ខេត្តសៀមរាប ៖ កាលពីវេលាម៉ោង១និង៤០នាទីរសៀលនាថ្ងៃទី ២១ ខែ មេសា ឆ្នាំ២០២៥ មានករណីគ្រោះថ្នាក់ចរាចរណ៍រវាងរថយន្ត Lexus RX…
ខេត្តសៀមរាប ៖ កាលពីវេលាម៉ោង១និង៤០នាទីរសៀលនាថ្ងៃទី ២១ ខែ មេសា ឆ្នាំ២០២៥ មានករណីគ្រោះថ្នាក់ចរាចរណ៍រវាងរថយន្ត Lexus RX 300 បុកជាមួយរថយន្តម៉ាក Pick Up ត្រង់ចំណុចលើផ្លូវទៅអាកាសយានដ្ឋានអន្តរជាតិសៀមរាប-អង្គរ ស្ថិតក្នុងភូមិ ដំរីកូន ឃុំពពេល ស្រុកសូទ្រនិគម បណ្តាលឱ្យស្លាប់មនុស្ស ចំនួន២នាក់និងរងរបួសធ្ងន់ស្រាល១៤នាក់ ត្រូវបានបញ្ជូនទៅសង្គ្រោះនៅមន្ទីរពេទ្យ ។
បើតាមការបញ្ជាក់របស់លោក គឹម វណ្ណះ អភិបាលស្រុកសូទ្រនិគម និង ជាប្រធានគណៈបញ្ជាការឯកភាពរដ្ឋបាលស្រុកសូទ្រនិគម ខេត្តសៀមរាប បានឱ្យដឹងនៅថ្ងៃទី២១ ខែមេសាឆ្នាំ២០២៥នេះថា ក្រោយពេលទទួលបានព័ត៌មានខាងលើភ្លាម កម្លាំងសមត្ថកិច្ច ព្រមទាំងរថយន្តសង្គ្រោះ បន្ទាន់របស់មន្ទីរពេទ្យបង្អែកស្រុកសូទ្រនិគម បានចុះទៅដល់កន្លែងកើតហេតុ ព្រមទាំងបានដឹកបញ្ជូនជនរងគ្រោះយកទៅសង្គ្រោះបន្ទាន់នៅមន្ទីរពេទ្យបង្អែកសូទ្រនិគម និងបញ្ជូនបន្តទៅកាន់មន្ទីរពេទ្យបង្អែកខេត្តសៀមរាប ផងដែរ។
លោកបានបញ្ជាក់ថា ក្នុងករណីគ្រោះថ្នាក់ចរាចរណ៍នេះ បណ្តាលឱ្យស្លាប់២នាក់ របួសធ្ងន់ស្រាល១៤ នាក់ ។ ចំណែករថយន្ត lexus rx 300 បានធ្លាក់ទៅម្ខាងផ្លូវ ព្រមទាំងប៉ះពាល់ដល់រ៉ឺម៉ក់ម៉ូតូកង់បី ក្រឡាប់ធ្លាក់ទៅម្ខាងផ្លូវ រីឯរថយន្តម៉ាក pick up រងការខូចខាតធ្ងន់ ។ ចំពោះអ្នករងរបួសទាំង ១៤នាក់ រស់នៅភូមិ គោកវត្ត ឃុំស្រែណូយ ស្រុកវ៉ារិន ខេត្តសៀមរាប ហើយចំពោះអ្នកស្លាប់ទាំង២នោះត្រូវបានដឹកយកទៅប្រគល់ឱ្យក្រុមគ្រួសារធ្វើបុណ្យតាមប្រពៃ ណី នៅភូមិគោកវត្ត ឃុំ ស្រែណូយ ស្រុក វ៉ារិន ផងដែរ ។
តាមការបញ្ជាក់ពីសក្សីដែលឃើញហេតុការណ៍បានឱ្យដឹងថា មុនពេលកើតហេតុ គេឃើញរថយន្តម៉ាក pick up បើកបរមកពីទិសខាងកើត ចំណែករថយន្ត lexus rx 300 បើកមកពីទិសខាងលិច បញ្ច្រាសទិសគ្នា ។
ក្រោយកើតហេតុកម្លាំងជំនាញបានធ្វើការវាស់វែងរួច បានដឹកយក រថយន្តទាំង២គ្រឿង ទៅរក្សាទុកនៅអធិការដ្ឋាន នគរ បាលស្រុកសូទ្រនិគម ដើម្បីរងចាំធ្វើការដោះស្រាយ ព្រម ទាំង បានធ្វើការបាញ់ទឹកលាងថ្នល់ឱ្យបានស្អាត នៅ កន្លែងកើតហេតុ ផងដែរ ក្នុងការធានាសុវត្ថិភាព ដល់ការដឹកជញ្ជូនភ្ញៀវ ចេញចូលទៅអាកាសយានដ្ឋានអន្តរជាតិសៀមរាប.អង្គរ ។
លោកឧត្ដមសេនីយ៍ទោហួត សុធី ស្នងការនគរបាលខេត្តសៀមរាប បានមានប្រសាសន៍ឱ្យដឹងថា ករណីគ្រោះថ្នាក់ចរាចរណ៍នេះ រវាងរថយន្ត lexus RX 300 ១គ្រឿង បុកជាមួយនឹង រថយន្តម៉ាក់ pick up១គ្រឿង បណ្ដាលឱ្យស្លាប់២នាក់នឹងរបួសធ្ងន់ស្រាលចំនួន ១៤នាក់ ។
លោក ស្នងការខេត្ត បានបញ្ជាក់ទៀតថា ករណីគ្រោះថ្នាក់ចរាចរណ៍នេះ កម្លាំងសមត្ថកិច្ចចម្រុះ ឱ្យស្នងការដ្ឋាននគរបាលខេត្តសៀមរាប កំពុងធ្វើការស្រាវជ្រាវ បន្ត។ បច្ចុប្បន្ន ជនរងគ្រោះ ទាំង១៤ នាក់ ជួយសង្គ្រោះ នៅក្នុងមន្ទីរពេទ្យបង្អែកខេត្តសៀមរាប៕
ចែករំលែកព័តមាននេះ