ប្រសិនបើស្ថានភាពពិភពលោក នៅតែអស្ថេរភាពនោះតម្លៃមាសត្រូវបានគេព្យាករណ៍ថា នឹងបន្តឡើងបន្ថែមទៀត ស្របពេលដែលតម្លៃប្រេងត្រូវគេព្យាករណ៍ថា នឹងកាន់តែធ្លាក់ថ្លៃ ព្រោះតម្រូវការប្រើប្រាស់ខ្សោយ ។ អ្នកវិភាគបានអះអាងថា នៅក្នុងស្ថានភាពដែលពិភពលោកស្ថិតនៅក្នុងស្ថានភាពដូចសព្វថ្ងៃមាស គឺជាឧបករណ៍នៃការជួញដូរដែលមានទំនុកចិត្តបំផុត…
ប្រសិនបើស្ថានភាពពិភពលោក នៅតែអស្ថេរភាពនោះតម្លៃមាសត្រូវបានគេព្យាករណ៍ថា នឹងបន្តឡើងបន្ថែមទៀត ស្របពេលដែលតម្លៃប្រេងត្រូវគេព្យាករណ៍ថា នឹងកាន់តែធ្លាក់ថ្លៃ ព្រោះតម្រូវការប្រើប្រាស់ខ្សោយ ។
អ្នកវិភាគបានអះអាងថា នៅក្នុងស្ថានភាពដែលពិភពលោកស្ថិតនៅក្នុងស្ថានភាពដូចសព្វថ្ងៃមាស គឺជាឧបករណ៍នៃការជួញដូរដែលមានទំនុកចិត្តបំផុត ។ ដូច្នេះតម្លៃរបស់វានឹងបន្តកញ្ជ្រោលឡើងពីព្រោះឧបករណ៍នៃការជួញដូរនានា ជាពិសេស គឺរូបិយប័ណ្ណរបស់ប្រទេសនានានាប្រែប្រួលតាមទំនោរនៃសេដ្ឋកិច្ច និងពាណិជ្ជកម្មរបស់ប្រទេស ។
ពួកគេបានបន្តទៀតថា ស្របពេលដែលមាសមានតម្លៃកើនឡើង ផ្ទុយទៅវិញតម្លៃប្រេងនឹងអាចធ្លាក់ចុះ ពីព្រោះតម្រូវការនៃការប្រើប្រាស់ថមថយ ដែលជាបច្ច័យរឹតតែរុញច្រានពិភពលោកឲ្យធ្លាក់នៅក្នុងស្ថានភាពដែលពិបាក ។
តម្លៃមាសនៅកម្ពុជា កាលពីថ្ងៃទី១៩ ខែមេសា ឆ្នាំ២០២៥ មួយតម្លឹងលក់ចេញមានតម្លៃ៤ពាន់ដុល្លារ សម្រាប់មាសគីឡូ និង៣ពាន់ដុល្លារសម្រាប់ប្លាទីនទឹក៧៥ នៅក្នុងមួយតម្លឹង ខណៈដែលតម្លៃប្រេងឥន្ធនៈវិញ ប្រេងម៉ាស៊ូតមានតម្លៃ៣.៥៥០រៀល ប្រេងសាំងធម្មតា៣.៧៥០រៀល និងសាំងស៊ុបពែរវិញ មានតម្លៃ៤.៤០០ រៀលនៅក្នុងមួយលីត្រ ។
តម្លៃនេះនឹងបន្តប្រែប្រួលនៅពេលខាងមុខ ទៅតាមស្ថានភាពនៃការវិវត្តន៍ទៅមុននៃតម្លៃនៅលើទីផ្សារ អន្តរជាតិ ផ្អែកតាមស្ថានភាពនិងស្ថានការណ៍ពិភពលោក ។
សារព័ត៌មាន Economic Times បានរាយការណ៍ថា ក្រុមហ៊ុន Goldman Sachs ដែលជាក្រុមហ៊ុនហិរញ្ញវត្ថុដ៏ធំដែលមានមូលដ្ឋាននៅសហរដ្ឋអាមេរិក បានព្រមានថា ប្រសិនបើបើស្ថានភាពពិភពលោកនៅតែមន្ទិលដូចសព្វថ្ងៃមិនយូរទេ តម្លៃមាសនឹងឡើងដល់ ៤.៤០០ ដុល្លារនៅក្នុងមួយតម្លឹង ហើយអាចនឹងឡើងរហូតដល់ទៅ៥.៤០០ដុល្លារនៅក្នុងមួយតម្លឹងនៅក្នុងរយៈពេលមធ្យម ។
លោក អានូ ហ្គូបតា (Anuj Gupta) ប្រធានផ្នែកទីផ្សារនៃក្រុមហ៊ុន HDFC Securities បានអះអាងថា តម្លៃមាសនៅពេលបច្ចុប្បន្ននេះ គឺពឹងផ្អែកខ្លាំងនៅលើសស្ថានភាពនៃការភ័យខ្លាចនៃសង្គ្រាមពាណិជ្ជកម្ម និងវិបត្តិសេដ្ឋកិច្ចនៅសហរដ្ឋអាមេរិក ។
តាមសារព័ត៌មាន VN Express វិញបានរាយការណ៍ថា កាលពីថ្ងៃសុក្រសប្តាហ៍មុនតម្លៃមាសធ្លាក់ចុះ៤,២ភាគរយ ប៉ុន្តែទោះបីជាយ៉ាងណាក៏ដោយ ក៏តម្លៃនៃលោហៈដ៏មានតម្លៃនៅប្រទេសសង្គមនិយមមួយនេះនៅតែមានតម្លៃរហូតដល់ទៅ៤.៤៤៥ ដុល្លារនៅក្នុងមួយតម្លឹង ។ នេះ គឺជាស្ថានភាពនៃតម្លៃមាស ដោយឡែកសម្រាប់តម្លៃប្រេងឥន្ធនៈវិញមានការព្យាករណ៍ថា អាចនឹងធ្លាក់ចុះ ជាពិសេស គឺនៅអាស៊ី ។
ទីភ្នាក់ងារព័ត៌មានរ៉យទ័រ បានរាយការណ៍កាលពីពេលថ្មីៗកន្លងទៅនេះថា ខណៈដែលតម្រូវការប្រេង មាននិន្នាការធ្លាក់ចុះ ហើយក្រុមប្រទេសផលិតប្រេងបែជាមានផែនការជំរុញផលិតកម្មប្រេងសម្រាប់ផ្គត់ផ្គង់មកអាស៊ីជាមួយនឹងការបញ្ចុះថ្លៃប្រេងឆៅនៅក្នុងមួយបារ៉ែល រហូតដល់ទៅ២,៣០ដុល្លារ ។
ប្រភពដដែលបានឲ្យដឹងថា ជាមួយនឹងការបញ្ចុះតម្លៃនេះ និងការបង្កើនផលិតកម្មប្រេងឆៅរហូតដល់ទៅ៤១១.០០០បារ៉ែល នៅក្នុងមួយថ្ងៃ នៅខែឧសភាខាងមុខនោះតម្លៃប្រេងនៅអាស៊ីនឹងធ្លាក់ចុះបន្ថែមទៀត ៕
ចែករំលែកព័តមាននេះ