ទីក្រុងបាងកក៖ ក្រុមអ្នកជួយសង្គ្រោះនៅប្រទេសថៃបន្តរើកកាយគំនរបាក់បែកនៃអគារដែលបាក់រលំដោយសារការរញ្ជួយដីកាលពីថ្ងៃទី២៨ ខែមីនាដោយសេចក្ដីសង្ឃឹមថាអាចនឹងរកឃើញអ្នកនៅរស់។ គិតត្រឹមល្ងាចថ្ងៃសៅរ៍ មនុស្សសរុប១០៣នាក់រងគ្រោះពីហេតុការណ៍នេះ។ ចំនួនអ្នកស្លាប់កើនដល់៣៥នាក់ គិតទាំងសាកសព៨នាក់ដែលទើបតែរកឃើញនៅថ្ងៃសៅរ៍។ ដូច្នេះ សាកសពមានសភាពស្អុយរលួយខ្លាំងមែនទែនព្រោះហេតុការណ៍នេះកន្លងផុតទៅជាង២អាទិត្យទៅហើយ។
ក្រៅពីនេះ មនុស្ស៥៩នាក់ទៀតនៅតែបន្តបាត់ខ្លួននៅឡើយ។ ទោះបីពេលវេលាកន្លងផុតទៅយូរបន្តិចមែន ប៉ុន្តែអាជ្ញាធរនៅតែមានសុទិដ្ឋិនិយមថាពួកគេអាចនឹងរកឃើញអ្នកនៅរានមានជីវិត។ ថ្ងៃនេះ ក្រុមអ្នកជួយសង្គ្រោះបើកការស្រាវជ្រាវនៅតំបន់ប៊ីហ្វ័រ និងស៊ីវាន់ (Zone B4 & C1) បន្ទាប់ពីទទួលបានសញ្ញាពីក្រុមអង្កេតតាមដានតាមប្រព័ន្ធកាំរស្មីថាអាចមានអ្នកនៅរស់នៅម្ដុំនោះ។ ជាពិសេស ពួកគេទទួលសញ្ញាថាជនរងគ្រោះកំពុងតែសន្លប់ធំ ប៉ុន្តែនៅមានដង្ហើមដកនៅឡើយ។
តំបន់ប៊ីហ្វ័រនៅតែជាចំណុចយកចិត្តទុកដាក់ពីអាជ្ញាធរបន្ទាប់ពីក្រុមអ្នកជួយសង្គ្រោះមកពីប្រទេសអ៊ីស្រាអែលស្រាវជ្រាវឃើញថាមានអ្នកនៅរស់នៅម្ដុំជណ្ដើរឡើង-ចុះនៃអគារ។ អាជ្ញាធរប្រាប់ថាគេបានប្រើប្រាស់គ្រឿងចក្រប្រភេទអេស្កាវ៉ាទ័រដើម្បីជីកកកាយគំនរបាក់បែកជិតដល់កន្លែងជនរងគ្រោះទាំងនោះហើយ។ ប៉ុន្តែការជីកកកាយនេះរាងពិបាកបន្តិចដោយសារអគារនៅទីនោះមានផ្ទាំងបេតុងធំៗ។
អាជ្ញាធរប្រាប់ថាចាប់តាំងពីមានហេតុការណ៍រញ្ជួយដីនោះ ខ្លួនទទួលបានរបាយការណ៍ខូចខាតអគារ និងផ្ទះសម្បែងជាង១,៩ម៉ឺនករណី។ ក្នុងនោះ អគារ ឬផ្ទះជាង១,៧ម៉ឺនករណីត្រូវបានវាយតម្លៃថាមិនមានការខូចខាតធ្ងន់ធ្ងរទេ អាចបន្តប្រើការ និងរស់នៅក្នុងនោះបានតទៅទៀត។ ក្រៅពីនេះ ៣៨៧ករណីស្ថិតនៅក្នុងកម្រិតពណ៌លឿង មានន័យថាខូចខាតបន្តិចបន្តួច ត្រូវការជួសជុលខ្លះៗដើម្បីប្រើការឡើងវិញ។ ចំណែក៣៤ករណីស្ថិតនៅក្នុងកម្រិតក្រហម មានន័យថារងគ្រោះធ្ងន់ធ្ងរ៕
ចែករំលែកព័តមាននេះ