រាជធានីភ្នំពេញ ៖ ហាងកាហ្វេមួយកន្លែងយីហោ (21 May cafe) ត្រូវបានភ្លើងឆាបឆេះសន្ធោសន្ធៅ ដែលបណ្ដាលមកពីហេតុការណ៍ឆ្លងចរន្តភ្លើងម៉ាស៊ីនឆុងកាហ្វេ ហើយភ្លាមៗនោះ ម្ចាស់បានព្យាយាមពន្លត់ដែរ…
រាជធានីភ្នំពេញ ៖ ហាងកាហ្វេមួយកន្លែងយីហោ (21 May cafe) ត្រូវបានភ្លើងឆាបឆេះសន្ធោសន្ធៅ ដែលបណ្ដាលមកពីហេតុការណ៍ឆ្លងចរន្តភ្លើងម៉ាស៊ីនឆុងកាហ្វេ ហើយភ្លាមៗនោះ ម្ចាស់បានព្យាយាមពន្លត់ដែរ ប៉ុន្តែអត់ឈ្នះ ។
បន្ទាប់មករថយន្តពន្លត់អគ្គិភ័យចំនួន៤គ្រឿង បានចេញអន្តរាគមន៍ពន្លត់រហូតភ្លើងរលត់ទៅវិញទាំងស្រុង ប៉ុន្តែហាងកាហ្វេទាំងមូល រួមទាំងសម្ភារៈនៅក្នុងនោះទាំងអស់ ត្រូវបានក្លាយទៅជាចំណីភ្លើងទាំងស្រុង ហើយការខាតបង់គិតជាប្រាក់ជិត១ម៉ឺនដុល្លារ ។
ហេតុការណ៍នោះបានកើតឡើង កាលពីវេលាម៉ោង១១និង១០នាទីព្រឹក ថ្ងៃទី ខែកញ្ញា ឆ្នាំ២០២៥ ហើយហាងកាហ្វេខាងលើនោះមានទីតាំងស្ថិតនៅតាមផ្លូវបេតុង បណ្ដោយផ្លូវរថភ្លើងខ្សែរាជធានីភ្នំពេញ-ខេត្តកំពត ស្ថិតនៅក្នុងភូមិកំរៀងសង្កាត់កន្ទោក ខណ្ឌកំបូល រាជធានីភ្នំពេញ ។
សមត្ថកិច្ចបានប្រាប់ឲ្យដឹងថា ហាងកាហ្វេ (21 May cafe) នេះសាងសង់ពីដែកបាំងជញ្ជាំងកញ្ចក់ និងប្រក់ដំបូលស័ង្កសីស្នោ ដែលមានម្ចាស់ឈ្មោះ ស្រ៊ី ពេជ្រ ភេទប្រុស អាយុ24ឆ្នាំ មុខរបរលក់កាហ្វេ ស្នាក់នៅភូមិអង្គ សង្កាត់ចោមចៅទី៣ ខណ្ឌពោធិ៏សែនជ័យ ភ្នំពេញ ។
នៅមុនពេលកើតហេតុហាងកាហ្វេមួយនេះ បានបើកលក់ជាធម្មតា តាំងពីវេលាព្រឹកព្រលឹម រហូតដល់វេលាកើតហេតុ ស្រាប់តែមានការឆ្លងចរន្តភ្លើងម៉ាស៊ីនឆុងកាហ្វេ ។
សមត្ថកិច្ចបានប្រាប់ឲ្យដឹងបន្តទៀតថា ពេលនោះបានបង្កជាអណ្ដាតភ្លើងឆាបឆេះឡើងសន្ធោសន្ធៅ ហើយម្ចាស់ហាងបានព្យាយាមពន្លត់ដែរភ្លាមៗដែរ ដោយប្រើបំពង់ពន្លត់អគ្គិភ័យបាញ់ពន្លត់ ប៉ុន្តែភ្លើងមិនបានរលត់នោះទេ ក៏ឆេះរាលដល់សម្ភារៈផ្សេង នៅក្នុងហាង រួមទាំងហាងទាំងមូលយ៉ាងឆាប់រហ័សបំផុត ។
ដោយសារតែឆេះលឿនបែបនេះ ម្ចាស់ហាងមិនអាចយកអ្វីចេញបានសូម្បីតែបន្តិចឡើយ មិនតែប៉ុណ្ណោះព្រោះតែមានការសោកស្ដាយទ្រព្យសម្បត្តិ និងរន្ធត់ខ្លាំងពេក ម្ចាស់ផ្ទះបានអង្គុយស្រែកយំថា «អើយ! ឆេះអស់ហើយ » និងមានអាការៈទន់ជើងទន់ដៃស្ទើរតែដួលសន្លប់ទៀតផង ។
ប្រភពដដែលបានបញ្ជាក់ថា ក្រោយពេលមានហេតុការណ៍ខាងលើកើតឡើង កម្លាំងអាជ្ញាធរ និងសមត្ថកិច្ច សង្កាត់កន្ទោក និងខណ្ឌកំបូលបានចេញអន្តរាគមន៍ភ្លាមៗ ហើយខណៈនោះក៏មានរថយន្តពន្លត់អគ្គិភ័យចំនួន៤គ្រឿងចេញទៅអន្តរាគមន៍បាញ់ពន្លត់ភ្លើង ។
ក្រុមអ្នកពន្លត់ភ្លើងបាន ពន្លត់រហូតរលត់ទៅវិញទាំងស្រុង ប៉ុន្តែហាងកាហ្វេនេះបានរួមទាំងសម្ភារៈគិតជាទឹកប្រាក់សរុបជិត១ម៉ឺនដុល្លារបានក្លាយជាចំណីព្រះអគ្គិទាំងស្រុង ។ ទោះបីជាបែបណា ពុំមានអ្នករងរបួស ឬក៏ស្លាប់នៅក្នុងគ្រោះអគ្គិភ័យនេះទេ ហើយក៏ពុំបានបណ្ដាលឲ្យឆេះរាលដល់ទីតាំងផ្សេងទៀតដែរ ព្រោះហាងកាហ្វេមួយនេះស្ថិតនៅដាច់ឆ្ងាយពីផ្ទះអ្នកភូមិ ៕
ចែករំលែកព័តមាននេះ