ប្រទេសអេស្ប៉ាញ ៖ កាលពីថ្ងៃទី១៨ មករា មានគ្រោះថ្នាក់រថភ្លើងលឿន២នៅអេស្ប៉ាញ បណ្ដាលឲ្យមនុស្សស្លាប់យ៉ាងតិច២១នាក់ និងរបួសច្រើនសិបនាក់ ។ នេះជាតុល្យការចុងក្រោយរាយ ការណ៍ដោយកងឆ្មាំស៊ីវិលអេស្ប៉ាញ…
ប្រទេសអេស្ប៉ាញ ៖ កាលពីថ្ងៃទី១៨ មករា មានគ្រោះថ្នាក់រថភ្លើងលឿន២នៅអេស្ប៉ាញ បណ្ដាលឲ្យមនុស្សស្លាប់យ៉ាងតិច២១នាក់ និងរបួសច្រើនសិបនាក់ ។ នេះជាតុល្យការចុងក្រោយរាយ ការណ៍ដោយកងឆ្មាំស៊ីវិលអេស្ប៉ាញ ។
រដ្ឋមន្ត្រីដឹកជញ្ជូនអេស្ប៉ាញ លោកOSCAR PUENTE អះអាងតាមបណ្ដាញសង្គមXថា ការប៉ះគ្នាពិតជាសែនទារុណណាស់និងថា ចំនួនជនរងគ្រោះអាចមានខ្ពស់ជាងនេះទៀត បើតាមសេចក្ដីរាយការណ៍ផ្សេងៗពីគ្រោះថ្នាក់នោះ។ បណ្ដារូបភាពផ្សាយតាមទូរទស្សន៍រដ្ឋបង្ហាញរថភ្លើងទាំង២ចោមរោមដោយមនុស្សម្នា និងបណ្ដារថយន្តសង្គ្រោះចំណែកបណ្ដាភ្នាក់ងារសង្គ្រោះបានខិតខំជួយដល់អ្នករបួសជាច្រើននាក់ ។
តាមលោកOSCAR PUENTEថា បណ្ដាទូចុងក្រោយរបស់រថភ្លើងមួយរបស់ក្រុមហ៊ុនផ្លូវដែកIRYO ដែលចាកចេញពីទីក្រុងម៉ាឡាហ្គាតំបន់អានដាលូស៊ីទៅកាន់ក្រុងម៉ាឌ្រីដ បានធ្លាក់ពីផ្លូវដែកនៅជិតក្រុងអានដាម៉ូស ចម្ងាយជិត២០០គីឡូម៉ែត្រ ខាងជើងក្រុមម៉ាឡាហ្គា ដោយបុកជាមួយរថភ្លើងមួយទៀតរបស់ក្រុមហ៊ុនផ្លូវដែកRENFE ដែលរត់ក្នុងទិសដៅផ្ទុយគ្នា តាមផ្លូវដែកមួយទៀតស្របក្បែរគ្នា សំដៅក្រុងHUELVA ។
ការប៉ះគ្នាយ៉ាងខ្លាំងរវាងរថភ្លើងទាំង២ ជាមួយអ្នកដំណើរច្រើនរយនាក់ បណ្ដាលឲ្យទូ២ខាងមុខគេនៃរថភ្លើងរបស់ក្រុមហ៊ុនផ្លូវដែកRENFEក្រឡាប់ធ្លាក់ចេញពីផ្លូវដែក។ លោកOSCAR PUENTE គូសបញ្ជាក់ទៀតថា អាទិភាពសម្រាប់ពេលនេះ គឺជួយសង្គ្រោះបណ្ដាជនរងគ្រោះ។
កងឆ្មាំស៊ីវិលគូសបញ្ជាក់ពីតុល្យការមួយថា មានអ្នកស្លាប់យ៉ាងតិច២១នាក់ ហើយអាជ្ញាធរមូលដ្ឋានលើកឡើងពីអ្នករបួសយ៉ាងតិច៧៣នាក់ ក្នុងនោះ ៦នាក់របួសធ្ងន់ ។ នាយករដ្ឋមន្ត្រីអេស្ប៉ាញលោកប៉េត្រូសាន់សេសគូសបញ្ជាក់ថា លោកកំពុងតាមដានជាប់ការវិវឌ្ឍនៃសភាពការណ៍ ហើយរដ្ឋាភិបាលកណ្ដាលនៅក្រុងម៉ាឌ្រីដ បានបញ្ជូនបណ្ដាអ្នកសង្គ្រោះទៅកាន់កន្លែងគ្រោះថ្នាក់ ។ តុល្យការអាចមានខ្ពស់ជាងនេះទៀត ព្រោះបើតាមពួកអ្នកសង្គ្រោះថា អ្នកដំណើរច្រើននាក់នៅជាប់ខាងក្នុងរថភ្លើងនៅឡើយ ៕
ចែករំលែកព័តមាននេះ