ខេត្តស្ទឹងត្រែង ៖ ប្រឡាយទឹក ដែលជាបណ្តាញតភ្ជាប់ពីប្រព័ន្ធធារាសាស្ត្រ អូរក្រសាំង ប្រមាណជា៦,០០០ម៉ែត្រ បានជួយអូសទាញ នូវប្រភពទឹក ទៅបង្កើនផលិតភាពកសិកម្មប្រជាពលរដ្ឋ ជិត១,០០០គ្រួសារ…
ខេត្តស្ទឹងត្រែង ៖ ប្រឡាយទឹក ដែលជាបណ្តាញតភ្ជាប់ពីប្រព័ន្ធធារាសាស្ត្រ អូរក្រសាំង ប្រមាណជា៦,០០០ម៉ែត្រ បានជួយអូសទាញ នូវប្រភពទឹក ទៅបង្កើ
នផលិតភាពកសិកម្មប្រជាពលរដ្ឋ ជិត១,០០០គ្រួសារ នៅឃុំស្រែក្រសាំង ស្រុកសៀមបូក ព្រមទាំងអាចជួយកាត់បន្ថយផលប៉ះពាល់ពីគ្រោះមហន្តរាយធម្មជាតិផងដែរ ។
លោក សរ សុពុត្រា អភិបាលខេត្តស្ទឹងត្រែង នាព្រឹកថ្ងៃទី២១ ខែមេសា ឆ្នាំ២០២៥ ក្នុងគ្រា ដែលលោកចុះទៅពិនិត្យការស្តារប្រឡាយ របស់មន្ទីរធនធានទឹក និងឧតុនិយម នៅចំណុចឃុំស្រែក្រសាំង ស្រុកសៀមបូក លោកបានថ្លែងអំណរគុណជាអនេក ដល់ក្រុមការងារបច្ចេកទេស នៃមន្ទីរធនធានទឹក និង ឧតុនិយមខេត្ត ដែលបានទទួលយក និងអនុវត្ត នូវសំណូមពរ ក្នុងការស្តារប្រឡាយ និងអូរ ដែលតភ្ជាប់ពីប្រព័ន្ធធារាសាស្ត្រអូរក្រសាំង មានអាងស្តុកទឹកបាន៤,៣លានម៉ែត្រគូប មានខ្នងទំនប់ប្រវែង ៩៩៨ម៉ែត្រ មានប្រឡាយមេ ៤,០៣៧ម៉ែត្រ និងប្រឡាយរង ២,២៩៥ម៉ែត្រមានលទ្ធភាពស្រោចស្រពបានផ្ទៃដី ៤៨៤ហិកតា នៅរដូវវស្សា ។
ការស្តារនេះ គឺដើម្បីទាញយកទឹកសម្រាប់ប្រើប្រាស់ (ប្រាំង-វស្សា) ជូនប្រជាកសិករសហគមន៍អូរក្រសាំង ស្ថិតនៅក្នុងភូមិស្រែក្រសាំង ឃុំស្រែក្រសាំង ស្រុកសៀមបូក ខេត្តស្ទឹងត្រែង ។
អភិបាលស្រុកសៀមបូក លោក សួង ហ៊ី បានបញ្ជាក់ថា ប្រជាពលរដ្ឋនៅឃុំស្រែក្រសាំង សរុបមាន៩៩៤គ្រួសារ ស្មើនឹង៤០២៤នាក់។ ប្រជាជននៅឃុំនេះ ពឹងផ្អែកលើវិស័យកសិកម្មជាបម្បង ក្នុងនោះធ្វើស្រែផង និងចំការផង ។ ការស្តារអភិវឌ្ឍប្រព័ន្ធធារាសាស្ត្រ ខាងលើគឺដើម្បីជួយបង្កើនផលិតភាពកសិកម្ម និងជួយកាត់បន្ថយផលប៉ះពាល់ពីគ្រោះមហន្តរាយធម្មជាតិ និងបង្កើនបាននូវប្រសិទ្ធភាពនៃប្រភពធនធានទឹក ធានាដល់ការផ្គត់ផ្គង់ទឹកគ្រប់គ្រាន់សម្រាប់ការបង្កបង្កើនផលលើវិស័យកសិកម្ម រួមទាំងការប្រើប្រាស់ក្នុងជីវភាពប្រចាំថ្ងៃ ព្រមទាំងបម្រើឱ្យអន្តរវិស័យ និងជួយកាត់បន្ថយនូវហានិភ័យបណ្តាលមកពីគ្រោះទឹកជំនន់ភ្លាមៗនៅក្នុងតំបន់ និងគ្រោះរាំងស្ងួត ដែលជាផ្នែកមួយជួយលើកស្ទួយដល់ជីវភាពរស់នៅរបស់បងប្អូនប្រជាពលរដ្ឋ និងជំរុញកំណើនសេដ្ឋកិច្ចស្របតាមយុទ្ធសាស្ត្របញ្ចកោណដំណាក់កាលទី១ នៃរាជរដ្ឋាភិបាលនីតិកាលទី៧ ក្រោមការដឹកនាំប្រកបដោយភាពមោះមុត ស្វាហាប់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ៕
ចែករំលែកព័តមាននេះ