រាជធានីភ្នំពេញ ៖ ជនសង្ស័យជាចោរបិទមុខដែលគេច្រើនប្រើពាក្យថា«និនចា»ជនជាតិចិនម្នាក់ ត្រូវប្រឈមនឹងការជាប់ពន្ធនាគារពី៣ឆ្នាំទៅ១០ឆ្នាំ ពាក់ព័ន្ធនឹងបទ «លួចមានស្ថានទម្ងន់ទោស» គឺគាស់ទម្លុះទម្លាយផ្ទះប្រជាពលរដ្ឋលួចយកទ្រព្យសម្បត្តិ ។ បើតាមអ្នកនាំពាក្យអយ្យការអមសាលាដំបូងរាជធានីភ្នំពេញ បានឲ្យដឹងថា…
រាជធានីភ្នំពេញ ៖ ជនសង្ស័យជាចោរបិទមុខដែលគេច្រើនប្រើពាក្យថា«និនចា»ជនជាតិចិនម្នាក់ ត្រូវប្រឈមនឹងការជាប់ពន្ធនាគារពី៣ឆ្នាំទៅ១០ឆ្នាំ ពាក់ព័ន្ធនឹងបទ «លួចមានស្ថានទម្ងន់ទោស» គឺគាស់ទម្លុះទម្លាយផ្ទះប្រជាពលរដ្ឋលួចយកទ្រព្យសម្បត្តិ ។
បើតាមអ្នកនាំពាក្យអយ្យការអមសាលាដំបូងរាជធានីភ្នំពេញ បានឲ្យដឹងថា តំណាងអយ្យការបានសម្រេចធ្វើការចោទប្រកាន់លើជនសង្ស័យម្នាក់ដែលត្រូវបានឃាត់ខ្លួន និងគូកនពីបទលួចមានស្ថានទម្ងន់ទោសប្រព្រឺត្តនៅបុរីជីប ម៉ុង លែន ផ្ទះលេខ២៩ ផ្លូវលេខJ០១ ភូមិឃ្មួញ សង្កាត់ឃ្មួញ ខណ្ឌសែនសុខ រាជធានីភ្នំពេញ កាលពីថ្ងៃទី១៤ ខែមេសា ឆ្នាំ២០២៥ ។ បទល្មើសនេះមានចែងឲ្យផ្តន្ទាទោសតាមបញ្ញត្តិមាត្រា ៣៥៣ និងមាត្រា ៣៥៧ នៃក្រមព្រហ្មទណ្ឌ ។
យោងតាមការចោទប្រកាន់ពីបទលួចមានស្ថានទម្ងន់ទោស«គាស់ទម្លុះទម្លាយផ្ទះលួចយកទ្រព្យសម្បត្តិ» មាត្រា៣៥៣ និយមន័យនៃអំពើលួច និងមាត្រា៣៥៧ «ស្ថានទម្ងន់ទោសដោយសារការប្រព្រឹត្តអំពើហិង្សា» ត្រូវផ្តន្ទាទោសដាក់ពន្ធនាគារពី៣ឆ្នាំ ទៅ១០ឆ្នាំ ក្នុងករណីដូចតទៅ ៖ ១.អំពើលួចនេះប្រព្រឹត្តឡើងមុនពេល ក្នុងពេល ឬក្រោយពេលប្រើហិង្សា ។ ២-អំពើលួចនេះ ប្រព្រឹត្តដោយការកាប់គាស់ទម្លុះទម្លាយ ។
សូមរំឭកថា កាលពីថ្ងៃទី១៤ ខែមេសា ឆ្នាំ២០២៥កន្លងទៅ វេលាម៉ោងប្រមាណ១០និង៣០នាទីយប់ កម្លាំងនគរបាលខណ្ឌសែនសុខ បានធ្វើការឃាត់ខ្លួនជនសង្ស័យម្នាក់ ករណីលួចមានស្ថានទម្ងន់ទោស គឺគាស់ទម្លុះទម្លាយផ្ទះលួចយកទ្រព្យសម្បត្តិ នៅផ្ទះលេខ២៩ ផ្លូវបេតុង ភូមិឃ្មួញ សង្កាត់ឃ្នញ ខណ្ឌសែនសុខ រាជធានីភ្នំពេញ បង្កដោយជនសង្ស័យមានគ្នា២នាក់ តែម្នាក់ទៀតគេចខ្លួនរួចមិនស្គាល់អត្តសញ្ញាណ ។ចំណែកជនសង្ស័យដែលត្រូវចាប់ខ្លួនបានឈ្មោះ Wei Sheng Chao ភេទប្រុស អាយុ៣៨ឆ្នាំ ជនជាតិចិន មុខរបរមិនពិតប្រាកដ កាន់លិខិតឆ្លងដែនលេខ EL០៥០៥០៩២ ស្នាក់នៅសណ្ឋាគារហ្គាឌិនផង បន្ទប់លេខ៣០៣ ជាន់ទី៣ ភូមិចុងថ្នល់ខាងកើត សង្កាត់ទឹកថ្លា ខណ្ឌសែនសុខ រាជធានីភ្នំពេញ ។
ជននេះ បានស្លៀកសម្លៀកបំពាក់ពណ៌ខ្មៅ ឃ្លុំមុខក្លែងធ្វើនិនចា ចូលទៅធ្វើសកម្មភាពគាស់ទម្លុះទម្លាយផ្ទះលួចយកទ្រព្យសម្បត្តិ និងធ្វើឲ្យខូចខាត សោទ្វារបន្ទប់ចំនួន៣ ចម្រឹងបង្អួច១ និងសម្ភារក្នុងផ្ទះបាយមួយចំនួន ។
ជាមួយនេះ បានបន្សល់ទុកនាឡិកាដៃចំនួន៤គ្រឿងគឺ ម៉ាករ៉ូមេនសុន ខ្សែស្បែកពណ៌ស្លែ ១គ្រឿង ម៉ាក FOSSIL ខ្សែដែក ពណ៌ទឹកមាស ១គ្រឿង ម៉ាក WSAROVSKI ខ្សែស្បែក ពណ៌ទឹកដោះគោ ១គ្រឿង និងម៉ាក BERLINK ខ្សែដែក ១គ្រឿង ខ្សែកប្រាក់ ១ខ្សែ មានដាំត្បូងចម្រុះពណ៌ និងខ្សែដៃប្រាក់ ចំនួន ២ខ្សែ មានដាំត្បូងចម្រុះពណ៌ ដែលជារបស់ជនរងគ្រោះ ។
កាបូបស្ពាយនៅខ្នង១ ដែកគាស់២ដើម ដែកដូយ១ ទួរណឺវីសវែង១ប្រដាប់កាត់ដែក១ ខ្សែ១ដុំ ស្រោមដៃក្រណាត់១គូ ម៉ាសពណ៌ខ្មៅ១ មួកពណ៌ខ្មៅ១ និងស្រោមមុខពណ៌ខ្មៅ១ ដែលជារបស់ជនសង្ស័យ និងរូបភាពជនសង្ស័យក្នុងកាមេរ៉ាសុវត្ថិភាព ។ ក្រោយពេលឃាត់ខ្លួន ជនសង្ស័យជាជនជាតិចិនដែលធ្វើចោរហើយបិទមុខដូចនិនចានេះត្រូវបានសមត្ថកិច្ចកសាងសំណុំរឿងបញ្ជូនទៅសាលាដំបូងរាជធានីភ្នំពេញតាមនីតិវិធីហើយ ៕
ចែករំលែកព័តមាននេះ