ក្រុងសំរោង ៖ តំណាងរដ្ឋបាលក្រុងសំរោង អមដំណើរឯកឧត្តមអគ្គនាយករង នៃអគ្គស្នងការដ្ឋាននគរបាលជាតិ ចុះត្រួតពិនិត្យទីតាំងរណ្តៅគ្រាប់ ដែលប៉ះពាល់ដល់លំនៅដ្ឋានប្រជាពលរដ្ឋ ។ ជាក់ស្តែងរដ្ឋបាលក្រុងសំរោង បានប្រកាសនាព្រឹកថ្ងៃទី១៩…
ក្រុងសំរោង ៖ តំណាងរដ្ឋបាលក្រុងសំរោង អមដំណើរឯកឧត្តមអគ្គនាយករង នៃអគ្គស្នងការដ្ឋាននគរបាលជាតិ ចុះត្រួតពិនិត្យទីតាំងរណ្តៅគ្រាប់ ដែលប៉ះពាល់ដល់លំនៅដ្ឋានប្រជាពលរដ្ឋ ។
ជាក់ស្តែងរដ្ឋបាលក្រុងសំរោង បានប្រកាសនាព្រឹកថ្ងៃទី១៩ ខែមករានេះថា ៖ នាថ្ងៃទី១៨ ខែមករា ឆ្នាំ២០២៦ លោក ប៊ុត វ៉ាន់ដេត អភិបាលរង នៃគណៈអភិបាលក្រុងសំរោង បានអញ្ជើញចូលរួមអមដំណើរ ឯកឧត្តមអគ្គនាយករង នៃអគ្គស្នងការដ្ឋាននគរបាលជាតិ ក្នុងបេសកកម្មចុះត្រួតពិនិត្យទីតាំងរណ្តៅគ្រាប់ជាក់ស្តែង ដែលបានបង្កឱ្យមានផលប៉ះពាល់ដល់លំនៅដ្ឋាន និងទ្រព្យសម្បត្តិរបស់បងប្អូនប្រជាពលរដ្ឋក្នុងមូលដ្ឋាន ។
ក្នុងសកម្មភាពចុះពិនិត្យដោយផ្ទាល់នេះ ក្រុមការងារបានទៅដល់ទីតាំងគោលដៅសំខាន់ៗ រួមមាន ទីតាំងផ្ទះ លោកយាយ ណៃ ឡោន ទីតាំងរណ្តៅគ្រាប់ប្រភេទ MK84 ស្ថិតក្នុងភូមិដូនកែនសែនជ័យ និងទីតាំងផ្ទះឈ្មោះ ប៉េ ប៉ុល ស្ថិតក្នុងភូមិគោកច្រេស។
គោលបំណងនៃបេសកកម្មនេះ គឺដើម្បីវាយតម្លៃកម្រិតនៃផលប៉ះពាល់ និងស្វែងរកវិធានការដោះស្រាយឱ្យបានទាន់ពេលវេលា សំដៅធានាបាននូវសុវត្ថិភាព និងលំនឹងចិត្តសាស្ត្រជូនដល់បងប្អូនប្រជាពលរដ្ឋដែលរស់នៅក្នុងតំបន់រងគ្រោះ ។
ជាមួយគ្នានោះ អាជ្ញាធរក្រុង និងមន្ត្រីជំនាញ ក៏បានបន្តក្រើនរំលឹកដល់ប្រជាពលរដ្ឋឱ្យមានការប្រុងប្រយ័ត្នខ្ពស់ និងរាយការណ៍ជាបន្ទាន់ក្នុងករណីជួបប្រទះវត្ថុដែលសង្ស័យថា ជាសំណល់ជាតិផ្ទុះពីសង្គ្រាម ៕
ចែករំលែកព័តមាននេះ