សហរដ្ឋអាមេរិក ៖ សហរដ្ឋអាមេរិក កាលពីថ្ងៃទី២១ ខែមេសា ឆ្នាំ២០២៥ បានកំណត់ពន្ធថ្មីខ្ពស់លើការនាំចូលផ្ទាំងសូឡាពីប្រទេសនៅអាស៊ីអាគ្នេយ៍ចំនួន៤រួមមាន កម្ពុជា វៀតណាម ថៃ…
សហរដ្ឋអាមេរិក ៖ សហរដ្ឋអាមេរិក កាលពីថ្ងៃទី២១ ខែមេសា ឆ្នាំ២០២៥ បានកំណត់ពន្ធថ្មីខ្ពស់លើការនាំចូលផ្ទាំងសូឡាពីប្រទេសនៅអាស៊ីអាគ្នេយ៍ចំនួន៤រួមមាន កម្ពុជា វៀតណាម ថៃ និងម៉ាឡេស៊ី ដោយអត្រាខ្ពស់បំផុតរហូតដល់ ៣,៥២១% ខណៈដែលកម្ពុជា គឺជាប្រទេសជាប់ពន្ធលើផ្ទាំងសូឡាខ្ពស់ជាងគេ។ នេះបើតាមប្រភពពី Bloomberg និង CNBC បានចេញផ្សាយ។
សហរដ្ឋអាមេរិកបានបើកការស៊ើបអង្កេតរយៈពេលមួយឆ្នាំលើផលិតផលផ្ទាំងសូឡា ដែលផលិតក្នុងប្រទេសកម្ពុជា ថៃ វៀតណាម និងម៉ាឡេស៊ី គឺចាប់តាំងពីរដ្ឋបាលលោកប្រធានាធិបតីអាមេរិក លោក ចូ បៃឌិន ក្រោយក្រុមអ្នកដាក់ញត្តិ ដែលជាគណៈកម្មាធិការពាណិជ្ជកម្មនៃសម្ព័ន្ធអាមេរិកសម្រាប់ការផលិតផ្ទាំងសូឡា បានចោទប្រកាន់ក្រុមហ៊ុនផលិតផ្ទាំងសូឡារបស់ប្រទេសចិន ដែលមានរោងចក្រក្នុងប្រទេសកម្ពុជា ថៃ វៀតណាម និងម៉ាឡេស៊ី បានទទួលផលប្រយោជន៍ដោយអយុត្តិធម៌ពីការឧបត្ថម្ភធនពីរដ្ឋាភិបាល ដែលនាំឱ្យការផលិតនាំចេញទៅអាមេរិកលក់ក្នុងអត្រាទាបជាងតម្លៃផលិត។
យោងតាមនាយកដ្ឋានពាណិជ្ជកម្មអាមេរិកបានឱ្យដឹងថា ពន្ធទូទាំងប្រទេសត្រូវបានកំណត់ខ្ពស់ដល់ទៅ ៣,៥២១% លើផ្ទាំងសូឡានាំចូលពីកម្ពុជា ដោយក្រសួងពាណិជ្ជកម្មអាមេរិកបានបញ្ជាក់ថា កម្ពុជារងពន្ធខ្ពស់ជាងគេ ដោយសារតែបញ្ឈប់ការចូលរួមក្នុងការស៊ើបអង្កេត។
ក្រុមហ៊ុនដែលមិនមានឈ្មោះក្នុងប្រទេសវៀតណាមប្រឈមមុខនឹងពន្ធច្រើនរហូតដល់ ៣៩៥,៩% ចំណែកប្រទេសថៃត្រូវបានកំណត់ត្រឹម ៣៧៥,២%។ អត្រាទូទាំងប្រទេសសម្រាប់ម៉ាឡេស៊ីត្រូវបានកំណត់ត្រឹម ៣៤,៤%។
ជាមួយគ្នានោះផងដែរ ក្រុមហ៊ុន Jinko Solar នៅវៀតណាមជាប់ពន្ធ ២៤៥% និងនៅម៉ាឡេស៊ីជាប់ពន្ធ ៤០%។ ក្រុមហ៊ុន Trina Solar នៅថៃជាប់ពន្ធ ៣៧៥% និងនៅវៀតណាមជាប់ពន្ធច្រើនជាង ២០០%។ ដើម្បីឱ្យពន្ធថ្មីនេះ ត្រូវបានអនុវត្តជាផ្លូវការ គណៈកម្មការពាណិជ្ជកម្មអន្តរជាតិអាមេរិក នឹងត្រូវឆ្លងកាត់ការបោះឆ្នោតនៅខែមិថុនាខាងមុខនេះ ដើម្បីកំណត់ថា តើការនាំចូលផ្ទាំងសូឡាទាំងនេះ បានបង្កគ្រោះថ្នាក់ដល់ឧស្សាហកម្មក្នុងស្រុកឬទេ?
ប្រភពពពី Bloomberg ដដែលក៏បានឱ្យដឹងផងដែរថា សហរដ្ឋអាមេរិកបាននាំចូលផ្ទាំងសូឡាគិតជាទឹកប្រាក់ចំនួន ១២,៩ពាន់លានដុល្លារកាលពីឆ្នាំមុនពីប្រទេសកម្ពុជា វៀតណាម ថៃ និងម៉ាឡេស៊ី ដែលនឹងត្រូវទទួលបន្ទុកពន្ធថ្មី។ ចំនួននោះតំណាងឱ្យប្រហែល ៧៧% នៃការនាំចូលសរុបរបស់អាមេរិក៕
ចែករំលែកព័តមាននេះ