ប្រទេសកូរ៉េខាងត្បូង ៖ ទីភ្នាក់ងារគយកូរ៉េខាងត្បូង បានឱ្យដឹងកាលពីថ្ងៃទី២១ ខែមេសា ឆ្នាំ២០២៥ ថា ប្រទេសកូរ៉េខាងត្បូងបានរកឃើញការកើនឡើងផលិតផលរបស់បរទេស ប៉ុន្តែក្លែងបន្លំបិទស្លាកផលិតផលនៅកូរ៉េខាងត្បូង ឬ…
ប្រទេសកូរ៉េខាងត្បូង ៖ ទីភ្នាក់ងារគយកូរ៉េខាងត្បូង បានឱ្យដឹងកាលពីថ្ងៃទី២១ ខែមេសា ឆ្នាំ២០២៥ ថា ប្រទេសកូរ៉េខាងត្បូងបានរកឃើញការកើនឡើងផលិតផលរបស់បរទេស ប៉ុន្តែក្លែងបន្លំបិទស្លាកផលិតផលនៅកូរ៉េខាងត្បូង ឬ «Made in Korea» ដែលភាគច្រើនមកពីប្រទេសចិន ដើម្បីគេចពីពន្ធរបស់សហរដ្ឋអាមេរិក។ នេះបើយោងតាមប្រភពពីទីភ្នាក់ងារសារព័ត៌មាន Reuters បានចេញផ្សាយ។
មន្ត្រីគយកូរ៉េខាងត្បូងបានអះអាងថា ខ្លួនបានរកឃើញផលិតផលបរទេសក្លែងបន្លំជាផលិតផលកូរ៉េខាងត្បូងមានតម្លៃ ២៩,៥ពាន់លានវ៉ុន ឬស្មើនឹង ២០,៨១លានដុល្លារ នៅត្រីមាសទី១ ឆ្នាំនេះ ដោយ ៩៧% សម្រាប់នាំចេញទៅសហរដ្ឋអាមេរិក បន្ទាប់ពីការស៊ើបអង្កេតពិសេសកាលពីខែមុន។ នោះបើប្រៀបធៀបទៅនឹងការក្លែងបន្លំសរុបគិតជាទឹកប្រាក់ចំនួន ៣៤,៨ពាន់លានវ៉ុន ឬ ២៤,៤លានដុល្លារពេញមួយឆ្នាំ ២០២៤ ក្នុងនោះការនាំចេញទៅអាមេរិកមានចំនួន ៦២%។
នៅក្នុងការរកឃើញរបស់គយកូរ៉េខាងត្បូងក៏រួមមាន សម្ភារប្រើសម្រាប់ផលិតអាគុយមានតម្លៃ ៣,៣ពាន់លានវ៉ុន ឬ ២,៣លានដុល្លារ ដែលនាំចូលពីប្រទេសចិន ដោយបិទស្លាកសញ្ញា Made in Korea គ្រោងនាំចេញទៅសហរដ្ឋអាមេរិក។ កាលពីខែមីនាកន្លងទៅ គយកូរ៉េក៏បានរកឃើញគ្រឿងបង្គំកាមេរ៉ាសុវត្ថិភាពគិតជាទឹកប្រាក់ចំនួន ១៩,៣ពាន់លានវ៉ុន ឬ ១៣,៥លានដុល្លារត្រូវបាននាំចូលពីចិន ហើយយកមកផ្គុំឡើងវិញនៅកូរ៉េខាងត្បូង ដើម្បីជៀសផុតពីការរឹតបន្តឹងរបស់អាមេរិកលើឧបករណ៍អេឡិចត្រូនិកចិន។
ជាការឆ្លើយតបនឹងកំណើននៃការក្លែងបន្លំនេះ គយកូរ៉េខាងត្បូងបានបង្កើតក្រុមការងារពិសេសមួយ ដើម្បីទប់ស្កាត់ការក្លែងបន្លំ និងនាំចេញខុសច្បាប់ ហើយគ្រោងបង្កើតវិធានការឆ្លើយតបជាក់លាក់បន្ថែមទៀត ដើម្បីការពារក្រុមហ៊ុនក្នុងស្រុកផងដែរ។
ចាប់តាំងពីចូលកាន់តំណែងកាលពីខែមករា ឆ្នាំ២០២៥ ប្រធានាធិបតីអាមេរិក លោក ដូណាល់ ត្រាំ (Donald Trump) បានប្រកាសពន្ធកម្រិតខ្ពស់លើផលិតផល និងប្រទេសផ្សេងៗ ដែលបានចាប់ផ្តើមចូលជាធរមានកាលពីខែមីនាកន្លងទៅ។ មន្ត្រីកូរ៉េខាងត្បូងលើកឡើងថា កត្តានេះអាចនាំឱ្យមានការកើនឡើងការក្លែងបន្លំដោយបណ្តាក្រុមហ៊ុនបរទេស ពិសេសក្រុមហ៊ុននៅប្រទេសចិនជិតខាងខ្លួន ដើម្បីបិទស្លាកសញ្ញាផលិតផលរបស់ខ្លួនជាផលិតផលកូរ៉េខាងត្បូងដែលជាប្រទេសសម្ព័ន្ធមិត្តដ៏សំខាន់ និងមានកិច្ចព្រមព្រៀងពាណិជ្ជកម្មសេរីជាមួយអាមេរិក ដើម្បីគេចពីពន្ធ និងបទប្បញ្ញត្តិនៅទីនោះ។
លោក ត្រាំ បានដាក់ពន្ធ ២៥% លើកូរ៉េខាងត្បូងក្នុងខែនេះ ដែលក្រោយមកត្រូវបានប្រកាសផ្អាករយៈពេល៣ខែ ប៉ុន្តែអាមេរិកបានដាក់ពន្ធរហូតដល់ ១៤៥% លើប្រទេសចិនក្នុងសកម្មភាពពន្ធសងសឹកគ្នាទៅវិញទៅមក ដែលអ្នកសេដ្ឋកិច្ចបាននិយាយថាបានកាត់ផ្តាច់ពាណិជ្ជកម្មរវាងប្រទេសសេដ្ឋកិច្ចធំជាងគេទាំងពីរនេះរបស់ពិភពលោក៕
ចែករំលែកព័តមាននេះ