រាជធានីភ្នំពេញ ៖ សាលាអន្តរជាតិ ហ្រេ្វដហ្វត អាស៊ីប៉ាស៊ីហ្វិក ត្រូវបានអគ្គិភ័យឆាបឆេះ បង្កឱ្យមានការភ្ញាក់ផ្អើលដល់រថយន្តពន្លត់អគ្គិភ័យជាច្រើនគ្រឿង ទៅអន្តរាគមន៍បាញ់ពន្លត់ ។ ហេតុការណ៍នេះ…
រាជធានីភ្នំពេញ ៖ សាលាអន្តរជាតិ ហ្រេ្វដហ្វត អាស៊ីប៉ាស៊ីហ្វិក ត្រូវបានអគ្គិភ័យឆាបឆេះ បង្កឱ្យមានការភ្ញាក់ផ្អើលដល់រថយន្តពន្លត់អគ្គិភ័យជាច្រើនគ្រឿង ទៅអន្តរាគមន៍បាញ់ពន្លត់ ។
ហេតុការណ៍នេះ បង្កឲ្យមានការភ្ញាក់ផ្អើលនៅវេលាម៉ោង០៨និង៤០នាទីព្រឹកថ្ងៃទី២២ ខែមេសា ឆ្នាំ២០២៥ នៅតាមបណ្ដោយផ្លូវជាតិលេខ ៦A ក្នុងភូមិគៀនឃ្លាំង សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ ។
តាមព័ត៌មាន បានអោយដឹងថា នៅមុនពេលកើតហេតុ ខណៈពេល ដែលក្មេងកំពុងរៀន គេឃើញភ្លើងបានឆាបឆេះចេញពីពិដានបន្ទប់រៀន ផ្សែងហុយទ្រលោម បង្កអោយមានការភ្ញាក់ផ្អើលដល់បុគ្គលិក នាំគ្នាយកបំពង់ពន្លត់អគ្គិភ័យ និងទាក់ទងហៅរថយន្តពន្លត់អគ្គិភ័យ ទៅជួយអន្តរាគមន៍បាញ់ពន្លត់ ។
តាមនគរបាលការិយាល័យបង្ការ ពន្លត់អគ្គីភ័យ និងសង្គ្រោះ នៃស្នងការនគរបាលរាជធានីភ្នំពេញ បានឲ្យដឹងថា នៅក្នុងហេតុការណ៍នេះ រថយន្តពន្លត់អគ្គិភ័យចំនួន ៦គ្រឿង បានទៅអន្តរាគមន៍បាញ់ពន្លត់ ។ នៅក្នុងនោះរថយន្តការិ.អគ្គិភ័យ ចំនួន០៣គ្រឿង ប្រើប្រាស់ទឹកអស់ចំនួន ០២ឡាន ស្មើនឹង១២ម៉ែត្រគូប, រថយន្តទីក្រុងជ្រោយចង្វារ ចំនួន០៣គ្រឿង ប្រើប្រាស់ទឹក០២ឡាន ស្មើនឹង០៨ម៉ែត្រគូប ហើយភ្លើងបានរលត់ទៅវិញនៅវេលាម៉ោង៩និង២០នាទីព្រឹក ។
តាមនគរបាល បានឲ្យដឹងទៀតថា សំណង់សាលាអន្តរជាតិ ហ្រេ្វដហ្វត អាស៊ីប៉ាស៊ីហ្វិក ដែលត្រូវភ្លើងឆេះជា ប្រភេទសំណង់ធ្វើពីថ្ម ប្រក់ស័ង្កសី ទំហំ ៦០ម៉ែត្រ គុណ៥០ម៉ែត្រ ហើយភ្លើងបានបានឆាបឆេះរងការខូចខាតបន្ទប់ចំនួន២ ទំហំ១០ម៉ែត្រ គុណ ១០ម៉ែត្រ រួមទាំងសម្ភារៈ ៖ មានតុ កៅអី ម៉ាស៊ីនត្រជាក់ ទូរទស្សន៍ និងសម្ភារមួយចំនួន តែពុំបណ្តាលឲ្យឆេះរាលដាលដល់ផ្ទះអ្នកក្បែរខាងឡើយ ។
តាមនគរបាលបានឲ្យដឹងទៀតថា អគ្គិភ័យនេះ បណ្ដាលមកពីឆ្លងចរន្តអគ្គិសនី ចេញពីម៉ាស៊ីនត្រជាក់ ៕
ចែករំលែកព័តមាននេះ