ខេត្តកំពង់ឆ្នាំង ៖ ក្រោយផ្ទុះបាតុភាពដ៏អាក្រក់ដែលក្រុមហ៊ុន អានកូ វីរធីរ សឹបថ្នាយ ជាក្រុមហ៊ុនឯកជនទឹកស្អាត បានចាក់ដីចូលទន្លេសាប ធ្វើឱ្យប៉ះពាល់ធ្ងន់ធ្ងរដល់លំហូរទឹកនិងបរិស្ថាន នៅថ្ងៃទី…
ខេត្តកំពង់ឆ្នាំង ៖ ក្រោយផ្ទុះបាតុភាពដ៏អាក្រក់ដែលក្រុមហ៊ុន អានកូ វីរធីរ សឹបថ្នាយ ជាក្រុមហ៊ុនឯកជនទឹកស្អាត បានចាក់ដីចូលទន្លេសាប ធ្វើឱ្យប៉ះពាល់ធ្ងន់ធ្ងរដល់លំហូរទឹកនិងបរិស្ថាន នៅថ្ងៃទី ១៩ខែមេសាឆ្នាំ ២០២៥ គេឃើញក្រុមការងារក្រសួងពាក់ព័ន្ធ មានឯកឧត្តម អ៊ុក វុទ្ធី អនុរដ្ឋលេខាធិការ តំណាងឯកឧត្តមថោ ចេស្ដា រដ្ឋមន្ត្រីក្រសួងធនធានទឹកនិងឧតុនិយម ឯកឧត្តម ហែល តូនី អនុប្រធានក្តាប់ រួមនៃអាជ្ញាធរទន្លេសាប ឯកឧត្តម ស៊ុនសុវណ្ណារិទ្ធិ អភិបាលខេត្តកំពង់ឆ្នាំង និងអភិបាលក្រុងកំពង់ឆ្នាំង បានចុះទៅពិនិត្យទីតាំងជាក់ស្ដែងរបស់ក្រុមហ៊ុនឯកជនខាងលើ ស្ថិតនៅកំពង់ផែថ្មី ភូមិទី ៧ សង្កាត់ខ្សាម ក្រុងកំពង់ឆ្នាំង ដែលបានចាក់ដីរំលោភចូលទន្លេប្រវែង ៧០ ម៉ែត្រ ហើយបានលើកជាទំនប់ដោយគ្មានការអនុញ្ញាតត្រឹមត្រូវ ពីស្ថាប័នពាក់ព័ន្ធ និងអាជ្ញាធរ ខុសនីតិវិធី និងបន្ទាប់មកក៏បានបើកកិច្ចប្រជុំបន្ទាន់ភ្លាមៗផងដែរ។ តើហ៊ានឱ្យក្រុមហ៊ុនអានកូ កាយដីចេញវិញដែរទេ? ចាំមើលតើហ៊ានជាមួយក្រុមហ៊ុនអានកូ ដែរឬអត់?
នៅក្នុងកិច្ចប្រជុំតំណាងក្រុមហ៊ុនអានកូ បានលើកឡើងថាការចាក់ដីលើកទំនប់នេះគឺដើម្បីការពារ ម៉ាស៊ីនបូមទឹក ពីការរំខានដោយដើមកំប្លោក ក្នុងទន្លេ សម្រាប់បូមទឹកយកមកបម្រើសេវាកម្មផ្គត់ផ្គង់ទឹកស្អាត ជូនប្រជាពលរដ្ឋប្រើប្រាស់ប្រចាំថ្ងៃនៅក្រុងកំពង់ឆ្នាំង ដែលខ្វះទឹកស្អាតក្នុងរដូវប្រាំងដោយពុំមានចេតនាហ៊ុមព័ទ្ធយកដីធ្វើកម្មសិទ្ធិនោះទេ។
បើទោះបីក្រោមហេតុផលការដោះសាររបស់តំណាងក្រុមហ៊ុនយ៉ាងនេះក្តី ក៍ក្រសួងធនធានទឹក ក៏ដូចជាអាជ្ញាធរទន្លេសាប តម្រូវឲ្យក្រុមហ៊ុនអានកូ ជាក្រុមហ៊ុនឯកជនទឹកស្អាត ស្ដាអាចម៍ដី ចេញឡើងវិញ ដោយទុក រយៈពេលមួយសប្តាហ៍។ ចំពោះខាងក្រុមហ៊ុនក៏ដូចជាថ្នាក់ខេត្ត បានសម្របសម្រួលស្នើសុំប្រជុំកម្រិតបច្ចេកទេស ជាមួយក្រសួង និងក្រុមហ៊ុន ទឹកស្អាត នៅថ្ងៃចន្ទ័ និងបន្ទាប់មកទៀតយើងនឹងធ្វើការប្រជុំលក្ខណៈបច្ចេកទេសជាមួយនឹងមន្ត្រីបច្ចេកទេសធនធានទឹក ដើម្បីសម្រេចចុះអនុវត្តជាក់ស្ដែងនៅថ្ងៃអង្គារសប្តាហ៍ក្រោយ។
គួររំលឹកថាការចាក់ដីរំលោភទន្លេសាបរបស់ក្រុមហ៊ុន ទឹកស្អាត អានកូ គឺមានរយៈពេលយូរខែមកហើយ ប៉ុន្តែដោយ សារ មាន សារព័ត៌មានបានចុះផ្សាយទើបឃើញមានចំណាត់ការបែបនេះ ។
ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព៕
ចែករំលែកព័តមាននេះ