ទីក្រុងសាណា៖ ក្រុមហ៊ូទីប្រកាសមិនញ៉ាកជាមួយអាមេរិកទេ ហើយត្រូវតែបន្តវាយបកវិញជានិច្ច។ ថ្ងៃនេះ បន្ទាប់ពីទទួលរងការវាយប្រហារពីសំណាក់កងទ័ពអាកាសអាមេរិកយ៉ាងដំណំ បណ្ដាលឱ្យស្លាប់រាប់សិបនាក់រួចមក ក្រុមហ៊ូទីមិនទាន់បង្ហាញសញ្ញារាងចាល ឬចុះញ៉មទេ។ មេដឹកនាំហ៊ូទី លោកម៉ាឌី…
ទីក្រុងសាណា៖ ក្រុមហ៊ូទីប្រកាសមិនញ៉ាកជាមួយអាមេរិកទេ ហើយត្រូវតែបន្តវាយបកវិញជានិច្ច។ ថ្ងៃនេះ បន្ទាប់ពីទទួលរងការវាយប្រហារពីសំណាក់កងទ័ពអាកាសអាមេរិកយ៉ាងដំណំ បណ្ដាលឱ្យស្លាប់រាប់សិបនាក់រួចមក ក្រុមហ៊ូទីមិនទាន់បង្ហាញសញ្ញារាងចាល ឬចុះញ៉មទេ។ មេដឹកនាំហ៊ូទី លោកម៉ាឌី អាល់ម៉ាសាត (Mahdi al-Mashat) ប្រកាសថាខ្លួនមិនសុខចិត្តបញ្ចប់បញ្ហាត្រឹមនេះទេ។
ការថ្លែងសារនយោបាយយ៉ាងដូច្នេះធ្វើឱ្យគេព្រួយបារម្ភថាសភាពការណ៍នៅសមុទ្រក្រហមប្រហែលជាមិនទាន់ធូរស្បើយនៅក្នុងពេលឆាប់ៗនេះទេ។ ក្រុមហ៊ូទីប្រហែលជាប្រកាន់ទស្សនៈ «បំណុលមានម្ចាស់, រីឯបំណុលឈាមត្រូវតែសងដោយឈាម»។ ម៉្យាងទៀត គេដាក់ជាសំណួរដ៏ធំ១ថាតើយុទ្ធសាស្ត្ររបស់អាមេរិកដែលប្រើកំហឹងទល់កំហល់ ប្រើប្រាស់កម្លាំងយោធាដើម្បីដោះស្រាយបញ្ហាតើអាចទប់ស្កាត់ក្រុមហ៊ូទីឱ្យបញ្ឈប់សកម្មភាពរបស់ពួកគេនៅសមុទ្រក្រហមបានដែរឬទេ?
សភាពការណ៍កាន់តែឡើងកម្ដៅនៅមជ្ឈិមបូព៌ា។ អ៊ីរ៉ង់រៀបជើងព្រួលក្រោយពេលអាមេរិកព្រមានទម្លាក់គ្រាប់បែក, ក្រុមហ៊ូទីបន្តការអុកឡុកនៅសមុទ្រក្រហម និងសង្គ្រាមនៅតំបន់ហ្កាហ្សាបន្តឆាបឆេះយ៉ាងក្ដៅគគុក។ ដូច្នេះអាមេរិកចាប់ផ្ដើមពង្រឹងកម្លាំងយោធារបស់ខ្លួន និងដាក់ពង្រាយខែលការពារមីស៊ីល, បញ្ជូនយន្តហោះទម្លាក់គ្រាប់បែក, នាវាដឹកយន្តហោះ និងក្រុមវាយប្រហារទៅមូលដ្ឋានរបស់ខ្លួននៅឌីហ្គោ ហ្កាសៀ (Diego Garcia) ស្ថិតនៅមហាសមុទ្រឥណ្ឌា។
