ខេត្តកំពង់ស្ពឺ ៖ នារីម្នាក់ត្រូវបានកម្លាំងនគរបាលស្រុកភ្នំស្រួចសហការឃាត់បានជនសង្ស័យពាក់ព័ន្ធរឿងក្រុមចោរលួចប្លន់ម៉ូតូ ដែលកំពុងរត់គេចខ្លួន ហើយបន្សល់ទុកតែសម្ភារៈ និងវត្ថុតាងមួយចំនួន ។ ការឃាត់ខ្លួននារីម្នាក់ សង្ស័យមានការពាក់ព័ន្ធជាមួយក្រុមចោរលួច ប្លន់ម៉ូតូបានកាលពីវេលាម៉ោង៩និង៣០នាទីយប់…
ខេត្តកំពង់ស្ពឺ ៖ នារីម្នាក់ត្រូវបានកម្លាំងនគរបាលស្រុកភ្នំស្រួចសហការឃាត់បានជនសង្ស័យពាក់ព័ន្ធរឿងក្រុមចោរលួចប្លន់ម៉ូតូ ដែលកំពុងរត់គេចខ្លួន ហើយបន្សល់ទុកតែសម្ភារៈ និងវត្ថុតាងមួយចំនួន ។
ការឃាត់ខ្លួននារីម្នាក់ សង្ស័យមានការពាក់ព័ន្ធជាមួយក្រុមចោរលួច ប្លន់ម៉ូតូបានកាលពីវេលាម៉ោង៩និង៣០នាទីយប់ ថ្ងៃទី១៧ ខែមេសា ឆ្នាំ២០២៥ នៅក្នុងភូមិសម្បទានសែនជ័យ ឃុំយាយម៉ៅពេជ្រនិល ស្រុកភ្នំស្រួច ខេត្តកំពង់ស្ពឺ ។
នគរបាលស្រុកភ្នំស្រួចបាននិយាយឱ្យដឹងថា នៅមុនពេលឈានដល់ការឃាត់នារីជាជនសង្ស័យនេះ គឺកម្លាំងនគរបាលប៉ុស្តិ៍រដ្ឋបាលឃុំយាយម៉ៅពេជ្រនិល បានសហការជាមួយកម្លាំងប្រជាការពារល្បាតពួនស្ទាក់នៅគោលដៅប្រឈមក៏បានប្រទះឃើញមានមនុស្សចំនួន០២នាក់ ទី០១-ឈ្មោះ សឿន តួ ភេទ ប្រុស អាយុ២៥ឆ្នាំ និងទី០២-ឈ្មោះ យ៉ែម ផានិត ភេទស្រី អាយុ២២ឆ្នាំ ទាំងពីរនាក់ត្រូវជាសង្សានឹងគ្នា មុខរបរកម្មករចាំចម្ការស្វាយឲ្យឈ្មោះ ហ៊ឹម វណ្ណា ភេទប្រុស ស្នាក់នៅក្នុងភូមិសម្បទានសែនជ័យ ឃុំយាយម៉ៅពេជ្រនិល ស្រុកភ្នំស្រួច បានជិះម៉ូតូ០១គ្រឿង ម៉ាកហុងដាសេ១២៥ ស៊េរីឆ្នាំ២០១៧ ពណ៌ខ្មៅ គ្មានស្លាកលេខនោះទេ លុះពេលធ្វើដំណើរមកដល់ចំណុច ខាងលើ ក៏បានឃើញកម្លាំងរបស់សមត្ថកិច្ច រួចបានជិះគេចខ្លួនបានបន្តិចក៏ទុកម៉ូតូចោលរួចជនសង្ស័យ ឈ្មោះ សឿន តួ បានរត់គេចខ្លួនបាត់ បន្សល់ទុកឈ្មោះ យ៉ែម ផានិត និងម៉ូតូ នៅកន្លែងកើតហេតុ ។
នគរបាលស្រុកភ្នំស្រួចបានបន្តថា បន្ទាប់មកសមត្ថកិច្ចនគរបាលបានហៅឈ្មោះ យ៉ែម ផានិត មកសាកសួរនៅប៉ុស្តិ៍នគរបាលរដ្ឋបាលឃុំយាយម៉ៅពេជ្រនិល និងឆែកម៉ូតូខាងលើបានឃើញសម្ភារៈវត្ថុតាងមួយចំនួនរួមមាន ៖ – ដាវកែច្នៃចំនួន ០១ដើម – សោលេខ៨ចំនួនពីរ – សោលេខ១០ចំនួនពីរ – សោលេខ១៤ចំនួន១ដើមផងដែរ ។
បើយោងតាមការសាកសួរឈ្មោះ យ៉ែម ផានិត បានឆ្លើយសារភាពថា ខ្លួនជាសង្សានឹងឈ្មោះ សឿន តួ (ដែលបានរត់គេចខ្លួន) បានស្គាល់គ្នានៅភ្នំពេញប្រហែល៤-៥ឆ្នាំ ហើយឈ្លោះគ្នាទើបត្រូវគ្នាវិញប្រហែល ១៥ថ្ងៃ ក៏មកស្នាក់នៅក្នុងចម្ការស្វាយខាងលើ ពេលខ្លួនចូលនៅបានឃើញម៉ូតូចំនួន០២គ្រឿង ៖ ទី០១-ម៉ូតូម៉ាក វ៉េវពណ៌ក្រហម គ្មានស្លាកលេខ ជនសង្ស័យប្រាប់ថា បានលួចពីខេត្តកោះកុង និងទី០២-ម៉ូតូម៉ាក ហុងដាសេ១២៥ ពណ៌ខ្មៅ ពាក់ស្លាកលេខ ភ្នំពេញ 1CA-8495 (ម៉ូតូចាស់) ជនសង្ស័យប្រាប់ថា គេយកមកបញ្ចាំ ។
