ខេត្តពោធិ៍សាត់ ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីបានគូសបញ្ជាក់ថា ទោះបីជាកម្ពុ ជារីកចម្រើនលឿនយ៉ាងណា ក៏មានការវិវត្តន៍ ខណៈពីមុនមកធ្លាប់តែនាំចូលពីក្រៅប្រទេស…
ខេត្តពោធិ៍សាត់ ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីបានគូសបញ្ជាក់ថា ទោះបីជាកម្ពុ ជារីកចម្រើនលឿនយ៉ាងណា ក៏មានការវិវត្តន៍ ខណៈពីមុនមកធ្លាប់តែនាំចូលពីក្រៅប្រទេស សូម្បីតែទឹក ក្រូចមួយកំប៉ុងក៏ទិញពីក្រៅប្រទេស តែពេលនេះ មានការផលិតសម្រាប់នាំចេញទៅក្រៅប្រទេសវិញ ។
ថ្លែងក្នុងពិធីសម្ពោធដាក់ឱ្យដំណើរការខ្សែសង្វាក់ផលិតកម្មថ្មី និងរោងចក្រដំឡើង គ្រឿងបង្គុំរថយន្ត Ford របស់ក្រុមហ៊ុន អ អិម អេ (ខេមបូឌា) ម.ក នៅខេត្តពោធិ៍សាត់ នាព្រឹកថ្ងៃទី២២ ខែមេសា ឆ្នាំ២០២៥ សម្តេច មហាបវរធិបតី បានលើកឡើងថា ទោះបីជានៅខេត្តពោធិ៍សាត់ដែលជាកន្លែងដែលគេធ្លាប់ជិះកាត់មកហួសទៅហួស បែរមកក្លាយជាកន្លែងមានសក្តានុពលផ្នែកឧស្សាហកម្មជួយឲ្យពលរដ្ឋច្រើនរយនាក់មានការងារធ្វើ ។
សម្តេចមហាបវរធិបតី បានបន្ថែមថា កាលពី២០ ឬ៣០ឆ្នាំមុន យើងគិតថា កម្ពុជាមានកន្លែងសម្រាប់ផលិតរថយន្តនោះទេ ហើយកាលពីឆ្នាំ៩០ជាង អ្វីក៏នាំចូលមកដែរ ។ សម្តេចបញ្ជាក់ថា ៖«ខ្ញុំឧស្សាហ៍និយាយថា កាលពីឆ្នាំ៩០ជាង សូម្បីទឹកក្រូចមួយកំប៉ុងក៏នាំចូលដែរ ចំពោះផលិតផលសម្រេច ។ ផ្លែឈើកញ្ចប់ដែលដាក់ស្លាក សុទ្ធតែនាំពីក្រៅប្រទេស ខោអាវមិនដែលនាំចេញទៅក្រៅប្រទេសទេ ប៉ុន្តែមកដល់ឆ្នាំនេះកម្ពុជាយើងមានសមត្ថភាពផលិតផ្តត់ផ្គង់ទីផ្សារក្នុងស្រុកមួយចំនួន ហើយសម្រាប់នាំចេញទៅទីផ្សារក្រៅប្រទេស មានផលិតផលកសិកម្ម ឧស្សាហកម្ម…» ។
សម្តេចមហាបវរធិបតី បានលើកឡើងទៀតថា កាលពីមុន កម្ពុជាយើងបាននាំចូលអ្វីទាំងអស់ តែក្រោយមក យើងផលិតនាំចេញគ្រឿងភេជ្ជៈ ខោអាវ ផលិតគ្រឿងបង្គុំអគ្គិសនី ផលិតរថយន្ត ដែលមានក្រុមហ៊ុនល្បីមកពីអាមេរិកផងដែរ ។ សម្តេចមហាបវរធិបតី នាយករដ្ឋមន្ត្រីបានលើកឡើងទៀតថា រាជរដ្ឋាភិបាលមានគោលនយោបាយលើកទឹកចិត្តដល់វិស័យគ្រឿងយន្ត ទាំងអ្នកវិនិយោគថ្មី និងអ្នកវិនិយោគចាស់ ដើម្បីធ្វើយ៉ាងណាឲ្យមានការប្រកួតប្រជែងគ្នាស្មើភាព ។ សម្តេចថា កត្តាសន្តិភាពបានធ្វើឲ្យអ្នកវិនិយោគទុនមានទំនុកចិត្ត ក្នុងការដាក់ទុនវិនិយោគ ព្រោះថា បើប្រទេសគ្មានសន្តិភាព គ្មានអ្នកណាហ៊ានមកវិនិយោគនោះទេ ។ ចំណុចនេះ ត្រូវបានរាជរដ្ឋាភិបាលធានាបានផ្ទុយទៅវិញ បើសិនរាជរដ្ឋាភិបាលរាប់អាណត្តិមកនេះ មិនអាចគ្រប់គ្រងស្ថានភាពបាននោះទេ ក៏គ្មានអ្នកមកវិនិយោគ ឬពង្រីកខ្សែចង្វាក់ផលិតកម្មរបស់គេទេ ៕
ចែករំលែកព័តមាននេះ