ទីក្រុងហាណូយ៖ ថ្ងៃនេះ តុលាការវៀតណាមសម្រេចបន្ធូរបន្ថយទោសសេដ្ឋីអចលនទ្រព្យ លោកស្រីជឿងមីឡានដែលត្រូវសាលាដំបូងកាត់ទោសឱ្យជាប់ពន្ធនាគារមួយជីវិតនោះមកជាប់ពន្ធនាគារ៣០ឆ្នាំវិញ។ ការសម្រេចនេះធ្វើឡើងបន្ទាប់ពីលោកស្រីជឿងមីឡានដាក់ពាក្យប្ដឹងទាស់នឹងសេចក្ដីសម្រេចទៅសាលាឧទ្ធរណ៍ និងបន្ទាប់ពីលោកស្រីផ្ដល់សក្ខីកម្មបញ្ជាក់ថារឿងរ៉ាវដែលបានកើតឡើងកាលពីពេលកន្លងមកវាគ្រាន់តែជារឿងចៃដន្យតែប៉ុណ្ណោះ។ ពោលគឺមិនមែនជាចេតនារបស់លោកស្រីធ្វើឱ្យខាតបង់ប្រាក់១៧ពាន់លានដុល្លារនៅក្នុងសំណុំរឿងចោទប្រកាន់សម្អាតប្រាក់ (ឬលាងលុយកខ្វក់)នោះទេ។
សូមរំលឹកថាលោកស្រីជឿងមីឡានត្រូវតុលាការសាលាដំបូងកាត់ទោសប្រហារជីវិតនៅក្នុងសំណុំរឿងដាច់ដោយឡែកមួយទៀតពាក់ព័ន្ធនឹងអំពើឆបោក និងលួចលុយពីធនាគារពាណិជ្ជសៃហ្កនអស់ប្រាក់២៧ពាន់លានដុល្លារ។ លោកស្រីបានប្ដឹងទាស់ទៅសាលាឧទ្ធរណ៍ដែរ។ ប៉ុន្តែសាលាឧទ្ធរណ៍នៅតែតម្កល់ទុកការសម្រេចរបស់សាលាដំបូងទុកជាបានការដដែល។
មានន័យថាលោកស្រីជាប់ទោសប្រហារជីវិត ហើយថែមទោសជាប់ពន្ធនាគារ៣០ឆ្នាំទៀត។ នេះមិនទាន់គិតទៅដល់សំណុំរឿងជាច្រើនករណីទៀតដែលលោកស្រីអាចនឹងជាប់ពន្ធនាគារជាច្រើនឆ្នាំ។ ដូច្នេះសម្រេចសម្រួចនៅទីបញ្ចប់ទោសប្រហារជីវិតនៅតែគេចមិនផុតដដែល។ តុលាការធ្លាប់បង្ហើបថាបើចង់រួចទោសប្រហារជីវិត (អាចបន្ថយមកនៅត្រឹមជាប់ពន្ធនាគារ១ជីវិតវិញ) លុះត្រាតែលោកស្រីរកបានប្រាក់៣/៤នៃទឹកប្រាក់ឆបោកនេះទៅឱ្យតុលាការដើម្បីចាត់ចែងសងការខូចខាត។
លោកស្រីជឿងមីឡានជាអ្នកដើរតួនាទីសំខាន់ណាស់នៅក្នុងសំណុំរឿងលាងលុយ ប៉ុន្តែចៅក្រមក៏យោគយល់ចំពោះការខិតខំប្រមូលប្រាក់ដើម្បីបន្ធូរបន្ថយទោស។ ហេតុនេះហើយបានជាអង្គជំនុំជម្រះសម្រេចបន្ថយទោសមកនៅត្រឹម៣០ឆ្នាំ។ ខាងលើនេះជាការអះអាងរបស់ចៅក្រមជំនុំជម្រះដែលពិនិត្យឃើញថាលោកស្រីជឿងមីឡានបានប្រមែប្រមូលទ្រព្យសម្បត្តិលក់ដើម្បីយកលុយសងជនរងគ្រោះនៅក្នុងអំពើឆបោករបស់គាត់។
នៅក្នុងសេចក្ដីថ្លែងការណ៍ចុងក្រោយកាលពីសប្ដាហ៍មុន លោកស្រីជឿងមីឡានចាត់ទុកព្រឹត្តិការណ៍ដែលបានកើតឡើងនោះជារឿងចៃដន្យតែប៉ុណ្ណោះ។ លោកស្រីថ្លែងថាចាប់តាំងពីជាប់ពន្ធនាគារ លោកស្រីខិតខំអស់ពីសមត្ថភាពដើម្បីដោះស្រាយបញ្ហានៅក្នុងគម្រោងអចលនទ្រព្យរបស់លោកស្រី។ ដូច្នេះ លោកស្រីស្នើសុំឱ្យអង្គជំនុំជម្រះទទួលស្គាល់កិច្ចខិតខំប្រឹងប្រែងរបស់លោកស្រីផង។
នៅក្នុងសំណុំរឿងធនាគារពាណិជ្ជសៃហ្កន សមត្ថកិច្ចរកឃើញថាលោកស្រីមានភាគហ៊ុនត្រឹមតែ៥%ប៉ុណ្ណោះ។ ប៉ុន្តែលោកស្រីហ៊ានបង្កើតក្រុមហ៊ុនខ្យល់រាប់ពាន់ដើម្បីខ្ចីលុយរហូតដល់អស់រលីងពីក្នុងធនាគារ (១២,៥ពាន់លានដុល្លារ)។ ដោយសារទង្វើរបស់លោកស្រី មនុស្សមិនតិចនាក់ទេដែលរងទុក្ខវេទនា ទឹកភ្នែកជូតក្បាលជង្គង់។ ប្រភពខ្លះថាប្រជាជនវៀតណាមរាប់ម៉ឺននាក់ដែលខិតខំដោយកម្លាំងញើសឈាមដើម្បីយកលុយបន្តិចបន្តួចរបស់ខ្លួនទៅដាក់ធនាគារគ្រាន់នឹងទទួលបានការប្រាក់ខ្លះ។ ប៉ុន្តែពួកគេមិនត្រឹមតែមិនបានការប្រាក់ទេ ថែមទាំងអស់លុយដើមដែលយកទៅដាក់ធនាគារទៀត៕
ចែករំលែកព័តមាននេះ