នគរបាលស្រុកដដែលបានបន្ថែមថា កាលពីវេលាម៉ោង២និង៥០នាទីរសៀល ថ្ងៃទី១២ ខែមេសា ឆ្នាំ២០២៥ កន្លងទៅឈ្មោះ សឿន តួ បានប្រាប់នាងខ្ញុំថា បានលួចយកម៉ូតូម៉ាកហុងដាសេ១២៥ ស៊េរីឆ្នាំ២០១៧ ពណ៌ខ្មៅ បានចំនួន០១គ្រឿង និងមានលុយចំនួន៣,០០០,០០០ រៀល (បីលានរៀល) នៅចំណុចមុខបន្ទាយទាហានថ្លុកតាសេក ស្ថិតក្នុងភូមិទី៣ ឃុំយាយម៉ៅពេជ្រនិល ស្រុកភ្នំស្រួច។ ហើយមកដល់ថ្ងៃទី១៧ ខែឆ្នាំខាងលើវេលាម៉ោង២៣និង០០នាទី ដោយមានការចូលរួមពីអាជ្ញាធរភូមិ ឃុំ និងបាននាំឈ្មោះ យ៉ែម ផានិត ទៅត្រួតពិនិត្យឆែកឆេរ រោងចាំចម្ការខាងលើ បានដកហូតវត្ថុតាងរួមមាន៖ ១-ម៉ូតូម៉ាក វ៉េវពណ៌ក្រហម គ្មានស្លាកលេខ ជនសង្ស័យប្រាប់ថាបានលួចពីខេត្តកោះកុង ។ ២-ម៉ូតូម៉ាក សេ១២៥ ពណ៌ខ្មៅ ពាក់ស្លាកលេខ ភ្នំពេញ 1CA-8495 (ម៉ូតូចាស់) ជនសង្ស័យប្រាប់ថាគេយកមកបញ្ចាំ ។ ៣-ម៉ូតូម៉ាកសេ១២៥ សេរី២០១៧ ពណ៌ខ្មៅ ចំនួន ០១គ្រឿង ជនសង្ស័យលួច កាលពីថ្ងៃទី១២ ខែមេសា ឆ្នាំ២០២៥ នៅចំណុចមុខបន្ទាយថ្លុកតាសេក ស្ថិតក្នុងភូមិទី៣ ឃុំយាយម៉ៅពេជ្រនិល ស្រុកភ្នំស្រួច ។ ៤-ឧបករណ៍សំរាប់វិចខ្ចប់ និងសំរាប់ប្រើប្រាស់គ្រឿងញៀនមួយចំនួន ។ ៥-គ្រឿងបន្លាស់ម៉ូតូមួយចំនួន។
នគរបាលស្រុកភ្នំស្រួចបានបញ្ជាក់ថា ៖ នៅក្នុងខ្ទមចាំចម្ការស្វាយខាងលើ មានមនុស្ស០៤ រស់នៅជាប្រចាំ ១-ឈ្មោះ យ៉ែម ផានិត ភេទស្រី អាយុ២២ឆ្នាំនៅភូមិសម្បទានសែនជ័យ ឃុំយាយម៉ៅពេជ្រនិល (ឃាត់ខ្លួន) ២-ឈ្មោះ សឿន តួ ភេទប្រុស អាយុ២៥ឆ្នាំ(គេចខ្លួន)
៣-ឈ្មោះ អែល ភេទប្រុស អាយុប្រហែល២២ឆ្នាំ(គេចខ្លួន) ៤-ឈ្មោះ ម៉េង ខាន់ណារាជ្យ ហៅម៉ាប់ ភេទប្រុស អាយុ២៦ឆ្នាំ(គេចខ្លួន) ទាំងបីនាក់ស្នាក់នៅចាំចំការស្ថិតក្នុងភូមិសម្បទានសែនជ័យ ឃុំយាយម៉ៅពេជ្រនិល ស្រុកភ្នំស្រួច ខេត្តកំពង់ស្ពឺ ។
តាមចម្លើយបញ្ជាក់បន្ថែមពីឈ្មោះ យ៉ែម ផានិត បានប្រាប់ ឈ្មោះទាំង០៣នាក់ខាងលើ គឺជាបក្សពួកនឹងគ្នាតែងធ្វើសកម្មភាពលួចម៉ូតូ និង ប្រើប្រាស់គ្រឿងជាមួយគ្នានៅក្នុងចម្ការស្វាយខាងលើ ។
បច្ចុប្បន្ននារីជាជនសង្ស័យរួមជាមួយវត្ថុតាងខាងលើនគរបាលជំនាញកំពុងកសាងសំណុំរឿងដើម្បីចាត់ការបន្តតាមផ្លូវច្បាប់ ៕
ចែករំលែកព័តមាននេះ