តើអ្នកធុញទ្រាន់នឹងការបម្រះបម្រាស់ពេញមួយយប់ហើយឬនៅ? ដំណេកគឺជាការវិនិយោគដ៏សំខាន់បំផុតសម្រាប់សុខភាពរាងកាយ និងផ្លូវចិត្តរបស់អ្នក។ ការគេងលក់ស្រួលមិនមែនជាសំណាងទេ តែជាទម្លាប់។ យោងតាមអ្នកជំនាញសុខភាព (មន្ទីរពេទ្យកាល់ម៉ែត) នេះគឺជា ៧ ជំហានដ៏មានប្រសិទ្ធភាព…
តើអ្នកធុញទ្រាន់នឹងការបម្រះបម្រាស់ពេញមួយយប់ហើយឬនៅ? ដំណេកគឺជាការវិនិយោគដ៏សំខាន់បំផុតសម្រាប់សុខភាពរាងកាយ និងផ្លូវចិត្តរបស់អ្នក។ ការគេងលក់ស្រួលមិនមែនជាសំណាងទេ តែជាទម្លាប់។
យោងតាមអ្នកជំនាញសុខភាព (មន្ទីរពេទ្យកាល់ម៉ែត) នេះគឺជា ៧ ជំហានដ៏មានប្រសិទ្ធភាព ដែលអ្នកគួរអនុវត្ត ដើម្បីកែប្រែគុណភាពដំណេករបស់អ្នកឲ្យបានល្អឥតខ្ចោះ៖
១. កំណត់ម៉ោងគេង និងភ្ញាក់ឲ្យបានដូចនាឡិកា
នេះជាច្បាប់ចម្បងបំផុត! ត្រូវព្យាយាមចូលគេង និងភ្ញាក់ពីដំណេកនៅ ម៉ោងដដែលៗរៀងរាល់ថ្ងៃ ទោះបីជាថ្ងៃចុងសប្តាហ៍ក៏ដោយ។ ទម្លាប់នេះនឹងជួយកំណត់នាឡិកាជីវសាស្ត្ររបស់រាងកាយអ្នកឲ្យដឹងច្បាស់ថាពេលណាត្រូវសកម្ម និងពេលណាត្រូវសម្រាក។
២. ធ្វើឲ្យគ្រែរបស់អ្នកជាតំបន់ពិសិដ្ឋនៃការគេង
ខួរក្បាលរបស់អ្នកត្រូវភ្ជាប់គ្រែជាមួយនឹង “ការសម្រាក”។ ដូច្នេះ៖
កំណត់មុខងារគ្រែ៖ ប្រើគ្រែតែសម្រាប់គេង និងរួមភេទតែប៉ុណ្ណោះ។
កុំយកការងារ ឬកម្សាន្តទៅលើគ្រែ៖ ចៀសវាងការមើលទូរទស្សន៍ មើលខ្សែភាពយន្តរន្ធត់ ឬលេងទូរស័ព្ទយូរពេកនៅលើគ្រែ ដើម្បីកុំឲ្យខួរក្បាលចុះបញ្ជីគ្រែជាកន្លែងកម្សាន្ត។
៣. បន្ធូរអារម្មណ៍៖ ពិធីផ្លូវចិត្តមុនចូលគេង
ដំណេកត្រូវការការផ្លាស់ប្តូរផ្លូវចិត្ត។ មួយម៉ោងមុនចូលគេង ត្រូវបញ្ឈប់រាល់សកម្មភាពដែលត្រូវការការគិត ឬភាពតានតឹង ហើយប្តូរមកធ្វើសកម្មភាពស្ងប់ស្ងាត់វិញដូចជា៖
អានសៀវភៅស្រាលៗ (មិនមែនការងារ)។
ស្តាប់តន្ត្រីបុរាណ ឬតន្ត្រីសម្រួលអារម្មណ៍។
៤. ហាត់ប្រាណឲ្យចំពេលវេលា
ការហាត់ប្រាណជួយដុតបំផ្លាញថាមពលដែលធ្វើឲ្យរាងកាយនឿយហត់ស្រួលគេង ប៉ុន្តែត្រូវធ្វើវាក្នុងចន្លោះពេលត្រឹមត្រូវ។ ព្យាយាមហាត់ប្រាណក្នុងចន្លោះពេល ៥ ទៅ ៦ ម៉ោងមុនចូលគេង។ (ហាមហាត់ប្រាណខ្លាំងនៅជិតពេលគេង ព្រោះវាបង្កើនចង្វាក់បេះដូង)។
៥. ងូតទឹកក្ដៅឧណ្ហៗដើម្បីទម្លាក់សីតុណ្ហភាពស្នូល
ការងូតទឹកក្ដៅឧណ្ហៗ ១ ឬ ២ ម៉ោងមុនពេលសម្រាន្ត ជួយឲ្យសីតុណ្ហភាពស្បែកឡើងខ្ពស់បណ្តោះអាសន្ន។ នៅពេលអ្នកចេញពីបន្ទប់ទឹក សីតុណ្ហភាពស្នូលនៃរាងកាយនឹងធ្លាក់ចុះ ដែលជាសញ្ញាធម្មជាតិជួយឲ្យរាងកាយដឹងថាដល់ពេលត្រូវគេងហើយ។
៦. រៀបចំបរិយាកាសបន្ទប់ឲ្យល្អឥតខ្ចោះ
គុណភាពដំណេកគឺអាស្រ័យទៅលើបរិយាកាស៖
សីតុណ្ហភាព: រក្សាកម្ដៅបន្ទប់ឲ្យសមរម្យ (ត្រជាក់បន្តិចល្អជាងក្តៅ)។
សំឡេង: បិទសំឡេងរំខាន ឬប្រើសំឡេងពណ៌ស។
ពន្លឺ: ធ្វើឲ្យបន្ទប់ ងងឹតល្អ ព្រោះពន្លឺរារាំងការផលិតអ័រម៉ូន Melatonin (អ័រម៉ូនគេង)។
៧. គ្រប់គ្រងអាហារ និងភេសជ្ជៈមុនគេង
អ្វីដែលអ្នកញ៉ាំ និងផឹកមានឥទ្ធិពលផ្ទាល់ទៅលើដំណេក៖
អាហារពេលល្ងាច៖ ត្រូវតែជាអាហារ ស្រាលៗ និងងាយរំលាយ។
ជៀសវាងដាច់ខាត៖ ជាតិ កាហ្វេ, គ្រឿងស្រវឹង , និង បារី មុនពេលចូលគេង ព្រោះវាជាសារធាតុរំញោចដែលនឹងបំផ្លាញវដ្ដដំណេករបស់អ្នកទាំងស្រុង៕
ចែករំលែកព័តមាននេះ