ទីក្រុងប៉េកាំង ៖ ប្រទេសចិនកាលពីថ្ងៃទី២១ ខែមេសា ឆ្នាំ២០២៥ បានព្រមាននឹងចាត់វិធានការសឹកសងលើប្រទេសណាមួយដែលចុះកិច្ចព្រមព្រៀងពាណិជ្ជកម្មជាមួយសហរដ្ឋអាមេរិក ដើម្បីទទួលបានការទម្លាក់អត្រាពន្ធពីលោក ត្រាំ ដែលធ្វើឱ្យប៉ះពាល់ដល់ប្រយោជន៍ខ្លួន។ នេះបើតាមប្រភពពី…
ទីក្រុងប៉េកាំង ៖ ប្រទេសចិនកាលពីថ្ងៃទី២១ ខែមេសា ឆ្នាំ២០២៥ បានព្រមាននឹងចាត់វិធានការសឹកសងលើប្រទេសណាមួយដែលចុះកិច្ចព្រមព្រៀងពាណិជ្ជកម្មជាមួយសហរដ្ឋអាមេរិក ដើម្បីទទួលបានការទម្លាក់អត្រាពន្ធពីលោក ត្រាំ ដែលធ្វើឱ្យប៉ះពាល់ដល់ប្រយោជន៍ខ្លួន។ នេះបើតាមប្រភពពី Reuters, CNN និង BBC បានចេញផ្សាយ។
ការព្រមានរបស់ទីក្រុងប៉េកាំងកើតឡើង នៅពេលប្រទេសជាដៃគូពាណិជ្ជកម្មអាមេរិកជាច្រើនកំពុងព្យាយាមចរចារលើការបន្ធូរបន្ថយភាពតានតឹងពាណិជ្ជកម្មរបស់លោក ត្រាំ ជាពិសេសលើពន្ធគយទៅវិញទៅមក ដែលត្រូវបានផ្អាករហូតដល់ខែកក្កដា។
អ្នកនាំពាក្យក្រសួងពាណិជ្ជកម្មចិនបានថ្លែងយ៉ាងដូច្នេះថា «ការលះបង់ផលប្រយោជន៍អ្នកដទៃ ដើម្បីទទួលបាននូវអ្វីដែលហៅថា ការលើកលែងសម្រាប់ការចំណេញដ៏អាត្មានិយមបណ្តោះអាសន្នរបស់ខ្លួន គឺស្រដៀងទៅនឹងការចរចាជាមួយខ្លាអ៊ីចឹងដែរ ហើយទីបំផុតវានាំទៅរកការបរាជ័យសម្រាប់ភាគីទាំងពីរ និងធ្វើឱ្យប៉ះពាល់ដល់អ្នកពាក់ព័ន្ធទាំងអស់ផងដែរ»។
ក្រសួងគូសបញ្ជាក់ទៀតថា «ខណៈដែលប្រទេសចិនបានគោរពកិច្ចខិតខំប្រឹងប្រែងរបស់ប្រទេសនានាក្នុងការដោះស្រាយជម្លោះពាណិជ្ជកម្មពួកគេជាមួយសហរដ្ឋអាមេរិកនោះ ពួកគេក៏គួរតែឈរលើយុត្តិធម៌ និងភាពត្រឹមត្រូវនៃប្រវត្តិសាស្ត្រ។ វាមានសារៈសំខាន់ជាពិសេសក្នុងការបញ្ជាក់ថា ប្រទេសចិនប្រឆាំងយ៉ាងម៉ឺងម៉ាត់ចំពោះភាគីណាដែលសម្រេចបានកិច្ចព្រមព្រៀងជាមួយសហរដ្ឋអាមេរិក ដោយខាតបង់ផលប្រយោជន៍របស់ចិន»។
ប្រទេសចិនមើលឃើញអំពីប៉ះពាល់ដល់ផលប្រយោជន៍របស់ខ្លួន ខណៈដែលសង្គ្រាមពាណិជ្ជកម្មរវាងយក្សសេដ្ឋកិច្ចធំបំផុតទាំងពីររបស់ពិភពលោកបានគំរាមកំហែង និងអូសទាញពាណិជ្ជកម្មនៅក្នុងប្រទេសដទៃទៀត។ ការអត្ថាធិប្បាយនេះ កើតឡើងបន្ទាប់ពីមានរបាយការណ៍ថា សហរដ្ឋអាមេរិកគ្រោងនឹងដាក់សម្ពាធដល់ប្រទេសនានាឱ្យរឹតបន្តឹងពាណិជ្ជកម្មជាមួយចិនជាថ្នូរនឹងការលើកលែងពន្ធពីអាមេរិក។ រដ្ឋបាលលោក ត្រាំ បានចាប់ផ្តើមកិច្ចពិភាក្សាជាមួយដៃគូពាណិជ្ជកម្មរបស់ខ្លួន ជុំវិញពន្ធគយ ដោយគណៈប្រតិភូជប៉ុនបានធ្វើទស្សនកិច្ចនៅទីក្រុងវ៉ាស៊ីនតោន កាលពីសប្តាហ៍មុន ហើយកូរ៉េខាងត្បូងគ្រោងនឹងចាប់ផ្តើមការចរចានៅសប្តាហ៍នេះ។
គួររំលឹកថា កាលពីថ្ងៃទី៩ ខែមេសា ឆ្នាំ២០២៥ លោក ត្រាំ បានសម្រេចផ្អាកការយកពន្ធ ទៅវិញទៅមកលើប្រទេសភាគច្រើនរយៈពេល៩០ថ្ងៃ ប៉ុន្តែផ្តោតសង្គ្រាមពាណិជ្ជកម្មជាប្រវត្តិសាស្ត្ររបស់លោកទៅលើប្រទេសចិន ដោយដំឡើងពន្ធលើការនាំចូលរបស់ចិនរហូតដល់ ១៤៥%។ ស្របពេលប្រទេសជាច្រើនសង្ឃឹមថានឹងធ្វើការចរចាឡើងវិញនូវការយកពន្ធជាមួយសហរដ្ឋអាមេរិក មុនការផ្អាកផុតកំណត់។ ជាការឆ្លើយតប ប្រទេសចិនបានសងសឹកដោយការដំឡើងពន្ធលើទំនិញអាមេរិកដល់ ១២៥% និងបញ្ចូលក្រុមហ៊ុនអាមេរិកបន្ថែមទៀតទៅក្នុងបញ្ជីត្រួតពិនិត្យការនាំចេញ និងបញ្ជីអង្គភាពដែលមិនគួរឱ្យទុកចិត្តរបស់ខ្លួន។
ចាប់តាំងពីការត្រឡប់ចូលកាន់តំណែងវិញកាលពីខែមករា លោក ត្រាំ បានសម្រេចដាក់ពន្ធយ៉ាងច្រើនលើការនាំចូលរបស់ចិន ខណៈដែលប្រទេសផ្សេងទៀតក៏ទទួលរងការយកពន្ធលើទំនិញពួកគេលើអត្រាផ្សេងគ្នាផងដែរ។ ជាមួយគ្នានោះ លោក ត្រាំ ក៏បានអះអាងថា ប្រទេសជាង៧០ហើយបានឈានដល់ការចាប់ផ្តើមការចរចា ចាប់តាំងពីពន្ធថ្មីត្រូវបានប្រកាស៕
ចែករំលែកព័តមាននេះ