បរទេស ៖ យោងតាមប្រភពពីទីភ្នាក់ងារសារព័ត៌មាន Reuters បានឱ្យដឹងថា តម្លៃមាសអន្តរជាតិបានទម្លុះរនាំង៣,៥០០ដុល្លារក្នុង១អោនជាលើកដំបូងក្នុងប្រវត្តិសាស្ត្រ នៅរសៀលថ្ងៃទី២២ ខែមេសា ឆ្នាំ២០២៥ បន្ទាប់ពីប្រធានាធិបតីអាមេរិក…
បរទេស ៖ យោងតាមប្រភពពីទីភ្នាក់ងារសារព័ត៌មាន Reuters បានឱ្យដឹងថា តម្លៃមាសអន្តរជាតិបានទម្លុះរនាំង៣,៥០០ដុល្លារក្នុង១អោនជាលើកដំបូងក្នុងប្រវត្តិសាស្ត្រ នៅរសៀលថ្ងៃទី២២ ខែមេសា ឆ្នាំ២០២៥ បន្ទាប់ពីប្រធានាធិបតីអាមេរិក លោក ដូណាល់ ត្រាំ បានរិះគន់យ៉ាងខ្លាំងលើលោក Jerome Powell ប្រធានធនាគារកណ្តាលអាមេរិក ដោយនាំឱ្យបណ្តាអ្នកវិនិយោគសម្តែងការមិនពេញចិត្តយ៉ាងខ្លាំង និងបានបង្កើនតម្រូវការលោហធាតុមាសដែលជាទ្រព្យសម្បត្តិដ៏មានសុវត្ថិភាពបំផុត។
គិតត្រឹមម៉ោង០៣:៣៥នាទីរសៀលថ្ងៃទី២២ ខែមេសា ឆ្នាំ២០២៥ តម្លៃមាសអន្តរជាតិបានរក្សាតម្លៃខ្ពស់របស់ខ្លួន ៣,៤៦៣ក្នុង១អោន ឬ ៤,១៧២ដុល្លារក្នុង១តម្លឹង បន្ទាប់ពីហក់ឡើងដល់កម្រិតខ្ពស់បំផុត ៣,៥០០.០៥ដុល្លារក្នុង១អោន ឬ ៤,២១៦ដុល្លារក្នុង១តម្លឹងនៅមុននេះ។ នេះបើតាមការចេញសាយពី Reuters។
លោក Alexander Zumpfe ពាណិជ្ជករមាសប្រចាំក្រុមហ៊ុន Heraeus Metals Germany បានលើកឡើងថា ជើងចុងក្រោយនៃការកើនឡើងតម្រូវការមាស ត្រូវបានបង្កឡើងដោយការរិះគន់ជាសាធារណៈរបស់លោក ត្រាំ លើលោក Powell ប្រធានធនាគារកណ្តាលអាមេរិក ពាក់ព័ន្ធនឹងការយឺតយ៉ាវរបស់លោកក្នុងការកាត់បន្ថយអត្រាប្រាក់តបតាមការអំពាវនាវរបស់លោក ត្រាំ។ លោក Zumpfe បានបន្តថា នៅពេលដែលភាពមិនច្បាស់លាស់ខាងនយោបាយ និងការព្រួយបារម្ភពីគោលនយោបាយរូបិយវត្ថុនៅតែបន្តកើតមាន តម្រូវការមាសនឹងកើនឡើងកាន់តែខ្លាំង»។
ការរិះគន់កាន់តែខ្លាំងឡើងរបស់លោក ត្រាំ លើលោក Powell ចំពោះការមិនកាត់បន្ថយអត្រាការប្រាក់បានធ្វើឱ្យសន្ទស្សន៍ភាគហ៊ុនរបស់ Wall Street ធ្លាក់ចុះ ២,៤% កាលពីថ្ងៃចន្ទ ហើយប្រាក់ដុល្លារធ្លាក់ចុះឈានដល់កម្រិតទាបរយៈពេល៣ឆ្នាំ។
តម្លៃមាសដែលជាទ្រព្យសម្បត្តិដ៏មានសុវត្ថិភាពបំផុត ចំពេលកើតមានភាពមិនប្រាកដប្រជាផ្នែកសេដ្ឋកិច្ច និងភូមិសាស្ត្រនយោបាយ បានកើនឡើងជិតមួយភាគបីគិតមកដល់ពេលនេះ។ ជាមួយគ្នានោះ បណ្តាពាណិជ្ជករនឹងរង់ចាំមើលការថ្លែងសុន្ទរកថារបស់មន្ត្រីធនាគារកណ្តាលអាមេរិកមួយចំនួននៅចុងសប្តាហ៍នេះ ពាក់ព័ន្ធនឹងការផ្លាស់ប្តូរណាមួយអំពីគោលនយោបាយរូបិយវត្ថុនាពេលអនាគត៕ ប្រភព ៖ Reuters
ចែករំលែកព័តមាននេះ