ទីក្រុងប៉ារីស៖ ប្រធានាធិបតីបារាំង លោកម៉ាក្រុង បានតែងតាំងលោកសេបាស្ទាន ឡឺគ័រនូ (Sebastien Lecornu) ជានាយករដ្ឋមន្ត្រីថ្មីជំនួសលោកបាយរូ (Bayrou) ដែលត្រូវសភាបោះឆ្នោតទម្លាក់កាលពីម្សិលមិញ។…
ទីក្រុងប៉ារីស៖ ប្រធានាធិបតីបារាំង លោកម៉ាក្រុង បានតែងតាំងលោកសេបាស្ទាន ឡឺគ័រនូ (Sebastien Lecornu) ជានាយករដ្ឋមន្ត្រីថ្មីជំនួសលោកបាយរូ (Bayrou) ដែលត្រូវសភាបោះឆ្នោតទម្លាក់កាលពីម្សិលមិញ។ លោកឡឺគ័រនូជាអ្នកដង្ហែតាមនយោបាយរបស់លោកម៉ាក្រុង និងជាអ្នកអភិរក្សនិយមដែលបានចូលរួមយុទ្ធនាការបោះឆ្នោតឆ្នាំ២០១៧។ ការតែងតាំងនេះខុសពីការរំពឹងទុករបស់មជ្ឈដ្ឋានខ្លះដែលគិតថាលោកម៉ាក្រុងអាចនឹងជ្រើសរើសបេក្ខជនខាងឆ្វេង។
ការជ្រើសរើសលោកឡឺគ័រនូវ័យ៣៩ឆ្នាំជានាយករដ្ឋមន្ត្រីមានន័យថាលោកម៉ាក្រុងនៅតែប្ដេជ្ញាចិត្តដឹកនាំរដ្ឋាភិបាលសំឡេងភាគតិចនៅរដ្ឋសភាដដែល។ ធ្វើយ៉ាងដូចម្ដេចក៏ដោយកុំឱ្យតែប៉ះពាល់ផែនការកំណែទម្រង់របស់លោកដែលគាំទ្រក្រុមអ្នកមានទ្រព្យសម្បត្តិ។ ក្នុងនោះ មានការកាត់បន្ថយពន្ធទៅលើអាជីវកម្ម និងក្រុមអ្នកមានទ្រព្យសម្បត្តិច្រើន ហើយនិងពន្យារពេលចូលនិវត្ត។
ខុទ្ទកាល័យរបស់លោកម៉ាក្រុងថ្លែងថាលើកនេះរាងប្លែកបន្តិច។ លោកម៉ាក្រុងបានប្រាប់ឱ្យលោកឡឺគ័រនូពិគ្រោះគ្នាជាមួយបណ្ដាគណបក្សនយោបាយនានាដែលមានអាសនៈនៅក្នុងរដ្ឋសភាដើម្បីរកគោលជំហររួមគ្នាពាក់ព័ន្ធនឹងការគាំទ្រគម្រោងថវិកាជាតិឆ្នាំ២០២៦ និងដើម្បីជជែកគ្នាទៅលើកម្មវិធីនយោបាយដទៃទៀតមុននឹងប្រកាសសមាសភាពគណៈរដ្ឋមន្ត្រី។
ដំណឹងស្ដីពីការតែងតាំងលោកឡឺគ័រនូជាបេក្ខជននាយករដ្ឋមន្ត្រីត្រូវបានគណបក្សឆ្វេងនិយមនិយាយបែបចម្អក។ គណបក្សឆ្វេងនិយមជ្រុលថ្លែងថាពួកគេនឹងបោះឆ្នោតទម្លាក់លោកឡឺគ័រនូ។ ប៉ុន្តែផែនការនេះប្រហែលជាមិនជោគជ័យទេព្រោះគណបក្សស្ដាំនិយមជ្រុល សមាជជាតិ របស់លោកស្រីឡឺពែន (Le Pen) ត្រៀមខ្លួនធ្វើការជាមួយលោកឡឺគ័រនូលើផ្នែកថវិកា៕
ចែករំលែកព័តមាននេះ