្ឋ ដើម្បីចូលរួមបំភ្លឺលើចំណុច នៃការចោទករណីខាងលើនេះ ។
ករណីនេះ ពុំមានពាក់ព័ន្ធនឹងការអនុវត្តពន្ធគយបដិការរបស់រដ្ឋាភិបាលសហរដ្ឋអាមេរិក ដែលបានប្រកាសកាលពីដើមខែមេសា ឆ្នាំ២០២៥ នេះឡើយ ។
សូមជម្រាបផងដែរថា សហរដ្ឋអាមេរិក កាលពីថ្ងៃទី២១ ខែមេសា ឆ្នាំ២០២៥ បានកំណត់ពន្ធខ្ពស់លើការនាំចូលផ្ទាំងសូឡាពីប្រទេសនៅអាស៊ីអាគ្នេយ៍ ចំនួន៤ រួមមាន ៖ កម្ពុជា វៀតណាម ថៃ និងម៉ាឡេស៊ី ដោយអត្រាខ្ពស់បំផុត រហូតដល់ ៣,៥២១% ខណៈដែលកម្ពុជា គឺជាប្រទេសជាប់ពន្ធលើផ្ទាំងសូឡាខ្ពស់ជាងគេ ។
សហរដ្ឋអាមេរិក បានបើកការស៊ើបអង្កេតរយៈពេលមួយឆ្នាំ លើផលិតផលផ្ទាំងសូឡា ដែលផលិតក្នុងប្រទេសកម្ពុជា ថៃ វៀតណាម និងម៉ាឡេស៊ី គឺចាប់តាំងពីរដ្ឋបាលលោកប្រធានាធិបតីអាមេរិក លោក ចូ បៃឌិន ក្រោយក្រុមអ្នកដាក់ញត្តិ ដែលជាគណៈកម្មាធិការពាណិជ្ជកម្ម នៃសម្ព័ន្ធអាមេរិកសម្រាប់ការផលិតផ្ទាំងសូឡា បានចោទប្រកាន់ក្រុមហ៊ុនផលិតផ្ទាំងសូឡារបស់ប្រទេសចិន ដែលមានរោងចក្រក្នុងប្រទេសកម្ពុជា ថៃ វៀតណាម និងម៉ាឡេស៊ី បានទទួលផលប្រយោជន៍ ដោយអយុត្តិធម៌ពីការឧបត្ថម្ភធនពីរដ្ឋាភិបាល ដែលនាំឱ្យការផលិតនាំចេញទៅអាមេរិក លក់ក្នុងអត្រាទាបជាងតម្លៃផលិត ។
យោងតាមនាយកដ្ឋានពាណិជ្ជកម្មអាមេរិក បានឱ្យដឹងថា ពន្ធទូទាំងប្រទេស ត្រូវបានកំណត់ខ្ពស់ដល់ទៅ ៣,៥២១% លើផ្ទាំងសូឡានាំចូលពីកម្ពុជា ដោយក្រសួងពាណិជ្ជកម្មអាមេរិក បានបញ្ជាក់ថា កម្ពុជារងពន្ធខ្ពស់ជាងគេ ដោយសារតែបញ្ឈប់ការចូលរួមក្នុងការស៊ើបអង្កេត ៕
ចែករំលែកព័តមាននេះ