នាយករដ្ឋមន្ត្រីថៃ លោកស្រី ផៃថងថាន ស៊ីណាវ៉ាត្រា នឹងមកបំពេញទស្សនកិច្ចនៅកម្ពុជាពីរថ្ងៃ នៅក្នុងសប្តាហ៍នេះ ដើម្បីប្រារព្ធខួបលើកទី៧៥ នៃទំនាក់ទំនងការទូតកម្ពុជា-ថៃ និងពង្រឹងកិច្ចសហប្រតិបត្តិការទ្វេភាគីរវាងប្រទេសទាំងពីរ ។…
នាយករដ្ឋមន្ត្រីថៃ លោកស្រី ផៃថងថាន ស៊ីណាវ៉ាត្រា នឹងមកបំពេញទស្សនកិច្ចនៅកម្ពុជាពីរថ្ងៃ នៅក្នុងសប្តាហ៍នេះ ដើម្បីប្រារព្ធខួបលើកទី៧៥ នៃទំនាក់ទំនងការទូតកម្ពុជា-ថៃ និងពង្រឹងកិច្ចសហប្រតិបត្តិការទ្វេភាគីរវាងប្រទេសទាំងពីរ ។
ទាំងកម្ពុជា និងថៃ បានប្រកាសថា លោកស្រី ផៃថងថាន នឹងមកបំពេញទស្សនកិច្ចជាថ្មីនៅកម្ពុជា នៅថ្ងៃពុធ និងថ្ងៃព្រហស្បតិ៍ តាមការអញ្ជើញរបស់នាយករដ្ឋមន្ត្រីកម្ពុជា សម្តេចមហាបវរធិបតី ហ៊ុន ម៉ាណែត ។
អ្នកនាំពាក្យរដ្ឋាភិបាលថៃ លោក ជីរ៉ាយុ ហោងសាប់ (Jirayu Houngsub) បានឲ្យដឹងថា លោកស្រីនឹងចូលជួបសម្តេចធិបតី នៅវិមានសន្តិភាពការិយាល័យនាយករដ្ឋមន្ត្រីកម្ពុជា ហើយនឹងរៀបចំកិច្ចប្រជុំពេញអង្គជាមួយសមភាគីកម្ពុជារបស់លោកស្រី ។
លោកបានបន្តថា ក្នុងអំឡុងកិច្ចប្រជុំនៅទីស្តីការនាយករដ្ឋមន្ត្រី នាយករដ្ឋមន្ត្រីទាំងពីរនឹងរួមគ្នាធ្វើជាអធិបតីក្នុងពិធីសម្ពោធនិមិត្តសញ្ញាផ្លូវការ រំលឹកខួបលើកទី៧៥នៃទំនាក់ទំនងការទូតកម្ពុជា-ថៃ ។ លោកបានបន្តថា នាយករដ្ឋមន្ត្រីទាំងពីរក៏នឹងធ្វើជាសាក្សីក្នុងការចុះហត្ថលេខាលើឯកសារសំខាន់ៗមួយចំនួន រវាងរដ្ឋាភិបាលទាំងពីរ ក្រៅពីនោះលោកស្រីក៏នឹងចូលជួបសម្តែងការគួរសមជាមួយប្រធានព្រឹទ្ធសភា សម្តេចតេជោ ហ៊ុន សែន ប្រធានរដ្ឋសភា សម្តេច ឃួន សុដារី និងព្រះករុណា ព្រះបាទសម្តេចព្រះបរមនាថ នរោត្តម សីហមុនី ។
អ្នកនាំពាក្យរដ្ឋាភិបាលថៃ បានបន្តថា ដំណើនេះនឹងក្លាយជាដំណើរទស្សនកិច្ចផ្លូវការលើកដំបូងរបស់លោកស្រី នាយករដ្ឋមន្ត្រីមកកាន់ប្រទេសកម្ពុជា ដើម្បីពង្រឹងទំនាក់ទំនង និងកិច្ចសហប្រតិបត្តិការរវាងប្រទេសជិតខាងទាំងពីរជាពិសេសលើវិស័យដូចជា សន្តិសុខ បញ្ហាព្រំដែន សេដ្ឋកិច្ច និងការអភិវឌ្ឍក៏ដូចជា ការពង្រឹងទំនាក់ទំនងរវាងប្រជាជន និងប្រជាជនផងដែរ ។ នេះ គឺជាការបង្ហើបរបស់អ្នកនាំពាក្យ ហើយបើតាមអ្នកវិភាគភាគីកម្ពុជា និងថៃអាចនឹងមានការពិភាក្សាលើបញ្ហាវឌ្ឍនភាពនៃគម្រោងពាក់ព័ន្ធនឹងដំណើរការរុករកប្រេងនៅតំបន់ត្រួតស៊ីគ្នា រវាងព្រះរាជាណាចក្រទាំងពីរនៅតំបន់ឈូងសមុទ្រថៃ ។
អ្នកវិភាគដែលសុំមិនបញ្ចេញឈ្មោះរូបនេះបានឲ្យដឹងថា រឿងនេះនឹងមានការពិភាក្សាគ្នាទោះជាតិច ឬច្រើន ។ លោកបានលោកឡើងថា រឿងអនុវត្តដំណើរការរុករកប្រេង និងឧស្ម័ន ដែលភាគីថៃកន្លងមកដុតដៃដុតជើងខ្លាំងបានស្ងប់ស្ងាត់ប្រមាណជា១ត្រីមាសដំបូង នៃឆ្នាំ២០២៥នេះ ខណៈដែលវា គឺជារឿងក្តៅបំផុតកាលពីចុងឆ្នាំ ។ ដូច្នេះភាគីទាំងពីរទំនងជាងពិភាក្សាលើបញ្ហានេះ ។
អ្នកវិភាគដដែលបានលើកឡើងថា ក្រៅពីនោះ ភាគីទាំងពីរនឹងពិភាក្សាលើការជំរុញកិច្ចសហប្រតិបត្តិការ លើផ្នែកសេដ្ឋកិច្ច ពាណិជ្ជកម្ម ទេសចរណ៍ និង ទំនាក់ទំនងរវាងប្រជាជន និងប្រជាជនដូចជា អ្នកនាំពាក្យរដ្ឋាភិបាលថៃបានបង្ហើបពីព្រោះថៃត្រូវបានគេដឹងថា កម្ពុជា គឺជាទីផ្សារមួយនៃទំនិញថៃ ស្របពេលដែលថៃក៏ជាទីផ្សារនៃផលិតផលវត្ថុធាតុដើមមួយរបស់កម្ពុជា ។
លោកបានបន្តទៀតថា ក្រៅពីនោះថៃក៏ជាវិនិយោគិនបរទេសមួយដែលកំពុងតែមានធុរកិច្ចច្រើននៅកម្ពុជា ដូចជា ធនាគារ សេវាកម្មបដិសណ្ឋារកិច្ច កសិកម្ម និងសុខភាព ខណៈដែលការផ្លាស់ប្តូរទេសចរណ៍ក៏មានសក្តានុពលខ្លាំងដោយថៃជាអ្នកទេសចរបរទេសលំដាប់ទី១ របស់កម្ពុជា ហើយពលរដ្ឋកម្ពុជាជាច្រើន ក៏បានចេញទៅថៃដើរលេងកម្សាន្តទៅព្យាបាលជំងឺ និងទៅបម្រើការងារនៅថៃ ៕
ចែករំលែកព័តមាននេះ