ខេត្តព្រៃវែង ៖ ដើម្បីអបអរសាទរពិធីបុណ្យចូលឆ្នាំថ្មីប្រពៃណីខ្មែរ ឆ្នាំម្សាញ់ 2025 រដ្ឋបាលខេត្តព្រៃវែងបានរៀបចំព្រឹត្តិការណ៍សង្ក្រាន្តព្រៃវែងដ៏ធំសម្បើមមួយ ដែលមានកម្មវិធីសប្បាយៗយ៉ាងច្រើនសម្រាប់ទទួលភ្ញៀវទេសចរណ៍ជាតិនិងអន្តរជាតិចូលមកលេងកម្សាន្តនៅខេត្តព្រៃវែង។ កម្មវិធីសប្បាយសប្បាយទាំងនោះរួមមាន ការប្រគុំតន្ត្រីសម័យ ការប្រឡងចម្រៀង…
ខេត្តព្រៃវែង ៖ ដើម្បីអបអរសាទរពិធីបុណ្យចូលឆ្នាំថ្មីប្រពៃណីខ្មែរ ឆ្នាំម្សាញ់ 2025 រដ្ឋបាលខេត្តព្រៃវែងបានរៀបចំព្រឹត្តិការណ៍សង្ក្រាន្តព្រៃវែងដ៏ធំសម្បើមមួយ ដែលមានកម្មវិធីសប្បាយៗយ៉ាងច្រើនសម្រាប់ទទួលភ្ញៀវទេសចរណ៍ជាតិនិងអន្តរជាតិចូលមកលេងកម្សាន្តនៅខេត្តព្រៃវែង។
កម្មវិធីសប្បាយសប្បាយទាំងនោះរួមមាន ការប្រគុំតន្ត្រីសម័យ ការប្រឡងចម្រៀង ប្រឡងវរកញ្ញាស្រីស្រស់ប្រុសស្អាតទាំងវ័យក្មេកនិងវ័យចំណាស់ ការរាំលេងកំសាន្តតំបន់ត្រជាក់ចិត្ត ការដាក់តាំងផលិតផល និងសម្ភារៈប្រើប្រាស់ក្នុងស្រុក កម្មវិធីសាសនា ការលេងល្បែងប្រជាប្រិយ ការប្រកួតអុកចត្រង្គ ប្រកួតកីឡាបាល់ទះក្នុងភក់ ការបង្ហាញក្បាច់គុនបុរាណខ្មែរយុទ្ធក្រមខម ការបង្ហោះគោម ការបាញ់កាំជ្រួច ការសម្ដែងទស្សនីយភាពល្ខោនយីគេ និងកម្មវិធីកំសាន្តជាច្រើនទៀតផងដែរ។
ដោយសារតែឆ្នាំនេះ រដ្ឋបាលខេត្តព្រៃវែងបានរៀបចំព្រឹត្តិការណ៍សង្ក្រាន្តព្រៃវែង មានទ្រង់ទ្រាយកាន់តែធំ និងមានកម្មវិធីកំសាន្តជាច្រើនបែបនេះបានទាក់ទាញភ្ញៀវទេសចរជាតិនិងអន្តរជាតិឲ្យមកលេងកម្សាន្តច្រើនលើសលប់ ដែលតាមរបាយការណ៍របស់រដ្ឋបាលខេត្តព្រៃវែង ក្នុងរយៈពេល 3 ថ្ងៃនៃពិធីបុណ្យចូលឆ្នាំថ្មីប្រពៃណីខ្មែរ គិតចាប់ពីថ្ងៃទី 14 ដល់ថ្ងៃទី 16 មេសា ទីតាំងកំសាន្តទាំង 72 កន្លែងនៅទូទាំងខេត្តព្រៃវែងទទួលបានភ្ញៀវទេសចរណ៍ចូលមកលេងកម្សាន្ត។ប្រមាណជាង 2 លាននាក់ ក្នុងនោះថ្ងៃទី1 ទទួលបានភ្ញៀវទេសចរណ៍ប្រមាណ 575858នាក់/ដង នៅថ្ងៃទី 2 ទទួលបានភ្ញៀវទេសរប្រមាណ 798.356នាក់/ដង និងថ្ងៃទី 3 ទទួលបានភ្ញៀវទេសចរណ៍ប្រមាណ 1.020.129នាក់/ដង។
ក្នុងចំណោមទីតាំងលេងកម្សាន្តទាំង 72 កន្លែងនៅទូទាំងខេត្តព្រៃវែង ទីតាំងដែលមានភ្ញៀវទេសចរណ៍ទៅលេងកំសាន្តច្រើនជាងគេ គឺតំបន់ត្រជាក់ចិត្ត នៅកណ្ដាលក្រុងព្រៃវែង ដែលទីតាំងនេះមានការលេងបាញ់ ប៉ាតម្សៅ លេងពពុះសាប៊ូនិងមានការប្រគុំតន្ត្រីរាំលេងកំសាន្តផងដែរ ៕
ចែករំលែកព័តមាននេះ