ចំនួនបាតុករស្លា.ប់នៅអ៊ីរ៉ង់ឡើងដល់ជិត៤០០០នាក់
ប្រទេសអ៊ីរ៉ង់ ៖ ទីភ្នាក់ងារសារព័ត៌មានHUMAN RIGHTS ACTIVISTS NEWS AGENCYគូសបញ្ជាក់កាលពីថ្ងៃទី១៨ មករា ថា បានត្រួតពិនិត្យលើចំនួនអ្នកស្លាប់…
ប្រទេសអ៊ីរ៉ង់ ៖ ទីភ្នាក់ងារសារព័ត៌មានHUMAN RIGHTS ACTIVISTS NEWS AGENCYគូសបញ្ជាក់កាលពីថ្ងៃទី១៨ មករា ថា បានត្រួតពិនិត្យលើចំនួនអ្នកស្លាប់ គឺមានដល់៣៩១៩នាក់ ក្នុងរលកបាតុកម្មហិង្សាក្នុងប្រទេសអ៊ីរ៉ង់ ហើយនាំទៅដល់ការបង្ក្រាបដ៏បង្ហូរឈាម។ គេមានការបារម្ភថា ចំនួននោះតាមការពិតមានខ្ពស់ជាងនេះទៀត។
នេះជាតួលេខមួយខ្ពស់បើប្រៀបធៀបទៅនឹងសេចក្ដីរាយការណ៍មុនដែលថា មានអ្នកស្លាប់ត្រឹម៣៣០៨នាក់។ ចំនួនជនរងគ្រោះពិតជាមានខ្ពស់ជាងបាតុកម្មដទៃៗទៀត ក្នុងពេលមានចលាចលក្នុងប្រទេសអ៊ីរ៉ង់ ចាប់តាំងពីច្រើនទសវត្សមកហើយ នាំឲ្យនឹកឃើញភាពចលាចលជុំវិញបដិវត្តន៍ឆ្នាំ១៩៧៩នៅប្រទេសនេះ ។
បណ្ដាអ្នកទទួលខុសត្រូវអ៊ីរ៉ង់មិនបានផ្ដល់តុល្យការច្បាស់ឡើយ ប៉ុន្តែមេដឹកនាំកំពូលអ៊ីរ៉ង់លោកអាយ៉ាតុលាអាលីខាមេនី ថ្លែងកាលពីថ្ងៃទី១៧មករាថា បាតុកម្មបណ្ដាលឲ្យមនុស្សស្លាប់ច្រើនពាន់នាក់ និងបានចោទប្រកាន់សហរដ្ឋអាមេរិកថា ជាអ្នកទទួលខុសត្រូវចំពោះមនុស្សស្លាប់ទាំងនេះ។ នេះជាការអះអាងលើកដំបូងរបស់មេដឹកនាំកំពូលអ៊ីរ៉ង់លើទំហំនៃការបាត់បង់ជីវិតមនុស្ស ដោយសាររលកបាតុកម្មដែលចាប់ផ្ដើមពីថ្ងៃទី២៨ ធ្នូ មក ដែលពីដំបូងជាបាតុកម្មប្រឆាំងទំនិញឡើងថ្លៃ ហើយក្រោយមកប្រែក្លាយជាការបះបោរប៉ងផ្ដួលរំលំរបបអ៊ីរ៉ង់។
ទីភ្នាក់ងារសារព័ត៌មានHUMAN RIGHTS ACTIVISTS NEWS AGENCYអះអាងទៀតថា បាតុករដល់២៤.៦៦៩នាក់ បានត្រូវចាប់ខ្លួន តាំងពីចាប់ផ្ដើមការបង្ក្រាបមក។ បណ្ដាអ្នកទទួលខុសត្រូវ
អ៊ីរ៉ង់បានចោទប្រកាន់ជាច្រើនលើក ដល់អាមេរិក និងអ៊ីស្រាអែលថា ជាអ្នកបង្កើតចលាចលក្នុងប្រទេសពួកគេ។
ក្នុងសារមួយចេញផ្សាយកាលពីថ្ងៃទី១៨មករាតាមបណ្ដាញសង្គមX ប្រធានាធិបតីអ៊ីរ៉ង់លោកម៉ាស៊ូដប៉េហ្សេស្គីយ៉ានលើកឡើងថា ការលំបាកលំបិនខាងសេដ្ឋកិច្ចរបស់ប្រជាជនអ៊ីរ៉ង់មកពីការប្រទូស្តរ៉ាយគ្នាតាំងពីយូរមកហើយ និងមកពីបណ្ដាទណ្ឌកម្មអមនុស្សធម៌របស់អាមេរិកនិងសម្ព័ន្ធមិត្ត។ រាល់ការឈ្លានពានប្រឆាំងមេដឹកនាំកំពូលរបស់ប្រទេសយើង ស្មើនឹងសង្គ្រាមទាំងស្រុងប្រឆាំងប្រជាជាតិអ៊ីរ៉ង់ ៕
ចែករំលែកព័តមាននេះ