រាជធានីភ្នំពេញ ៖ ក្បាលរថភ្លើងលេខ៦៥៣៥មួយគ្រឿង សណ្ដោងទូដឹកស៊ីទែនប្រេងជាច្រើនស៊ីទែន ខណៈពេលកំពុងតែបើកបរសុខៗ ស្រាប់តែមានភ្លើងឆាបឆេះឡើង បង្កឲ្យមានការភ្ញាក់ផ្អើលទាំងថ្ងៃ ។ ភ្លាមៗនោះ ត្រូវបានប្រជាពលរដ្ឋដែលស្ថិតនៅជិតនោះ…
រាជធានីភ្នំពេញ ៖ ក្បាលរថភ្លើងលេខ៦៥៣៥មួយគ្រឿង សណ្ដោងទូដឹកស៊ីទែនប្រេងជាច្រើនស៊ីទែន ខណៈពេលកំពុងតែបើកបរសុខៗ ស្រាប់តែមានភ្លើងឆាបឆេះឡើង បង្កឲ្យមានការភ្ញាក់ផ្អើលទាំងថ្ងៃ ។
ភ្លាមៗនោះ ត្រូវបានប្រជាពលរដ្ឋដែលស្ថិតនៅជិតនោះ រួមគ្នាជាមួយក្រុមការងាររថភ្លើងយកបំពង់ពន្លត់អគ្គិភ័យបាញ់ពន្លត់ និងដងទឹកជះពន្លត់ទាន់ពេល ធ្វើឲ្យភ្លើងថមថយ ។ បន្ទាប់មក អាជ្ញាធរបានចេញអន្តរាគមន៍ ហើយក៏មានរថយន្តពន្លត់អគ្គិភ័យចំនួន៤គ្រឿងចេញទៅជួយបាញ់ពន្លត់ ទើបរលត់ទៅវិញទាំងស្រុង ។
ហេតុការណ៍នេះ បានកើតឡើងកាលពីវេលាម៉ោង២ និង១០នាទីរសៀលថ្ងៃទី១០ ខែកញ្ញា ឆ្នាំ២០២៥ លើផ្លូវរថភ្លើងខ្សែភ្នំពេញ-បាត់ដំបង ស្ថិតនៅក្នុងភូមិសំរោង សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ ។
ក្រុមការងាររថភ្លើងនេះបាននិយាយថា រថភ្លើងនេះដឹកប្រេងទៅដាក់នៅម្ដុំផ្សារបាត់ដឹង ហើយខណៈកំពុងបើកសុខៗ ស្រាប់តែមានភ្លើងឆាបឆេះចេញពីម៉ាស៊ីនបែបនេះតែម្ដង ដោយពួកគាត់ក៏មិនបានដឹងថា បណ្ដាលមកពីក្ដៅពេក ឬឆ្លងចរន្តអ្វីមួយឡើយ ។
ប្រជាពលរដ្ឋបាននិយាយថា នៅមុនពេលកើតហេតុ ពួកគាត់បានឃើញរថភ្លើង១ខ្សែខាងលើដឹកប្រេងជាច្រើនស៊ីទែន បើកបរធ្វើដំណើរក្នុងទិសដៅពីកើតទៅលិច ។ លុះពេលមកដល់ត្រង់ចំណុចកើតហេតុ ជិតដល់មហាវិថីឈ្នះឈ្នះឆ្លងកាត់បានបន្ថយល្បឿន ហើយ ស្រាប់តែក្បាលរថភ្លើងខាងលើនោះ មានភ្លើងឆាបឆេះឡើង ដែលមើលឃើញទាំងអណ្ដាតភ្លើង និងផ្សែងខ្មួលខា្មញ់ឡើងលើ ។
ប្រជាពលរដ្ឋបាននិយាបន្តទៀតថា ពេលនោះ ពួកគាត់នាំគ្នាស្រែក និងលើកដៃជាសញ្ញាឃាត់ឲ្យឈប់ ទើបអ្នកបើកបរដឹងនិងឈប់ ហើយចុះចេញពីក្បាលរថភ្លើងនោះ ។ បន្ទាប់មក ពួកគាត់រួមជាមួយអ្នកបើកបររថភ្លើង និងក្រុមការងាររថភ្លើងបាននាំគ្នាប្រើប្រាស់បំពង់ពន្លត់អគ្គិភ័យបាញ់ពន្លត់អស់ជាច្រើនបំពង់ ព្រមទាំងដងទឹកជះពន្លត់រហូតអណ្ដាតភ្លើងថមថយអំណាច ។
ភ្លាមៗនោះ ក្រុមការងាររថភ្លើងក៏បានផ្ដាច់ទូប្រេងចេញត្រឹមក្បាល រួចយកក្បាលរថភ្លើង១គ្រឿងផ្សេងទៀតទៅអូសយកទូប្រេងទាំងនោះត្រលប់ក្រោយវិញ បន្ទាប់មកទៀតក៏មានរថយន្តពន្លត់អគ្គិភ័យចំនួន៤គ្រឿងបានចេញទៅបាញ់ពន្លត់ភ្លើង រហូតរលត់ទៅវិញទាំងស្រុង ៕
ចែករំលែកព័តមាននេះ