លោកម៉ាសាតថ្លែងតាមកញ្ចក់ទូរទស្សន៍ថាបើអាមេរិកនៅតែបន្តវាយប្រហារទៀតមានន័យថា «អាវុធរបស់ពួកគេមិនអាចធ្វើអ្វីយើងបានទេ។ ត្រាំប្រហែលជាគិតថានេះគ្រាន់តែជារឿងកំប៉ិកកំប៉ុកតែប៉ុណ្ណោះ ប៉ុន្តែគាត់យល់ច្រឡំធំហើយ គាត់កំពុងផុងខ្លួននៅក្នុងស្ថានភាពដ៏អាក្រក់នៅយេម៉ែន»។
ក្រុមហ៊ូទីអះអាងថាខ្លួនបានបាញ់មីស៊ីលសំដៅទៅរកនាវាដឹកយន្តហោះរបស់អាមេរិក២គ្រឿង, បាញ់ធ្លាក់ដ្រូនរបស់អាមេរិកម៉ាក MQ-9 Reaper និងយកឈ្នះលើប្រព័ន្ធអេឡិចត្រូនិចដ៏ទំនើប។ ថ្មីៗនេះ អាមេរិកទើបតែវាយប្រហារតាមអាកាសទៅលើមូលដ្ឋានរបស់ហ៊ូទីនៅរដ្ឋធានីសាណា (Sana) និងតំបន់ដទៃទៀតរួមទាំងទីតាំងស្តុកទុកប្រេងរបស់ពួកគេផងដែរ។
វ៉ាស៊ីនតោនអះអាងថាការវាយប្រហារនោះបានកម្ទេចគោលដៅសំខាន់ៗ និងសម្លាប់យុទ្ធជនរបស់ហ៊ូទីរាប់សិបនាក់។ ប៉ុន្តែប្រព័ន្ធផ្សព្វផ្សាយរបស់ហ៊ូទីអះអាងថាអ្នកស្លាប់មិនមែនយុទ្ធជនទេ ប៉ុន្តែជាជនស៊ីវិល។ មេក្រុមហ៊ូទី លោកម៉ាសាត ថ្លែងបន្តទៀតថាយុទ្ធជនរបស់លោកអាចគេចផុតពីការវាយប្រហារធំៗជាច្រើនដងកាលពីពេលកន្លងមកដោយសារពួកគេតែងតែទទួលបានព័ត៌មានសម្ងាត់ទុកជាមុន។ គាត់មិនបានបញ្ជាក់ថាប្រភពសម្ងាត់នោះបានមកពីណាទេ។ ប៉ុន្តែអាមេរិកទើបតែចោទប្រកាន់ថ្មីៗនេះថាប្រទេសចិនបានបញ្ជូនរូបភាពតាមផ្កាយរណបទៅឱ្យហ៊ូទី។
ជាចុងបញ្ចប់ មេដឹកនាំហ៊ូទីសូមផ្ដាំទៅប្រទេសខ្លះយកល្អកុំពាក់ព័ន្ធនឹងជម្លោះនេះ។ ឧទាហរណ៍ដូចជាអារ៉ាប់រួម និងអារ៉ាប៊ីសាអូឌីតជាដើម។ ប្រទេស២នេះជាតួអង្គសំខាន់ដែលរួមគ្នាជួយក្រុមប្រឆាំងនឹងហ៊ូទីនៅក្នុងសង្គ្រាមឆ្នាំ២០១៥ដែលគេហៅថាសង្គ្រាមប្រយោលរវាងអ៊ីរ៉ង់ និងអារ៉ាប៊ីសាអូឌីតនៅយេម៉ែន។ នៅខែមេសានេះ បញ្ជាការដ្ឋានសម្ងាត់របស់អាមេរិកនៅមជ្ឈិមបូព៌ាឈ្មោះ CENTCOM បានកោះប្រជុំជាមួយអ៊ីស្រាអែល ហ្សក់ដង់ កាតា អារ៉ាប់រួម អារ៉ាប៊ីសាអូឌីត និងយេម៉ែន (ក្រុមប្រឆាំងហ៊ូទី) ដើម្បីពិភាក្សាគ្នាអំពីការបើកយុទ្ធនាការប្រឆាំងនឹងក្រុមហ៊ូទី។ នេះបើតាមប្រភពពីទស្សនាវដ្ដីញូស្វីក (Newsweek)៕
ចែករំលែកព័តមាននេះ