គម្រោងរថភ្លើងល្បឿនលឿនពីកម្ពុជារហូតដល់ចិនតម្លៃ៤ពាន់ដុល្លារ កំពុងតែមានក្តីសង្ឃឹមហើយ បន្ទាប់ពីទស្សនកិច្ចផ្លូវរដ្ឋរបស់លោកប្រធានាធិបតី ស៊ី ជីនពីង នាពេលកន្លងមក ។ នេះបើតាមសេចក្តីរាយការណ៍ព័ត៌មានរបស់ទីភ្នាក់ងារសារព័ត៌មាន ស៊ីន ហួ…
គម្រោងរថភ្លើងល្បឿនលឿនពីកម្ពុជារហូតដល់ចិនតម្លៃ៤ពាន់ដុល្លារ កំពុងតែមានក្តីសង្ឃឹមហើយ បន្ទាប់ពីទស្សនកិច្ចផ្លូវរដ្ឋរបស់លោកប្រធានាធិបតី ស៊ី ជីនពីង នាពេលកន្លងមក ។ នេះបើតាមសេចក្តីរាយការណ៍ព័ត៌មានរបស់ទីភ្នាក់ងារសារព័ត៌មាន ស៊ីន ហួ របស់ចិន កាលពីថ្ងៃទី២២ ខែមេសា ។
ដំណើរទស្សនកិច្ចផ្លូវរដ្ឋនាពេលថ្មីៗនេះ របស់ប្រធានាធិបតីចិន ស៊ី ជីនពីង មកកាន់កម្ពុជាជាថ្មីម្តងទៀត បាននាំក្តីសង្ឃឹមនៃគម្រោងផ្លូវដែកល្បឿនលឿនតម្លៃ ៤ពាន់លានដុល្លារ ខណៈដែលឯកអគ្គរដ្ឋទូតចិនបានប្រកាសពីការពិភាក្សាប្រកបដោយប្រសិទ្ធភាព ជាមួយរាជរដ្ឋាភិបាលកាលពីថ្ងៃសៅរ៍ ។
មួយថ្ងៃ បន្ទាប់ពីលោកប្រធានាធិបតីចិន បានបញ្ចប់ដំណើរទស្សនកិច្ចប្រកបដោយផ្លែផ្ការបស់គាត់មកកាន់ព្រះរាជាណាចក្រកម្ពុជា លោក Wang Wenbin ឯកអគ្គរដ្ឋទូតចិនប្រចាំនៅកម្ពុជា បានអោយដឹងថា ប្រទេសចិនកំពុងតាមដានយ៉ាងដិតដល់នូវការអភិវឌ្ឍបណ្តាញផ្លូវដែកល្បឿនលឿនរបស់ព្រះរាជាណាចក្រកម្ពុជា ដោយលោកមានប្រសាសន៍ថា គម្រោងផ្លូវដែកដ៏មានសក្តានុពលតភ្ជាប់ពីកម្ពុជាទៅប្រទេសចិន ក៏កំពុងស្ថិតក្រោមការពិភាក្សាផងដែរ ។ គាត់បាននិយាយថា «ខ្ញុំជឿថា រដ្ឋាភិបាលចិនផ្តល់សារៈសំខាន់យ៉ាងខ្លាំងលើកិច្ចសហប្រតិបត្តិការផ្លូវដែក ហើយយើងនឹងជំរុញគម្រោងនេះយ៉ាងសកម្ម»។
លោកឯកអគ្គរដ្ឋទូត Wang បានមានប្រសាសន៍ថា ប្រទេសចិនបានចាត់ទុកកិច្ចសហប្រតិបត្តិការផ្លូវដែកថា ជាអាទិភាពសំខាន់មួយមិនត្រឹមតែសម្រាប់កម្ពុជា និងចិនប៉ុណ្ណោះទេ ប៉ុន្តែក៏ជាការជំរុញទំនាក់ទំនងរវាងប្រជាជន និងប្រជាជន និងការលើកកម្ពស់ពាណិជ្ជកម្មទ្វេភាគី និងពហុភាគីនិយមផងដែរ ។
លោកបាននិយាយថា «យើងជឿជាក់ថា ការពង្រីកកិច្ចសហប្រតិបត្តិការផ្លូវដែកនឹងផ្តល់អត្ថប្រយោជន៍ដល់ប្រទេសទាំងពីរ ពង្រឹងការតភ្ជាប់ក្នុងតំបន់ និងបង្កើនប្រសិទ្ធភាពដឹកជញ្ជូនសម្រាប់អ្នកដំណើរ និងទំនិញ» ។
ឯកអគ្គរដ្ឋទូត Wang បានមានប្រសាសន៍ថា ការពិភាក្សាកំពុងបន្តទាក់ទងនឹងបណ្តាញផ្លូវដែកក្នុងតំបន់ ជាពិសេសលើប្រទេសណាដែលផ្លូវរថភ្លើងគួរតែឆ្លងកាត់ ដើម្បីធានាប្រសិទ្ធភាពនៃការដឹកជញ្ជូន និងពង្រីកផ្លូវពាណិជ្ជកម្មឱ្យកាន់តែមានប្រសិទ្ធភាព៕
ចែករំលែកព័តមាននេះ