ខេត្តបាត់ដំបង ៖ ក្រុមក្មេងអន្ធពាលចំនួន០៧នាក់ដែលកម្លាំងអធិការស្រុកបវេលក្របួចកជាប់ មុនពេលពួកគេចូលសមរភូមិប្រយុទ្ធគ្នាស្លាប់រស់កាលពីប៉ុន្មានថ្ងៃមុន ពេលនេះត្រូវបានមន្ត្រីការិយាល័យជំនាញ រៀបចំសំណុំរឿងបញ្ជូនទៅកាន់សាលាដំបូងខេត្តហើយ នៅព្រឹកថ្ងៃទី២២ មេសា នេះ ដើម្បីចាត់ការតាមនីតិវិធី…
ខេត្តបាត់ដំបង ៖ ក្រុមក្មេងអន្ធពាលចំនួន០៧នាក់ដែលកម្លាំងអធិការស្រុកបវេលក្របួចកជាប់ មុនពេលពួកគេចូលសមរភូមិប្រយុទ្ធគ្នាស្លាប់រស់កាលពីប៉ុន្មានថ្ងៃមុន ពេលនេះត្រូវបានមន្ត្រីការិយាល័យជំនាញ រៀបចំសំណុំរឿងបញ្ជូនទៅកាន់សាលាដំបូងខេត្តហើយ នៅព្រឹកថ្ងៃទី២២ មេសា នេះ ដើម្បីចាត់ការតាមនីតិវិធី ។
តាមរយៈរបាយការណ៍អធិការស្រុកបវេល លោកសុខ សារិន បានប្រាប់ថា ក្រុមជនក្មេងទំនើងទាំង០៧នាក់ដែលត្រូវឃាត់ខ្លួននោះ ជាមុខសញ្ញាក្រុមក្មេងទំនើងនៅក្នុងស្រុកបវេល ។ លោកថា ពួកគេត្រូវបានមន្ត្រីជំនាញអធិការ សហការជាមួយមន្ត្រីរដ្ឋបាលប៉ុស្ដិ៍បង្ក្រាបបាន ខណៈពេលពួកគេប្រមូលផ្ដុំគ្នានៅចំណុចស្ថានីយប្រេងមួយកន្លែង ត្រៀមប្រយុទ្ធគ្នាជាមួយភាគីម្ខាងទៀត តែត្រូវបានកម្លាំងសមត្ថកិច្ចយើងបង្ក្រាបបានទាន់ពេល ។
របាយការណ៍ដដែលបានឲ្យដឹងថា ក្រុមជនអន្ធពាលទាំង០៧នាក់រួមមាន៖ ១-ឈ្មោះ ឡុង អេឡិច អាយុ១៦ឆ្នាំ ២-ឈ្មោះ រតនា ប៊ុនថា អាយុ១៦ឆ្នាំ ៣-ឈ្មោះ បូ ដេនី អាយុ១៨ឆ្នាំ ៤-ឈ្មោះ វ៉ាន លីហូវ អាយុ២០ឆ្នាំ (ជននេះមានដីកាចាប់ខ្លួនស្រាប់) ៥-ឈ្មោះ វាសនា តារា អាយុ១៥នាក់ ៦-ឈ្មោះ ញ៉ី បញ្ញាតិ អាយុ១៥ឆ្នាំ (នាក់នេះរស់នៅស្រុកបវេល) និង៧-ឈ្មោះ ម៉ង់ ម៉ាន់ ហៅ ក្ដាម អាយុ១៦ឆ្នាំ នៅស្រុកថ្មគោល ។
របាយការណ៍បានបញ្ជាក់ថា ក្រុមជនទំនើងទាំង០៧នាក់នេះ ត្រូវបានឃាត់ខ្លួន នៅពេលពួកគេកំពុងជួបជុំគ្នាប្រដាប់ដោយកាំបិត វែង ខ្លី នៅក្បែរស្ថានីយប្រេងមួយកន្លែង កាលពីវេលាម៉ោង៩យប់ថ្ងៃទី ២០ មេសា នៅភូមិសាំងរាំង ឃុំបវេល ស្រុកបវេល ។ ជាមួយនឹងការឃាត់ខ្លួន សមត្ថកិច្ចដកហូតបានវត្ថុតាងរួមមាន៖ ម៉ូតូចំនួន០៣គ្រឿង ជាមធ្យោបាយសម្រាប់ជិះដេញកាប់គ្នា និងកាំបិតវែង ខ្លីចំនួន០២ដើម ជាអាវុធសម្រាប់ច្បាំងគ្នាស្លាប់រស់ ។
សមត្ថកិច្ចបាននិយាយថា ក្រុមជនអន្ធពាលនេះ បាននិងកំពុងប្រមូលផ្ដុំគ្នារង់ចាំស្ទាក់កាប់គូសត្រូវរបស់ខ្លួន ដែលពួកគេបានណាត់ប្រយុទ្ធគ្នាស្លាប់រស់ តែភាគីម្ខាងទៀតមិនទាន់ប្រមូលគ្នាមកផង ក៏ត្រូវសមត្ថកិច្ចក្របួច.កក្រុមភាគីរង់ចាំបានមុន ។ នេះជាការទប់ស្កាត់មុនពេលវិនាសកម្មកើតឡើង ដែលបង្កឡើងដោយក្រុមក្មេងទំនើង ។
តាមការស្រង់សម្ដីពីសមត្ថកិច្ចដែលបានសួរនាំក្រុមអន្ធពាលដំបូងពេលត្រូវក្របួចកជាប់៖ ពួកគេបានប្រមូលផ្ដុំគ្នានៅក្បែរស្ថានីយប្រេងខាងលើនេះ គឺរង់ចាំប្រយុទ្ធគ្នាជាមួយសត្រូវរបស់ពួកគេ ដែលលើកគ្នាមកពីទឹកដីឃុំរូងជ្រៃ ស្រុកថ្មគោល តែពេលកំពុងប្រមូលផ្ដុំគ្នារង់ចាំគូរប្រយុទ្ធមិនទាន់មកដល់ផង បែរជាសមត្ថកិច្ចមកដល់មុនក្របួចកជាប់ល្មម ។
ស្នងការរងទទូលផែនព្រហ្មទណ្ឌ លោក ឈឿង គឹមសុង បានប្រាប់ថា ករណីក្រុមក្មេងទំនើងខាងលើនេះ ត្រូវបានបង្ក្រាបដោយកម្លាំងជំនាញនៃអធិការស្រុកបវេល ។ នេះជាការទប់ស្កាត់បានទាន់ពេលវេលា មុនពេលមហន្តរាយកើតឡើងរវាងក្រុមជនអន្ធពាល០២ក្រុម ដែលត្រៀមប្រយុទ្ធគ្នាស្លាប់រស់ ។
យ៉ាងណា ពេលនេះ លោកស្នងការបានបញ្ជាឲ្យមន្ត្រីការិយាល័យជំនាញរៀបចំសំណុំរឿងបញ្ជូនពួកគេទៅកាន់សាលាដំបូងខេត្ត នៅព្រឹកថ្ងៃទី២២ មេសា នេះហើយ ដើម្បីចាត់ការតាមនីតិវិធី ៕
ចែករំលែកព័តមាននេះ